އައިޓީބީ ބާލިން ފެއަރ ކާމިޔާބު ކަމާއެކު ނިންމާލައިފި!

ދުނިޔޭގެ ފަތުރުވެރިކަމުގެ ދާއިރާގައި ބާއްވާ އެންމެ ބޮޑު އެއް ފެއަރ ކަމަށްވާ އައިޓީބީ ބާލިން 2026 ނިންމާލައިފިއެވެ. މި ފެއަރގައި މިއަހަރުވެސް ދިވެހިރާއްޖެއިން ބައިވެރިވެ، ރާއްޖެ އިޝްތިހާރުކުރުމުގެ މަސައްކަތްތައް ވީޒިޓް މޯލްޑިވްސް ކޯރޕަރޭޝަން، ވީއެމްސީން ވަނީ ކުރިއަށްގެންގޮސްފައެވެ.

މިއަހަރުގެ ފެއަރަަގައި ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ 67 ކުންފުންޏަކުން ޖުމްލަ 159 މަންދޫބުން ބައިވެރިވެފައިވެއެވެ.

ފެއަރގެ ތެރޭގައި ތަފާތު އެކި ހަރަކާތްތައް ވަނީ ކުރިއަށްގެންގޮސްފައެވެ. މީގެ ތެރެއިން އެންމެ ފާހަގަކޮށްލެވުނު އެއް ހަރަކާތަކީ އަންނަ އަހަރުގެ އައިޓީ ބާލިން ފެއަރ ރާއްޖެއިން ހޯސްޓުކުރުމާއި ގުޅޭ އެއްބަސްވުމުގައި ރަސްމީކޮށް ސޮއިކުރުމެވެ.

މިއަހަރުގެ ފެއަރގެ ހަވާސާގެ ތެރެއިން މުހިންމު ދެ ހަރަކާތެއް ވަނީ ކުރިއަށްގެންގޮސްފައެވެ. އޭގެ ތެރޭގައި ނޫސްވެރިންގެ ބައްދަލުވުމަކާއި، ރިޓްސް ކާރލްޓަން ބާލިންގައި ބޭއްވުނު 'މޯލްޑިވިއަން ނައިޓް' ހިމެނެއެވެ. މި ހަރަކާތުގައި ބައިނަލްއަގުވާމީ މީޑިއާތަކާއި ރާއްޖޭގެ ފަތުރުވެރިކަމުގެ ދާއިރާގެ އިސް ފަރާތްތަކުން ބައިވެރިވެ، ރާއްޖޭގެ ފަތުރުވެރިކަމާ ގުޅޭ މުހިންމު މައުލޫމާތުތައް ހިއްސާކޮށްފައިވެއެވެ.

މިއަހަރުގެ ފެއަރގައި ރާއްޖެއިން ވަނީ 504 އަކަމީޓަރުގެ ބޮޑު ސްޓޭންޑެއް ތައްޔާރުކޮށްފައެވެ. މިއީ އައިޓީބީ ބާލިންގައި ރާއްޖެއިން މިހާތަނަށް ބައިވެރިވި ހުރިހާ ފަހަރަކާ އަޅާބަލާއިރު ތައްޔާރުކުރި އެންމެ ބޮޑު ސްޓޭންޑެވެ. ސަފާރީއެއްގެ ސިފަ ޖެހޭ ގޮތަށް ފަރުމާކޮށްފައިވާ މި ޑަބަލް ޑެކް ސްޓޭންޑަށް ޒިޔާރަތްކުރި ފަރާތްތަކަށް ރާއްޖޭގެ ކަނޑުމަތީގެ ދަތުރުފަތުރުގެ ތަޖުރިބާ ކޮށްލުމުގެ ފުރުސަތު ލިބިގެންދިޔަ ކަމަށް ވީއެމްސީން ފާހަގަކުރެއެވެ.

ރާއްޖޭގެ ސްޓޭންޑުގައި ބޭއްވުނު ބީ2ބީ ބައްދަލުވުންތަކަށް ވަނީ ބޮޑު ތަރުހީބެއް ލިބިފައެވެ. ސްޓޭންޑުގެ ދެ ފަންގިފިލާގައިވެސް މި ބައްދަލުވުންތައް ބޭއްވޭނެ އިންތިޒާމު ހަމަޖައްސާފައިވާއިރު، މީގެ ސަބަބުން ރާއްޖޭގެ ފަތުރުވެރިކަމުގެ ސިނާއަތް ފައިދާހުރިގޮތެއްގައި ކުރިއެރުވުމަށް ބޮޑު ހިތްވަރެއް ލިބިގެންދާނެ ކަމަށް ވީއެމްސީން ވިދާޅުވެއެވެ.

ފެއަރ ނިންމާލުމަށްފަހު ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ވިޒިޓް މޯލްޑިވްސް ކޯޕަރޭޝަންގެ މެނޭޖިންގ ޑިރެކްޓަރ އިބްރާހިމް ޝީއުރީ ވިދާޅުވީ، ދިމާވި އުނދަގޫތަކާއެކުވެސް މިއަހަރުގެ އައިޓީ ފެއަރ ވަރަށް ކާމިޔާބު ކަމަށެވެ.

"މި ފެއަރ ހަމަ އެއް އަހަރަށްވުރެ އަނެއް އަހަރު ތަރައްޤީވަމުން މި ދަނީ. މީގަ ހަމަ ރާއްޖޭގެ ނަން ކިޔާ ހަމަ ބޮޑެތި ރިސޯޓުތަކުން ބައިވެރިވި. އެމީހުންނަށްވެސް އެކިއެކި ބައިވެރިންނާ ބައްދަލުވެ، މަޝްވަރާކުރެވި އެކިއެކި ޓްރާންސްސެކްޝާންތަކެއް ހެދިގެންދިޔަ. އެމީހުންގެ އައު ޕްރޮޑަކްޓައް ދައްކާލާ އިޝްތިހާރުކުރުމުގެ މަސައްކަތް ހަމަ ވަރަށް ކާމިޔާބުކަމާއެކު ކުރިއަށްގެންދިޔަ. ވަރަށް ކާމިޔާބު ވަރަށް ސަކްސެސްފުލް އިވެންޓެެއް." އެމްޑީ ޝިއުރީ ވިދާޅުވިއެވެ.

އައިޓީބީ ބާލިންއަކީ 1966 ވަނަ އަހަރުން ފެށިގެން މެދުނުކެނޑި ބާއްވަމުން އަންނަ، ދުނިޔޭގެ ފަތުރުވެރިކަމުގެ އެންމެ ނުފޫޒުގަދަ ޓްރޭޑް ފެއަރއެވެ. މިމަހުގެ 3އިން 5އާ ހަމައަށް ކުރިއަށްދިޔަ މި ފެއަރ ނިންމާލިއިރު، މިއީ ރާއްޖޭގެ ފަތުރުވެރިކަން ދުނިޔޭގެ ބާޒާރުގައި އިތުރަށް ވަރުގަދަކޮށް، އާ މާކެޓްތަކަށް ވާސިލުވުމަށް ލިބުނު ވަރަށް ރަނގަޅު ފުރުސަތެއް ކަމަށް ވީއެމްސީން ގަބޫލުކުރެއެވެ.