އެމްއެންޑީއެފްގެ އަސްކަރީ ޤާބިލްކަން އިތުރުކުރެއްވުމުގެ ގޮތުން މާލޭ އޭރިއާގެ ކޮމްޕޯނަންޓްތަކަށް ޢަމާޒު ކުރައްވައިގެން ޚާއްޞަ އަސްކަރީ ތަމްރީނުތަކެއް ފަށްޓަވައިފިއެވެ.
މި ތަމްރީނުތަކަކީ، އެމްއެންޑީއެފް މާލޭ އޭރިއާގެ މެރީންސް އަދި ކޯސްޓްގާޑު ސްކޮޑްރަންގެ ސެއިލަރުން އަދާކުރަންޖެހޭ އޮޕަރޭޝަނަލް ޓާސްކުތަކަށް ތަމްރީނުދެއްވާ، ޤާބިލްކަން އިތުރު ކުރެއްވުމުގެ ގޮތުން ކުރިއަށްގެންދަވާ ތަމްރީނުތަކެއް ކަމަށް އެމް.އެންޑީއެފުން ވިދާޅުވެއެވެ.
މިމަހުގެ 9 ން 14 އަށް ކުރިއަށް ގެންދެވުމަށް ހަމަޖެހިފައިވާ މި ތަމްރީނުތައް މާލޭގެ ބައެއް ސަރަޙައްދުތަކުގެ އިތުރުން ހުޅުމާލެ އާއި، ހުޅުލެ އަދި ވިލިމާލޭ އާއި ތިލަފުށީގައި ކުރިއަށް ގެންދަވާނެއެވެ. އަދި މާލޭގެ ވަށައިގެންވާ ކަނޑުގެ ސަރަޙައްދުގައިވެސް މި ތަމްރީނުތަކުގެ ފަރިތަކުރުންތައް ކުރިއަށް ގެންދާގޮތަށް ހަމަޖެހިފައިވާ ކަމަށް އެމްއެންޑީއެފުން ވިދާޅުވެއެވެ.
މި ތަމްރީނުތަކުގައި މާލޭ އޭރިއާ ކޮމްޕޯނަންޓްތަކުގެ ގިނަ އަދަދެއްގެ ސިފައިން ބައިވެރިވާކަމަށްވެސް އެމްއެންޑީއެފުން މަޢުލޫމާތު ދެއްވައެވެ.