ރަމަޟާން ހާފްކޯޓް ޗެލެންޖުގެ ޗެންޕިއަންކަން ސްޓާޒް، ޝޫޓާޒް އަދި އެފްއެސްސީ ޔުނިކޯންސްއަށް
-
ރަމަޟާން ހާފްކޯޓް ޗެލެންޖުގައި 20 ޓީމަކުން ވާދަކުރި
-
މުބާރާތުގައި 77 މެޗު ކުޅެފައިވޭ
-
ފިއޯންތީ ސްޕޯޓްސް އެކަޑަމީއިން ދަނީ ކުޅިވަރު ކުރިއެރުވުމަށް ގިނަ ޚިދުމަތްތަކެއް ކުރަމުން
ފިއޯންތީ ސްޕޯޓްސް އެކަޑަމީއިން އިންތިޒާމުކޮށްގެން ކުރިއަށްގެންދިޔަ ފޯރިގަދަ މައިލޯ ރަމަޟާން ހާފްކޯޓް ޗެލެންޖުގެ ޗެންޕިއަންކަން ސްޓާޒް، ޝޫޓާޒް އަދި އެފްއެސްސީ ޔުނިކޯންސްއިން ހޯދައިފިއެވެ.
މިމުބާރާތުގެ ޖޫނިއާ ކެޓަގަރީއިން ސްޓާޒް ޗެންޕިއަންކަން ހޯދީ ފައިނަލުގައި ނެޓް ނިންޖާސްއާއި ވާދަކޮށްގެންނެވެ. އަދި ސީނިއާ ކެޓަގަރީގެ ޗެންޕިއަންކަން ޝޫޓާޒްއިން ހޯދާފައިވަނީ އެޓޭކާޒްއާއި ވާދަކޮށްގެންނެވެ. އަދި އޯޕަން ކެޓަގަރީގެ ޗެންޕިއަންކަން އެފްއެސްސީ ޔުނިކޯންސްއިން ކަށަވަރުކުރީ ފައިނަލުގައި ފޯ ދަ ވައިބްސްގެ މައްޗަށް ކުރި ހޯދައިގެންނެވެ.
ޖުމްލަ 77 މެޗު ކުޅެފައިވާ މިމުބާރާތުގެ ކުޅުން ރޭ ނިންމާލާފައިވާއިރު ފައިނަލު މެޗުތަކަށްފަހު ވަނަވަނައަށް ދިޔަ ޓީމުތަކަށާއި ކުޅުންތެރިންނަށްވަނީ ތައްޓާއި މެޑަލް ހަވާލުކޮށްފައެވެ.
މައިލޯ ރަމަޟާން ހާފްކޯޓް ޗެލެންޖުގެ ޖޫނިއާ ކެޓަގަރީއިން ހުރިހާ ގޮތަކުން އެންމެ މޮޅު ކުޅުންތެރިޔަކަށް ހޮވިފައިވަނީ ޓީމް ސްޓާޒްގެ އެލީނާ ހުސައިން ސިނާންއެވެ. އަދި ސީނިއާ ކެޓަގަރީއިން ހުރިގާ ގޮތަކުން އެންމެ އެންމެ މޮޅު ކުޅުންތެރިޔާގެ ޝަރަފު ހޯދީ އެފްއެސްސީ ޔުނިކޯންސް ގެ ކަޔާނީ ބިންތު ޝައްފާޒްއެވެ. ކަޔާނީ ވަނީ އޯޕަން ކެޓަގަރީގައި ޝޫޓާޒްއަށްވެސް މޮޅު ކުޅުމެއް ކުޅެދީ އެ ކެޓަގަރީގެ ހުރިހާ ގޮތަކުން އެންމެ މޮޅު ކުޅުންތެރިޔާގެ މަގާމްވެސް ހޯދާފައެވެ.
މިމުބާރާތުގެ ޖޫނިއާ ކެޓަގަރީއިން އެންމެ ފާހަގަކޮށްލެވުނު ހަތަރު ކުޅުންތެރިންނަށް ހޮވިފައިވަނީ ސްޓާޒްގެ އެލީނާ ހުސައިން ސިނާންއާއި ނެޓް ނިންޖާސްގެ ސާރާ އަފްޒަލްއާއި ދަ ޕަވާ ޕަފްގެ ފާތިމަތު އަޔާނީ މިސްބާހުގެ އިތުރުން ނެޓް އެޓޭކާޒްގެ ލާނާ އާތިފްއެވެ.
ސީނިއާ ކެޓަގަރީއިން އެންމެ ފާހަގަކޮށްލެވުނު ހަތަރު ކުޅުންތެރިންގެ ތެރޭގައި ހިމެނިފައިވަނީ ހައި ފްލަޔާސްގެ އިންޝާ ބިންތި ޝިހާބްއާއި އެޓޭކާސްގެ އާމިނަތު އީލާފް ސޮބާހް، ފައިޓާސްގެ އަމްސާ ޢަބްދުﷲ ޙަނީފްގެ އިތުރުން ޝޫޓާޒްގެ ކަޔާނީ ބިންތި ޝަފްރާޒްއެވެ.
އޯޕަން ކެޓަގަރީވެސް ހިމަނައިގެން ކުރިއަށްދިޔަ މިމުބާރާތުގެ އޯޕަން ކެޓަގަރީއިން އެންމެ މޮޅަށް ކުޅެފައިވަނީ ފޯރ ދަ ވައިބްސްގެ އަލްމިރާ އަހުމަދު އަތީކް، ހަމަ އެޓީމުގެ އާމިނަތު ނަޒްހާން މުހަންމަދުއާއި އެފްއެސްސީ ޔުނިކޯންސްއިން ކަޔާނީ ބިންތި ޝަފްރާޒްގެ އިތުރުން ފާތިމަތު ޝާލިނީ އަހުމަދުއެވެ.
ރަމަޟާންމަހުގެ މުނާސަބަތާއި ގުޅުވައިގެން ކުރިއަށްގެންދިޔަ މިމުބާރާތުގައި ތިން ކެޓަގަރީއަކުން 20 ޓީމަކުން ވާދަކޮށްފަވެއެވެ. ފިއޯންތީ ސްޕޯޓްސް އެކަޑަމީގެ ފަރާތުން މިމުބާރާތް ބާއްވަމުން އަންނަތާ މިހާރު މިއީ ހަތަރު ވަނަ އަހަރެވެ.
މިފަދަ މުބާރާތެއް ބޭއްވުމުގެ މަގްސަދަކީ ނެޓްބޯޅައަށް ލޯބިކުރާ ޒުވާން ކުޅުންތެރިނަށް އުފާވެރި މަޖާ މާހައުލެއްގައި ވާދަކޮށް، ރަނގަޅު މެޗު ތަޖުރިބާތަކެއް ހޯދައިދިނުންކަމަށް ފިއޯންތީ ސްޕޯޓްސް އެކަޑަމީއިންވަނީ ބުނެފައެވެ. މިފަދަ މުބާރާތްތައް އިންތިޒާމުކުރުމުގެ ސަބަބުން ޒުވާން ކުޅުންތެރިންނަށް ދުޅަހެޔޮ ސިއްހަތެއްގައި ތިބުމަށް ބާރަކަށްވެގެންދާނެކަމަށާއި، މުބާރާތްތަކުގައި ވާދަކޮށް ކުޅިވަރުގެ ރޫހާއި އެއްގޮތަށް، ޓީމެއްގެ ގޮތުގައި މަސައްކަތްކުރުމަށް ދަސްވެގެންދާނެކަމަށް ފިއޯންތީ ސްޕޯޓްސް އެކަޑަމީއިން ބުނެއެވެ.