އިނގިރޭސި އެފްއޭކަޕުން ރޭ ނިއުކާސަލް ކެޓީ ކުޅުންތެރިންގެ ހަކަތަ ހުސްވެގެން ކަމަށް ކޯޗު އެޑީ ހޮވޭ ބުނެފި އެވެ.
އަމިއްލަ ދަނޑުގައި ނިއުކާސަލް ބަލިވީ ފަހަތުން އަރައި މެންޗެސްޓާ ސިޓީ ޖެހި ތިން ލަނޑުން 3-1އިންނެވެ.
މެޗަށް ފަހު ކޯޗު ބުނީ ފުރަތަމަ ގަޑިއެއްހާއިރު އޭނާގެ ޓީމު ރަނގަޅަށް ކުޅުނު ކަމަށެވެ.
"ގަޑިއެއްހާ އިރު މުޅި މެޗު އޮތީ އަހަރުމެންގެ ކޮންޓްރޯލުގައި. އެކަމަކު އޭގެ ފަހުން ގޭސް ހުސްވެއްޖެ. ކުޅުންތެރިންގެ ކިބާގައި ދެން އިތުރަށް ދުވާނެ ހަކަތައެއް ނެތި ދިޔައީ. އޭގެ ސަބަބުން އަހަރުމެން ބަލިވީ. އަހަރުމެންގެ ކުޅުން ގޯހެއް ނޫން. އެކަމަކު ކިތަންމެ ރަނގަޅަށް މެޗު ފެށި ނަމަވެސް ގޭސް ހުސްވީމާ ދެން ކުރާނެ ކަމެއް ނޯންނާނެ. ސަބަބަކީ އެ މީހުން ވެސް ވަރަށް މޮޅަށް ކުޅުނު،" ކޯޗު ބުންޏެވެ.
މި މެޗުގައި ހާވޭ ބާންސް 18 ވަނަ މިނިޓްގައި ހޯދަދިއިން ލީޑް ގެއްލުނީ 30 ވަނަ މިނިޓްގައި ސަވީނިއޯގެ ފައިގައި ޖެހިފައި ގޯލަށް ވަން ބޯޅައިންނެވެ. އޭގެ ފަހުން މިސުރުގެ ފޯވަޑް އޮމަރް މަރްމޫޝް 47 އަދި 65 ވަނަ މިނިޓްގައި ސިޓީ އަށް ދެ ގޯލު ޖަހައިދިނެވެ.
މެޗަށް ފަހު ވާހަކަ ދައްކަމުން އޭނާ ބުނީ މެޗުގެ ފަހު ދެ ގޯލު ޖަހަން ހިތްވަރު ލިބުނީ ކިހިނެތް ކަމެއް ވެސް ނޭނގޭ ކަމަށެވެ.
"އާނ. އަހަރެންނަކަސް ނޭނގެ ކިހިނެތް ކަމެއް އެ ފޯރި އައީ. އަހަރުމެން ދެ ގޯލު ޖަހައިގެން މޮޅުވީ. އަހަރެން އުފާވަނީ މި ޓީމުގެ މެމްބަރަކަށް އަހަރެން ވުމުން. ހަގީގަތުގައި ވެސް އަހަރުމެން މޮޅަށް ކުޅެގެން މޮޅުވީ،" މަރްމޫޝް ބުންޏެވެ.
ކޯޗު ޕެޕް ގާޑިއޯލާ ބުނީ މިއީ އޭނާ މެންޗެސްޓާ ސިޓީގައި ހޭދަކުރި 10 އަހަރު ތެރޭގައި ނިއުކާސަލްގެ ދަނޑުގައި އޭނާގެ ޓީމު ކުޅުނު އެންމެ މޮޅު މެޗު ކަމަށެވެ. އަދި އަނިޔާގައި ގިނަ ދުވަހު ހުރެފައި އައިސް މި މެޗުގައި ސިޓީގެ ޑިފެންޑަރު ޖޯން ސްޓޯންސް ދެއް ކުޅުމަށް ގާޑިއޯލާ ވަނީ ތައުރީފް ކޮށްފަ އެވެ.
"އެހާ ގިނަ ދުވަހު ނުކުޅެ ހުރެފައި އައިސް އޭނާ ދެއްކި ކުޅުމާމެދު ވަރަށް ހިތްހަމަ ޖެހޭ. އަދިވެސް އޭނާގެ އެންމެ މޮޅު ކުޅުން ދައްކަން އޭނާ އަށް ވަގުތު ބޭނުންވޭ. މި މެޗުގައި އޭނާ އަކީ ޓީމުގެ ކެޕްޓަން. އެހެންވީމާ އޭނާ ދެއްކި ކުޅުމަށް ތައުރީފް ކުރުން ވެސް ހައްގު. އަދި ސަވީނިއޯ ވެސް މި މެޗުގައި ވަރަށް މޮޅު. ވަރަށް ނުރައްކާ މީހެއްގެ ގޮތުގައި ފެނުނީ އަހަރެން މިހުރީ އެކަމާ ވަރަށް އުފަލުން،" ގާޑިއޯލާ ބުންޏެވެ.