ހަނިމާދުއާއި އިހަވަންދޫގައި އެފްއެސްއެމްގެ ފިއުލް ސްޓޭޝަންގެ ޚިދުމަތް ފަށައިފި

ހަނިމާދުއާއި އިހަވަންދޫގައި ފިއުލް ސަޕްލައި މޯލްޑިވެސްގެ ފިއުލް ސްޓޭޝަން ހަދާ ޚިދުމަތް ދޭން ފަށައިފިއެވެ.

މިއީ ރާއްޖޭގެ ހުރިހާ ހިސާބަކަށް ހެޔޮ އަގުގައި ތެޔޮ ލިބޭނެ އިންތިޒާމު ހަމަޖެއްސުމަށް ސަރުކާރުން އެސްޓީއޯއާއި އެފްއެސްއެމް ގުޅިގެން ކުރަމުންދާ މަސައްކަތެކެވެ.

2024ވަނަ އަހަރުގެ ނޮވެމްބަރުގައި އިފްތިތާޙުކުރި މި މަޝްރޫޢުގައި ރާއްޖޭގެ 18 ރަށެއްގައި ފިއުލް ސްކިޑް ހެދުމަށް އެސްޓީއޯއިން ވަނީ ނިންމާފައެވެ. މި ފިއުލް ސްކިޑްތަކަކީ މަސްވެރިންނަށާއި އާންމުރައްޔިތުންނަށް ހެޔޮ އަގެއްގައި ތެޔޮ ލިބޭނެ ގޮތް ހަމަޖައްސައިދިނުމަށް ސަރުކާރުން ފެށި މަސައްކަތެކެވެ.

އެގޮތުން އެންމެ ފުރަތަމަ ފިއުލް ސްކިޑް ހުޅުވާލަފަވަނީ މިދިޔަ ޑިސެމްބަރު މަހު ރ. ދުވާފަރުގައެވެ. އަދި ހ.އ އިހަވަންދުއާއި ހދ.ހަނިމާދޫގެ ފިއުލް ސްޓޭޝަންގެ މަސައްކަތް ނިންމާ މިހާރު މިވަނީ ޚިދުމަތް ދޭން ފަށާފައެވެ. މިއާއެކު ރަށުގައި ތިބެގެން އަގުހެޔޮކޮށް އާއްމު ރޭޓްތަކުގައި ތެޔޮ އެޅުމުގެ ޚިދުމަތް ލިބޭނެއެވެ. އަދި ރައްކާތެރިގޮތުގައި ޚިދުމަތް ދިނުމަށް މަގުފަހިވާނެއެވެ.

މަސްވެރިންނަށް ތެޔޮ ފޯރުކޮށްދިނުމަށް ހަދާ ފިއުލް ސްކިޑތަކުގެ މަސައްކަތަށްބަލާއިރު މުޅި މަސައްކަތުގެ %78 މަސައްކަތް މިހާރު ވަނީ ނިމިފައެވެ. ކުރިއަށް އޮތް 3 މަސް ދުވަހެއްހާ މުއްދަތުގެތެރޭގައި މުޅި މަޝްރޫޢު އެއްކޮށް ނިމޭނެކަމަށް އެސްޓީއޯއިން ވިދާޅުވެއެވެ.

އެފްއެސްގެ ޚިދުމަތް މާލޭގެ އިތުރުން މިހާރު ދެމުން އަންނަނީ އައްޑޫ ސިޓީ ގަން، ހުޅުމީދޫ، ފުވައްމުލަކު، ކޫއްޑޫ، ތިނަދޫ އަދި ފެލިވަރުގައެވެ.