ބައެއް ޤާނޫނީވަކީލުން ގެ ސިޔާސީ މަގުސަދު ހާސިލު ކުރުމަށާއި، އަމިއްލަ އެޖެންޑާ ކުރިއަށް ނެރުއްވުމަށް މަސަކަތްކުރެއްމުގެ ސަބަބުން ރާއްޖޭގެ ޤާނޫނީ ވަކީލުންގެ ފަންނު ތަރައްގީކުރައްވައި ކުރިއެރުވުމަށް، ގޮންޖެހުންތަކަކާ ކުރިމަތިވެފައިވާކަމަށް ބަންޑާރަނައިބް އަލްއުސްތާޒު މުޙައްމަދު އަނިލް ވިދާޅުވެއްޖެއެވެ.
ރާއްޖޭގެ ޤާނޫނީ ދާއިރާއާ އަލަށް ގުޅިވަޑައިގެންނެވި 134 ވަކީލުންނަށް، ވަކީލުކަމުގެ ހުއްދައިގެ ލިޔުން ހަވާލުކުރެއްވުމަށްފަހު ވާހަކަފުޅުދައްކަވަމުން ދައުލަތުގެ ބަންޑާރަނައިބު އަލްއުސްތާޒް މުޙައްމަދު އަނިލް ވިދާޅުވީ، ޤާނޫނީ ވަކީލުންގެ ފަންނަކީ ދިވެހިރާއްޖޭގައި ކުރިއަރަމުންއަންނަ ވަރަށް މުހިއްމު ފަންނެއްކަމަށެވެ. ޝަރުޢީ ދާއިރާގެ އިތުރުން އިޖްތިމާޢީ، އިގްތިސާދީ އަދި ސަޤާފީކަންކަމާއި، ހިންގުމުގެ ދާއިރާގައި ޤާނޫނީ ވަކީލުންގެ ބޭނުން އިންތިހާއަށް ބޮޑުވެފައިވާކަމަށާއި، އަދި ވަކީލުންގެ ޚިދުމަތް ގައުމަށް މިހާރު އިންތިހާއަށް ބޭނުންވެފައިވާކަމަށް ވެސް އަނިލް ވިދާޅުވިއެވެ.
މީގެއިތުރުން ހުރިހާ ޤާނޫނީ ވަކީލުން އެކަތިގަނޑެއްގެ ގޮތުގައި މަސަކަތްކުރުމަށް ގިނަ ހުރަސްތަކެއް ހުރިކަން ބަނޑާރަނައިބުވަނީ ފާހަގަކުރައްވިއެވެ. އެގޮތުން ބައެއްވަކީލުން ސިޔާސީކަންކަމުގައި ބައިވެރިވެ އަމިއްލަ އެޖެންޑާ އިސްކުރުމުގެ ސަބަބުން ވަކީލުންގެ މެދުގައި އެއްބައިވަންތަކަން ނެތްކަމަށް އަނިލް ވިދާޅުވިއެވެ.
"މިސާލަކަށް ދަންނަވާނަމަ އަޅުގަނޑުމެންގެ ތެރެއިން ޤާނޫނީ ވަކީލުންގެ ފަރާތުންކަމަށް ވިދާޅުވެ، ސިޔާސީ ޕާޓރީއެއް ހިންގުމުގައި އިސްކޮށް އުޅުއްވާ ބޭފުޅުން، އެބޭފުޅުންގެ ސިޔާސީ ފިކުރު ފިތުނައާއެކު ގެންނެވުމުން ޤާނޫނީ ވަކީލުންގެ ފަންނު ކުރިއެއްނާރާނެ. އެބޭފުޅުން އެކުރައްވަން އުޅުއްވާ މަސައްކަތުގެ އިޚުލާސްތެރިކަމާމެދު އެހިސާބުންފެށިގެން ސުވާލު އުފެދުނީ" އަނިލް ވިދާޅުވިއެވެ.
ބަންޑާރަނައިބު ވިދާޅުވީ، ޤާނޫނީ ވަކީލުންގެ ފަންނު ކުރިއެރުވުމަށް ސަރުކާރާއި، ޝަރުޢީދާއިރާއިން މިހާރުވެސް ގެންދަވަނީ ބުރަ މަސައްކަތްތަކެއް ކުރައްވަމުންކަމަށެވެ. އެގޮތުން ގާނޫނީ ފަންނުގެ ބިލެއް ރައްޔިތުންގެ މަޖިލީހަށް ހުށަހެޅުއްވުމަށް މަސަކަތް ކުރައްވަމުން ގެންދަވާކަމަށް އޭނާ ވިދާޅުވިއެވެ.
" މިހާރުވެސް މިގެންނަވަން ފެށި ބަދަލުތަކާއެކު، ޤާނޫނީ ވަކީލަކަށް ވުމުގެ މަސަކަތްތަށް އިތުރަށް ހަރުދަނާކުރެވިއްޖެ. ވަކީލެއްގެ ހުއްދަދިނުމުގެ ކުރިން ޤާނޫނީ ވަކީލެއްގެ އޮފީހުގައި ނުވަތަ ދައުލަތުގެ ޤާނޫނީ އޮފީހެއްގައި މަސައްކަތް ކުރަންއެބަޖެހޭ. މިއާއެކު ސަރުކާރުގެ ލެޖިސްލޭޓިވް އެޖެންޑާގައިވާގޮތަށް ޤާނޫނީ ފަންނުގެ ބިލެއް ވަރަށް އަވަހަށް މަޖިލީހަށް ހުށައަޅައި، އެބިލުގެ ޒަރިއްޔާއިން އިތުރު ޙައްގުތަކާއި، ރައްކާތެރިކަން ލިބިގެންދާނެ" އަނިލް ވިދާޅުވިއެވެ.
ވަކީލުން ރައްޔިތުންނަށް ޚިދުމަތްދެއްވުމުގައި އަމާނާތްތެރިކަމާއެކު މަސަކަތް ކުރެއްވުމައް ބަންޑާރަނައިބުވަނީ ރޭ ހުރިހާ ވަކީލުންނަށް އިލްތިމާސްކުރައްވާފައެވެ.
ރޭ ހުވާކުރެއްވި 134 ޤާނޫނީ ވަކީލުންނާއެކު މިހާރު ރާއްޖޭގައި އެގާރަސަތޭކައެއްހާ ބޭފުޅުންނަށް ޤާނޫނީ ވަކީލުކަމުގެ ހުއްދަ ވަނީ ދެވިފައެވެ. އަދި އޭގެ ތެރެއިން ސާޅީސް އިންސައްތައަކީ، އަންހެނުންނެވެ.