ހުރިހާ ދާއިރާއަކުން އަންހެނުން ބާރުވެރިކުރުމަށް ގިނަ މަސައްކަތްތަކެއް!

ކޮންމެ އަހަރެއްގެވެސް މާރިޗު މަހުގެ 8 ވަނަ ދުވަސް ފާހަގަކުރަމުން އަންނަނީ ބައިނަލްއަޤްވާމީ އަންހެނުންގެ ދުވަހުގެ ގޮތުގައެވެ. މިއަހަރު މި ދުވަސް ފާހަގަކުރުމަށް އދ. އިން ކަނޑައަޅާފައިވާ ޝިއާރަކީ ރައިޓްސް، ޖަސްޓިސް ފޯރ އޯލް ވުމެން އެންޑް ގާރލްސްއެވެ.

ކޮންމެ އަހަރެއްގެވެސް މާރިޗު މަހުގެ 8 ވަނަ ދުވަހަކީ އިޤްތިޞާދީ، ސިޔާސީ އަދި އިޖްތިމާޢީ ކަންކަމުގައި އަންހެނުންގެ ދަޢުރު ފުޅާކުރުމާއި، އަންހެނުންނަށް ކުރާ އަނިޔާ ހުއްޓުވުމުގެ އިތުރުން އެމީހުންގެ ހައްޤުތައް ހޯދައިދިނުމަށް މަސައްކަތް ކުރުމުގެ ގޮތުން ބައިނަލްއަޤްވާމީ ފެންވަރުގައި ފާހަގަކުރާ ދުވަހެކެވެ. ތާރީޚަށް ބަލާއިރު މިދުވަސް ފުރަތަމަ ފަހަރަށް ފާހަގަކުރަން ފެށީ، 1911 ވަނަ އަހަރުއެވެ.

ބައިނަލްއަޤްވާމީ އަންހެނުންގެ ދުވަސް ފާހަގަކުރުމުގެ މައިގަނޑު މަޤްޞަދަކީ، ދިރިއުޅުމުގެ އެކި މަރުޙަލާތަކުގައި އަންހެނުން ކުރިމަތިލާންޖެހޭ ގޮންޖެހުންތަކުން އަރައިގަތުމަށްޓަކައި ކަމާބެހޭ ހުރިހާ ފަރާތްތަކެއް ގުޅިގެން މަސައްކަތް ކުރުމަށް ބާރު އެޅުމެވެ. މީގެ އިތުރުން، ތަފާތު އެކި ދާއިރާތަކުން އަންހެނުން ޤައުމަށްޓަކައި ކޮށްދީފައިވާ އަދި ކުރަމުންދާ އަގުހުރި ޚިދުމަތްތަކުގެ އަގުވަޒަންކޮށް، ކުރިއަށް އޮތް ޖީލުތަކުގައި އަންހެނުންނަށް ހަމަހަމަ ފުރުޞަތުތަކާއި މުޖުތަމަޢުގައި އެކަނބަލުންނަށް ޙައްޤުވާ މަތީ މަޤާމު ހޯދައިދިނުމަށް ހިތްވަރު ދިނުމަކީވެސް މި ދުވަހުގެ މުހިންމު ބޭނުމެކެވެ. ހަމައެއާއެކު، އަންހެނުންނަށް ކުރިމަތިވާ ޖިންސީ، ޖިސްމާނީ އަދި ނަފްސާނީ އަނިޔާތައް ހުއްޓުވައި، އެކަނބަލުންނަށް ރައްކާތެރި މާޙައުލެއް ބިނާކުރުމަށް މަސައްކަތް ކުރުމަށް މި ދުވަހުގެ ސަބަބުން ބާރުއަޅައެވެ.

އދ. އިން ވަނީ، އަންހެނުންނާއި މެދު ކުރާ އެންމެހާ ނޭދެވޭ ތަފާތު ކުރުންތައް ނައްތާލުމާއި ބެހޭ މުއާހަދާ ނުވަތަ ކޮންވެންޝަން އޮން ދި އެލިމިނޭޝަން އޮފް އޯލް ފޯމްސް އޮފް ޑިސްކްރިމިނޭޝަން އަގެއިންސްޓް ވިމެން (ސީޑޯ) އެކުލަވާލާފައެވެ. އަދި ދިވެހިރާއްޖެއިންވެސް ވަނީ މިމުއާހަދާ ތަސްދީޤްކޮށްފައެވެ. މިމުއާހަދާއަކީ، މައިގަނޑު ގޮތެއްގައި އަންހެނުންނާއި މެދު ކުރާ އެންމެހާ ނޭދެވޭ ތަފާތު ކުރުންތައް ނައްތާލުމަށް މަސައްކަތް ކުރުމަށް ހެދިފައިވާ މުއާހަދާއެކެވެ.

މި އަހަރުގެ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، މުޖުތަމަޢުގައި އަންހެނުންގެ ދައުރު ފުޅާކުރުމަށް މި ސަރުކާރުން ކުރަމުންދާ މަސައްކަތްތަކުގެ ތަފުސީލުތައް ޙިއްސާ ކުރައްވާފައެވެ. އެގޮތުން، ޤައުމު ބިނާކުރުމުގެ މަރުޙަލާތަކުގައި އަންހެނުންގެ ބައިވެރިވުން އިތުރު ކުރުމާއި، އެކަނބަލުންނަށް އާމްދަނީ ލިބޭނެ މަގުތައް ތަނަވަސް ކޮށްދިނުމަކީ، މި ސަރުކާރުގެ އިސް ސިޔާސަތެއްކަން ރައީސް ފާހަގަކުރެއްވިއެވެ.

މީގެ އިތުރުން، ރަށްރަށާއި ސިޓީތަކުގެ އަންހެނުންގެ ތަރައްޤީއަށް މަސައްކަތް ކުރާ ކޮމިޓީތައް އިތުރަށް ބާރުވެރި ކުރުވުމަށްޓަކައި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އިޞްލާޙު ގެނައުމަށް ވަނީ ނިންމާފައެވެ. މި ބަދަލާއެކު، ކައުންސިލްތަކުގެ ބަޖެޓުން އެ ކޮމިޓީތަކަށް މީގެ ކުރިން ކަނޑައަޅާފައިވާ 5 އިންސައްތައިގެ ބަދަލުގައި، މި އަހަރުން ފެށިގެން 10 އިންސައްތަ ހަމަޖައްސައިދިނުމަށް ސަރުކާރުން ވަނީ ނިންމަވާފައެވެ.

"އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ރައީސާއަކީ، ހުރިހާ ރައްޔިތުންގެ ސީދާ ވޯޓުން ހޮވާ ފުލްޓައިމް މަޤާމެއްގެ ގޮތުގައި ހަމަޖައްސައި، ކޮމިޓީގެ ރައީސާގެ ޒިންމާތަކާއި، މަސްއޫލިއްޔަތު އަދާކުރުމަށް ބޭނުންވާ ފުރިހަމަ ބާރުވެރިކަން ޤާނޫނީގޮތުން ވާނީ ހޯދައިދީފައި" ރައީސް ވިދާޅުވިއެވެ.

ވަޒީފާގެ ބާޒާރުގައި އަންހެނުންގެ ބައިވެރިވުން އިތުރު ކުރުމަށްޓަކައި، ގޭގައި ތިބެގެން މަސައްކަތް ކުރެވޭނެ އިންތިޒާމުތައް ހިމެނޭހެން ސަރުކާރުން ވަނީ ގިނަ ފުރުޞަތުތަކެއް ފަހިކޮށްދީފައެވެ.

އަންހެނުން އިޤްތިޞާދީ ގޮތުން ބާރުވެރި ކުރުވުމުގެ މަޤްޞަދުގައި، އަންހެން ވިޔަފާރިވެރިންނަށް ޚާއްޞަ ތަފާތު ލޯނު އެހީތައް ތަޢާރަފް ކުރަމުންދާއިރު، މީގެ ހެޔޮ ނަތީޖާ މިއަދު އަންނަނީ ފެންނަމުންނެވެ. އެގޮތުން މިފަދަ ލޯނުތަކުގެ އެހީގައި އަލަށް ވިޔަފާރި ފަށައި، އޭގެ މަންފާ ހޯދަމުންދާ އަންހެނުންގެ އަދަދު ދަނީ އިތުރުވަމުންނެވެ.

ދިވެހިރާއްޖޭގެ އާބާދީގެ ދެބައިކުޅަ އެއްބައި އަންހެނުން ޙިއްސާ ކުރާއިރު، ސިވިލް ސަރވިސްގެ ތަފާސްހިސާބުތަކުން ދައްކާ ގޮތުގައި ޚިދުމަތުގައި ގިނައީ އަންހެން މުވައްޒަފުންނެވެ. މީގެއިތުރުން، މަތީ ތަޢުލީމު ހާސިލުކުރާ މީހުންގެ ތެރޭގައިވެސް ނިސްބަތުން އަންހެނުން ގިނަކަން ފާހަގަކުރެވެއެވެ.

ވަޒީފާގެ މައިދާނުގައި އަންހެނުންގެ ދައުރު ފުޅާވަމުން އައި ނަމަވެސް، ދަރިން ބެލުމަށްފަހު ވަޒީފާއަށް ނުކުތުމަކީ އަދިވެސް އޮތް ބޮޑު ގޮންޖެހުމެކެވެ. މިކަމަށް ދާއިމީ ޙައްލެއް ހޯދައިދިނުމުގެ ގޮތުން، ދަރިފުޅަށް ދެ އަހަރު ވަންދެން މަސައްކަތު ގަޑީގައި ދަރިފުޅަށް ވަގުތު ދެވޭގޮތަށް ޤާނޫނަށް ހުށަހެޅި އިޞްލާޙު މިހާރު ވަނީ ޤައުމީ ތަރައްޤީއާއި ތަރިކައިގެ ކޮމިޓީން ފާސްކޮށްފައެވެ. މިއީ އަންހެނުން ބާރުވެރިކޮށް، ވަޒީފާ އަދާކުރަމުން ދަރިންގެ ކަންކަން ފަސޭހަކަމާއެކު ބެލެހެއްޓޭނެ މަގު ތަނަވަސްކޮށްދިނުމަށް އެޅުނު މުހިންމު ފިޔަވަޅެކެވެ.