ޕީއެސްއެމް ނިއުސް: މައުލޫމާތު ފޯރުކޮށްދިނުމުގެ އިސްސަފުގައި ކަނބަލުން

ދައުލަތުގެ މީޑިއާގެ ނިއުސްރޫމަކީ ޤައުމީ ޚިދުމަތުގައި ބުރަ މަސައްކަތެއް ކުރަމުން އަންނަ މުވައްޒަފުން ތިބި ތަނެކެވެ. ތަނުގައި މަސައްކަތް ކުރާ އަންހެން މުވައްޒަފުންގެ ނިސްބަތް ފިރިހެން މުވައްޒަފުންނަށްވުރެ ގިނައެވެ. ތަނުން ނެރޭ ކޮންމެ އުފެއްދުމެއްގައި އެކަނބަލުންގެ ހިއްސާއާއި ބައިވެރިވުން ކޮންމެވެސް ހިސާބަކުން އޮވެއެވެ.

ކެމެރާ ކުރިމަތިން ފެންނަ މޫނުތަކުން ފެށިގެން ކެމެރާގެ ފުރަގަހުގައި ކުރާ ބުރަ މަސައްކަތުން ރައްޔިތުންނާއި ހަމައަށް ގެނެސްދޭ އުފެއްދުމުގައި އެ ކަނބަލުން ހިއްސާއެއް ނެތި އެއްވެސް އުފެއްދުމެއް ރައްޔިތުންނާއި ހަމައަށް ނާދެއެވެ. ކޮންމެ ޒިންމާއެއް ހަވާލުކުރެވުނަސް އެކަން ކުރަނީ، އެކަމެއް އެންމެ ފުރިހަމައަށް ކުރުމުގެ ވަރުގަދަ ޢަޒުމުގައެވެ.

ޕީއެސްއެމްގެ ކުޑައިގެ ދަށުން ހިންގާ ނިއުސް ޗެނަލަށް އެކަނި ބެލިކަމުގައިވިއަސް އެންމެ މަތީ ފަޑީގެ އާރުކާޓީންގެ ގޮތުގައި ތިބި ކަނބަލުންނާއި ހިސާބުން ފެށިގެން އެންމެ އާދައިގެ މުވައްޒަފާއި ހަމައަށްވެސް މި މަސައްކަތް ކުރަނީ ތަނުގެ ފިރިހެން މުވައްޒަފުންނަށް ވަކި ދުލެއް ދިނުމެއް ނެތިއެވެ. ކޮންމެ ޒިންމާއެއްވެސް އަދާކުރަމުންދަނީ ފަރިތަކަމާއެކު ގުޅިގެންނެވެ.

ޢައިލާއަށް ދޭން ޖެހޭ ވަގުތު ދެމުން، މަސައްކަތަށް ފަރުވާކުޑަނުކޮށް ހުރިހާ ޒިންމާއެއް ފުރިހަމައަށް އަދާކުރެއެވެ. މީޑިއާގެ ދާއިރާއަކީ ގިނަ ވަގުތު ދޭންޖެހޭ މަސައްކަތުގެ މާހައުލެއް ނަމަވެސް، އާންމު ދިރިއުޅުމުގެ ކަންކަމާއި މަސައްކަތުގެ މާހައުލުގެ ކަންކަމަށް ބުރޫނާރުވާ ހިތްވަރާއެކު ނިއުސްރޫމުގެ އަންހެން ކަނބަލުން ދަނީ މަސައްކަތް ކުރަމުންނެވެ.

"ނިއުސްރޫމް ވަރަށް ހެކްޓިކޮށްދާނީ ގިނަ ފަހަރު ނޭނގޭނެ ވަގުތު ދާގޮތެއްވެސް. ވަރަށް އެލާޓުގައި ހުންނަންޖެހޭނީ. އެގޮތަށް ދާއިރު ދަރިންގެ ކަންކަމާއި މެދު ވިސްނަންޖެހޭ. ގޭގަ ކުރަން ހުންނަ ކަންކަމާއި މެދު ވިސްނަންޖެހޭ. އެހެނަސް އޮފީހުގެ މަސައްކަތަށް އަސަރު ނުކުރާ ގޮތަށް ރާވައިގެން ކުރިއަށް މިގެންދަނީ." ސީނިއަރ އެޑިޓަރ ހަފީޒާ އަބްދުއްސައްތާރު މަސައްކަތް ރާވާލާ ގޮތް ކިޔައި ދެމުން ބުންޏެވެ.

އަންހެނަކަށްވީތީ ނުކުރެވޭ ކަމެއް ނެތެވެ. ޤައުމުން ބޭރުގައި އެކަނި ދަތުރުކޮށް، ޚަބަރާއި މައުލޫމާތު ފޯރުކޮށްދީ އަދާކުރަން ޖެހޭ ހުރިހާ ޒިންމާއެއް އަދާކުރަމުގެ ހިތްވަރު ޕީއެސްއެމް ނިއުސްގެ ކަނބަލުންގެ ކިބައިގައި އެބަހުއްޓެވެ. ބުރަވެގެން ނުކުރެވޭނެ ކަމަށް އެކަނބަލުން ނުބުނާނެއެވެ.

ބައެއް މަސައްކަތްތަކަކީ ފިރިހެނެން ކުރަން ޖެހޭ މަސައްކަތެއް ކަމަށް ހީވެއެވެ. ފަންނީ މަސައްކަތްތައް ކުރުމުގައި ފިރިހެނަކަށް ދުލެއް ނުކުރެއެވެ. ބޮޑެތި ސިސްޓަމްތަކާއި ކުޅެލަނީ އެހާމަ ފަރިތަކާމާއެކުއެވެ.

"އަންހެނެއްގެ ހައިސީއްޔަތުން ޕީއެސްއެމްގައި މަސައްކަތް ކުރުމަކީ ވަރަށް ހިތްހަމަ ޖެހޭ ކަމެއް. މިއީ ޓެކްނިކަލް ދައިރާއަކަށްވެފައި މިދައިއިރާގައި އަންހެނުންނަށްވެސް މަސައްކަތް ކުރެވޭނެތީ އަޅުގަނޑު ވަރަށް ހިތްހަމަ ޖެހޭ." ނިއުސްރޫމުގް އެސިސްޓެންޓް ބްރޯޑްކާސްޓް އޮޕަރޭޓަރެއްގެ މަޤާމު އަދާކުރަމުންދާ އައިޝަތު ޝީޒާ އޭނާގެ މަސައްކަތް ސިފަކުރަމުން ކިޔައިދިނެވެ.

ރާއްޖޭގައި ނޫސްވެރިކަމުގެ ދައިރާގައިވެސް ބައެއް ވަކިވަކި ޚަބަރުތައް ކަވަރ ކުރުމުގައި އާންމުކޮށް ފިރިހެނުން ހަރަކާތްތެރިވާ ޚަބަރުގެ ދައިރާތައް ނުވަތަ ބީޓުތައް ހުރެއެވެ. އޭގެ އެއް ބީޓަކީ ކުޅިވަރެވެ. ވަރަށް މަދު އަންހެނުން ނޫސްވެރިން ހަރަކާތްތެރިވާ މި ދައިރާގައި ނިއުސްރޫމުގައި އެންމެ ކުރީ ސަފުގައި އަންހެން ނޫސްވެރިން ވަނީ ފައިހަރުކޮށްފައެވެ.

"ސްޕޯޓްސް ޖާނަލިސްޓުންގެ ގޮތުގައި ވަރަށް މަދު އަންހެން ޖާނަލިސްޓުން ހަރަކާތްތެރިވަނީ. އުއްމީދަކީ ކުރިއަށް އޮތްތަނުގައި މިއަށްވުރެ ގިނަ ޖާނަލިސްޓުން ފެނުން. މިއީ ޗެލެންޖިން ދައިރާއެއް. އެހެންނަމަވެސް މިދައިރާގައި ކުރިއަށް ދެވެނީ ޕީއެސްއެމްއިން ދޭ އެއްބާރުލުމާއެކު." ނިއުސްރޫމުގެ ސްޕޯޓްސް ޑެސްކުގައި ކުޅިވަރު ޚަބަރު ކަވަރކޮށް ޚަބަރު ކިޔަމުންދާ އާމިނަތު ރިޔާޒު އޭނާގެ މަސައްކަތުގެ ދައިރާ ސިފަކޮށްދިނީ މިގޮތަށެވެ.

ޖުމްލަގޮތެއްގައި ޕީއެސްއެމް ނިއުސްގެ ކޮންމެ ދިމާލަކަށް ބެލިޔަސް ފެނިގެންދަނީ ހީވާގިކަމާއެކު މަސައްކަތް ކުރާ ކަނބެލެކެވެ.

ނިއުސް އެޑްމިނިސްޓްރޭޝަން، އޮންއެއަރ، ނިއުސް މެނޭޖްމެންޓް، ނިއުސް ޕްރޮޑަކްޝަން، ރޭޑިއޯ އަދި ނިއުސްރޫމުގެ ނޫސްވެރިންގެ ގޮތުގައި މަސައްކަތް ކުރާ ކަނބަލުން ކަމުގައިވިއަސް، ޓީވީ ޗެނަލުން ނުވަތަ ވެބްސައިޓުން ފެނިގެންދާ ކޮންމެ ޚަބަރަކީ ނުވަތަ ޕްރޮގްރާމަކީ އެއިން ކަނބަލެއްގެ ހިއްސާ އަބަދުވެސް ޝާމިލްވާނެ ފުރިހަމަ މަސައްކަތެކެވެ.

މިއަދު ބައިނަލްއަޤްވާމީ އަންހެނުންގެ ދުވަސް ފާހަގަކުރާއިރު، ނިއުސްރޫމުގައި މަސައްކަތްކުރާ އަންހެން ކަނބަލުންނާމެދު މުޅި ޕީއެސްއެމް ނިއުސް ޓީމުން ފަޚުރުވެރިވެއެވެ.