މޯލްޑިވްސް ޑެފް އެސޯސިއޭޝަންގެ ފަރާތުން ހިންގި ބޭސިކް ސައިން ލެންގުއޭޖް ކޯސް ފުރިހަމަ ކުރި ފަރާތްތަކަށް ސެޓްފިކެޓް ދީފިއެވެ.
މިކަމަށްޓަކައި ރޭ ބޭއްވި ރަސްމިއްޔާތުގައި ކޯސް ފުރިހަމަ ކުރި ފަރާތްތަކަށް ސެޓިފިކެޓް ޙަވާލުކޮށްދެއްވީ، ކުރީގެ ފޮރިން މިނިސްޓަރ ދުންޔާ މައުމޫންއެވެ. މިކޯސް ޖުމްލަ 9 ފަރާތަކުން ފުރިހަމަކޮށްފައިވާކަމަށް ޑެފް އެސޯސިއޭޝަނުން މައުލޫމާތު ދެއްވައެވެ.
ރޭގެ ޙަފްލާގައި، އަޑު އިވުމުން މަޙްރޫމްވެފައިވާ ކުދިންވަނީ އެކުދިންނަށް އެކި ޚިދްމަތްތައް ލިބުމުގައާއި، މުޖުތަމަޢުގައި އެކުދިންނަށް ކުރިމަތިވާ ތަފާތު ގޮންޖެހުންތައް ފާހަގަކޮށް، އެކުދިންނަށް ބޭނުންވާ އެހީތެރިކަމަށް އެދި ގޮވާލާފައެވެ.
މޯލްޑިވްސް ޑެފް އެސޯސިއޭޝަނުން ހިންގާ ސައިން ލެންގުއޭޖް ކޯހަކީ، އިވުމުން މަހްރޫމް ވެފައިވާ ކުދިންނާއި މުއާމަލާތްކުރުމަށް ،ބޭނުންކުރާ ބަހުރުވަ ދަސްކޮށްދިނުމުގެ ގޮތުން ކުރިޔަށް ގެންދާ ކޯހެކެވެ. އިވުމުން މަހްރޫމްވެފައިވާ ފަރާތްތައް ދައްކާ ވާހަކަ އަނެކާއަށް އިޝާރާތުގެ ބަހުން ބުނެދޭން ދަސްކޮށްދޭ މިކޯހުގެ މައިގަނޑު އަމާޒަކީ މިފަދަ ގިނަ މީހުން ބިނާ ކުރުން ކަމަށް ޑެފް އެސޯސިއޭޝަނުން ބުނެއެވެ.