ޙައްޖު ކޯޕަރޭޝަންގެ ކްލިނިކްގެ ޚިދުމަތް ޙައްޖާއި އުމުރާއަށްދާ ހުރިހާ ދިވެހިންނަށް

ޙައްޖާއި ޢުމްރާވެރިންނަށް ޚާއްސަ މެޑިކަލް ކްލިނިކެއް މައްކާގައިވަނީ ޤާއިމުކޮށްފައެވެ. މިކްލިނިކަށް 2 އަހަރުވެގެންދާއިރު މިކްލިނިކާއެކު މައްކާގައި އުޅޭ ކޮންމެ ދިވެއްސަކަށްވެސް ޞިއްޙީ ފަރުވާ ލިބިގެންދެއެވެ.

ޙައްޖާއި ޢުމްރާއަށް ދާ ފަރާތްތަކަށް ޞިއްޙީގޮތުން އާންމުކޮށް މިދިމާވާ ކަންކަމަކީ ހުމާއި ރޯގާގެ އުނދަގޫތަކެވެ. މިފަދަކަންކަމުގައި އަވަސް ފިޔަވަޅުތަކެއް އެޅޭނެ އިންތިޒާމު ހަމަޖެހިފައި ހުރުމަކީ ބަލި ބޮޑުނުވެ އަވަހަށް ބަލިން އަރައިގަތުމަށް ކުރެވޭ މުހިއްމުކަމެކެވެ. ހަމައެއާއެކު ޚަރަދުގެ ގޮތުން ބަލާއިރުވެސް މިއީ އެހެން ޤައުމެއްގައި ދިވެހީންނަށް އުފުލަންޖެހިފައި އޮތް ބޮޑު ތަކުލީފެކެވެ. އެހެންކަމުން ޖެނެރަލް ކްލިނިކްތަކުން ފޯރުކޮށްދޭ ޚިދުމަތްތައް މައްކާގައި ދިވެހީންނަށް ފޯރުކޮށްދެވޭނެ އިންތިޒާމު މޯލްޑިވްސް ޙައްޖު ކޯޕަރޭޝަނުން މިވަނީ ޤާއިމުކޮށްފައެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން ޙައްޖު ކޯޕަރޭޝަންގެ ޑެޕިއުޓީ މެނޭޖިންގ ޑިރެކްޓަރ އަލްއުސްތާޛް ޢަލީ ޝަރީފް ވިދާޅުވީ، މިކްލިނިކްގެ ޚިދުމަތް މައްކާގައި ތިބޭ ކޮންމެ ދިވެއްސަކަށްވެސް ޙައްޖު ޢުމްރާގެ ދުވަސްވަރު ލިބޭނެކަމަށެވެ.

"މިކްލިނިކަކީ ސަޢުދީގެ ހެލްތު މިނިސްޓްރީ ޤަބޫލުކުރާ ސްޓޭންޑަޑްގެ ކްލިނިކެއް. މިކްލިނިކް ހިންގުމަށް ސަޢުދީގެ ނޭޝަނަލް ހޮސްޕިޓަލާއި ޙައްޖު ކޯޕަރޭޝަނާ ދެމެދުގައި އޮންނަނީ އެއްބަސްވުމެއް ޤާއިމުކޮށްފައި." ޑީއެމްޑީ ވިދާޅުވިއެވެ.

ދިވެހިންނަށް އަބަދުވެސް ރަނގަޅުވާނީ ދިވެހި ޑޮކްޓަރުންކަމަށްވުމުން ޙައްޖު ޢުމްރާއާއި ދިމާކޮށް މައްކާއަށް ދިއުމުގެ ފުރުސަތު ދިވެހި ޑޮކްޓަރުންނާއި ނަރުހުންނަށް އޮންނަނީ ހުޅުވާލާފައެވެ. ޙައްޖު ކޯޕަރޭޝަންގައި ޤާއިމުކުރެވިފައިވާ މެޑިކަލް ޕޫލްގައި ރަޖިސްޓްރީވުމުން ދިވެހި ޑޮކްޓަރުންނަށާއި ނަރުހުންނަށް މިދަތުރުތަކުގައި މައްކާއަށް ދިއުމުގެ ފުރުސަތު ފަހިވެފައިވާކަމަށް ޙައްޖު ކޯޕަރޭޝަނުން ވިދާޅުވެއެވެ.

"އަސްލު އޮންނަނީ ޙައްޖު ކޯޕަރޭޝަނުން ހޮސްޕިޓަލްތަކަށް ހުޅުވާލީމަ ހޮސްޕިޓަލުން ހޮވޭ ޑޮކްޓަރުން ނަރުހުން މިއަންނަނީ. ވަރަށް މާތް އަޅުކަމަކަށް އަންނަ ބޭފުޅުންނަށް ޚިދުމަތެކޭ އަޅުގަނޑަށް މިކޮށްދެވެނީއޭ އަޅުގަނޑު ޤަބޫލުކުރަނީ." ޑރ ސާލިމާ ވިދާޅުވިއެވެ.

މިއަހަރުގެ ރަމަޟާން މަހުގެ ޢުމްރާއަށް ދިޔަ ފަރާތްތަކުންވަނީ ކްލިނިކުން ލިބުނު ޚިދުމަތްތަކާ ބެހޭގޮތުން ޕީއެސްއެމްއާއި ޝުޢޫރު ހިއްސާކޮށްފައެވެ.

"ވަރަށް ރަނގަޅު ޚިދުމަތް، ރާއްޖެއާއި ބަލާފައިވެސް ބޭސްތައް އަގުހެޔޮކަމަށް ފެނޭ." ބަލި މީހަކު ބުންޏެވެ.

"ވަރަށް ބަރާބަރު މިކޮޅުގެ ޚިދުމަތްތައް." އެހެން ބަލި މީހަކު ބުންޏެވެ.

ޙައްޖު ކޯޕަރޭޝަނުން މައްކާގައި ޤާއިމުކުރެވިފައިވާ ކްލިނިކްގެ ޚިދުމަތް ޙައްޖު ކޯޕަރޭޝަންގެ ޙަވާލުގައި ޙައްޖާއި ޢުމްރާއަށް ދާ ފަރާތްތަކުގެ އިތުރުން ޙައްޖާއި ޢުމްރާ މޫސުމުގައި އެސަރަޙައްދުގައި އުޅޭ ދިވެހިންނަށް ލިބުމަކީ މިދަތުރުތަކުގައި ދާ ދިވެހިންނަށް ލިބޭނެ ބޮޑު ލުޔެއްކަން ޔަގީނެވެ.