ޢީދާއި ގުޅިގެން މާލޭގެ ޓްރެފިކްފްލޯއަށް ބަދަލުތަކެއް

މިއަހަރުގެ އަޟްޙާ ޢީދު ނަމާދާއި ޢީދު ކުޅިވަރުތަކާއި ގުޅިގެން، މާލޭގެ ބައެއް ސަރަޙައްދުތަކުގެ ޓްރެފިކް ފްލޯއަށް ބަދަލު ގެނައުމަށް ދިވެހި ފުލުހުންގެ ޚިދުމަތުން ނިންމައިފިއެވެ.

ފުލުން އަންނަނީ ކޮންމެ ޢީދަކާއި ދިމާކޮށްވެސް މާލޭގެ ޓްރެފިކް ފްލޯއަށް ބަދަލުތަކެއް ގެނެސް ރައްޔިތުންނަށް ރައްކާތެރި ކަމާއެކު ދަތުރުފަތުރު ކުރެވޭނެ އިންތިޒާމު ހަމަޖައްސަމުންނެވެ.

ޕީއެސްއެމް ނިއުސްއަށް މައުލޫމާތުދެއްވަމުން ހެޑް އޮފް ޓްރެފިކް ޕޮލިސް، ޗީފް އިންސްޕެކްޓަރ އޮފް ޕޮލިސް އިބްރާހީމް އިމްރާން ވިދާޅުވީ، ޢީދު ނަމާދާއި ޢީދު ކުޅިވަރުތައް ކުރިއަށްދާ ވަގުތުތަކުގައި ބައެއް މަގުތައް އާންމު ދަތުރުފަތުރަށް ބަންދުކުރެވޭނެ ކަމަށެވެ. މާލޭގައި ބޮޑު ޖަމާޢަތުގައި ޢީދު ނަމާދުކުރާ މާފަންނު ސްޓޭޑިއަމްގެ ވަށައިގެންވާ މަގުތައް ޢީދު ނަމާދު ގަޑިއަށް ބަންދުކުރާނެކަމަށް ވިދާޅުވިއެވެ.
އެގޮތުން ސްޓޭޑިއަމް ވަށައިގެން މާފަތްތަކުރުފާނު މަގާއި އަމީނީ މަގު އަދި ހިލާލީ މަގު ހެނދުނު ހަޔަކުން ފެށިގެން ޢީދު ނަމާދު ނިމެންދެން ބަންދުވާނެއެވެ. އެހެންކަމުން ޢީދު ނަމާދަށް ދާ ފަރާތްތަކުން ކަނޑައެޅިފައިވާ ގޭޓްތަކުން ޢީދުނަމާދަށް ވަޑައިގެންނެވުމަށް ފުލުހުންވަނީ އިލްތިމާސްކުރައްވާފައެވެ.

ޢީދު ނަމާދު ބޮޑު ޖަމާޢަތަށް ސްޓޭޑިއަމަށް ދާ ފަރާތްތަކުގެ ތެރެއިން ފިރިހެނުން ސްޓޭޑިއަމަށް ވަނުމަށް ހަމަޖައްސާފައިވަނީ ހިލާލީ މަގު އެފްއޭއެމް ހައުސްއާ ދިމާލުން ހުންނަ މައި ގޭޓުންނާއި އިސްކަންދަރު ކޮށި 1 ކުރިމަތީގައިވާ ގޭޓުންނެވެ. އަންހެނުން ސްޓޭޑިއަމްގެ ވަނުމަށް ހަމަޖައްސާފައިވަނީ ކޯރުކެނޑި ހިނގުމުން އަމީނީ މަގަށް ނިކުމެވޭ ދިމާ ކުރިމަތީގައިވާ ގޭޓާއި ސިންތެޓިކް ޓްރެކާ ދިމާލުން ކަނޑައަޅާފައިވާ އިތުރު ގޭޓުންނެވެ. މި ގޭޓަށް ސިންތެޓިކް ޓްރެކް ތެރެއިންނާއި، މާފަތްތަކުރުފާނު މަގުން އަދި ބޮޑުތަކުރުފާނު މަގުން ވެސް ދެވޭނެކަމަށް ޗީފް އިންސްޕެކްޓަރ އޮފް ޕޮލިސް އިބްރާހީމް އިމްރާން ވިދާޅުވިއެވެ.

އިމްރާން ވިދާޅުވީ ޢީދުނަމާދަށް ދާ ފަރާތްތަކަށް ފަސޭހަވާނެ ގޮތަށް އިންތިޒާމުތައް ހަމަޖެއްސުމަށްޓަކައި ޓްރެފިކް ޕޮލިހުންނާއި ކެޑޭޓުންނާއި ގާލް ގައިޑުން އެސަރަހައްދުގައި ހަރަކާތްތެރިވާނެކަމަށެވެ.

ސްޓޭޑިއަމްގެ އިތުރުން ޢީދުނަމާދު ކުރާ އިސްލާމީ މަރުކަޒާއި ސަލްމާން މިސްކިތް ހިމެނޭ ސަރަހައްދުތައް ބަންދުކުރުމަށް ހަމަޖެހިފައިވަނީ އާންމުކޮށް ހުކުރު ނަމާދު ވަގުތުތަކުގައި ބަންދުކުރާ އުސޫލުންކަމަށް އޭނާ ވިދާޅުވިއެވެ.

ފުލުހުން ވަނީ މި ތިން ސަރަހައްދުގައި ޕާކުކޮށްފައި ހުރި އުޅަނދުތައް ވީހާވެސް އަވަހަކަށް ނެގުމަށްކަމަށް އެދިވަޑައިގެންފައެވެ.

"ޢީދުނަމާދު ކުރުމަށް ހަމަޖެހިފައިވާ ސަރަހައްދުތަކުގައި ޕާކުކޮށްފައިވާ އުޅަނދުތައް ވީއެންމެއަވަހަކަށް ނެގުމަށް ފުލުހުންގެ ފަރާތުން އެދެން. ސަބަބަކީ ޢީދު ނަމާދުގެ އިންތިޒާމުތައް ހަމަޖެއްސުމަށް އަޅުގަނޑުމެން އެސަރަހައްދު ހުސްކުރަންޖެހުން" އިމްރާން ވިދާޅުވިއެވެ.

މިސަރަހައްދުތަކުގައި ހުންނަ އުޅަނދުތައް ޓޯ ނުކުރި ނަމަވެސް، ނަމާދު ވަގުތަށް ސަރަހައްދު ހުސްކުރުމުގެ ގޮތުން އެހެން ސަރަހައްދުތަކަށް ބަދަލުކުރެވޭނެ ކަމަށް ފުލުހުން ވިދާޅުވެއެވެ.

ފުލުހުންވަނީ ޕާކުކުރުން މަނާ ސަރަޙައްދުތައް އެނގޭގޮތަށް ޗާޓެއް އާންމުކުރައްވާފައެވެ.

1447 ވަނަ އަހަރުގެ އަޟްޙާ ޢީދު ދުވަހު ޢީދު ނަމާދަށް މާފަންނު ސްޓޭޑިއަމް، އިސްލާމީ މަރުކަޒު އަދި ސަލްމާން މިސްކިތް ހިމެނޭ ސަރަހައްދުގެ ޓްރެފިކް ފްލޯ ހަމަޖެހިފައިވާ ގޮތް. pic.twitter.com/PfpI72Jv0C

— Maldives Police (@PoliceMv) May 25, 2026

ޢީދު ނަމާދުގެ އިތުރުން އީދު އުފާ ކުޅިވަރުތަކާ ގުޅިގެން އީދު ދުވަހުން ފެށިގެން ހަތަރު ދުވަހުގެ މުއްދަތަށް، ކޮންމެ ދުވަހަކު މެންދުރުފަހު 3:00 އިން އިރުއޮއްސި 6:00 އަށް ބައެއް މަގުތައް ދުއްވާއެއްޗަށް ނުވަދެވޭގޮތަށް ބަންދުކުރެވޭނެ ކަމަށް ޗީފް އިންސްޕެކްޓަރ އޮފް ޕޮލިސް އިބްރާހީމް އިމްރާން ވިދާޅުވިއެވެ. އެގޮތުން ސަލްޓަން ޕާކު، އިސްލާމީ މަރުކަޒުގެ މާބަލް އޭރިއާ، ޖުމްހޫރީ މައިދާން އަދި އިއްޒުއްދީން ފާލަން ހިމެނޭ ސަރަހައްދުގެ މިގަޑިތަކުގައި ބަންދުކުރެވޭނެއެވެ. މި ވަގުތުތަކުގައި އެ ސަރަހައްދުތަކުގައި އެއްވެސް އުޅަނދެއް ޕާކު ނުކުރުމަށާއި، އާންމު ދަތުރުފަތުރުގެ ކަންކަމުގައި މި ބަދަލުތަކަށް ހާއްސަ ސަމާލުކަމެއް ދެއްވުމަށްވަނީ އިލްތިމާސްކުރައްވާފައެވެ.

މިއަހަރުގެ ޢީދު ނަމާދު މާލެ ސަރަހައްދުން ހަތަރު ތަނެއްގައި ބޮޑު ޖަމާޢަތުގައި ކުރުމަށް ވަނީ ހަމަޖެހިފައެވެ. އެގޮތުން، މާލޭގެ މާފަންނު ސްޓޭޑިއަމް ސަރަޙައްދާއި، ވިލިމާލެ ފުޓުބޯޅަ ދަނޑާއި، ހުޅުމާލޭގެ ފުރަތަމަ ފިޔަވަހީގެ ސިންތެޓިކް ޓްރެކް އަދި ހުޅުމާލެ ދެވަނަ ފިޔަވަހީގެ މަސްޖިދު ޙަސަން އާދަމާއި ނިރޮޅުމަގާއި ހީނާމާ ހިނގުމާއި ފޭރުގަސްމަގާއި ދުބުރިގަސްމަގު ހިމެނޭ ގޮތަށް އޮންނަ ހުސްބިމުގައި ޢީދު ނަމާދު ކުރާނެއެވެ.

ބޮޑު ޖަމާޢަތުގެ އިތުރުން، މާލެ ސަރަހައްދުގެ ޖުމްލަ 25 މިސްކިތެއްގައި ޢީދު ނަމާދު ކުރާނެ ކަމަށް އިސްލާމިކް ކަންތައްތަކާ ބެހޭ ވުޒާރާއިންވަނީ ވިދާޅުވެފައެވެ.