އުމްރާއަށް ފުރޭނެ އިންތިޒާމްތައް ހަމަޖެއްސެވުމަށް ރައީސް އަންގަވައިފި
-
ފްލައިޓްތައް ކެންސަލްވީ މެދުއިރުމަތީގައި ހިނގަމުންދާ ހަނގުރާމައާ ގުޅިގެން
-
150 މީހުން ނުފުރިފައި އެބަތިބި
-
ފުރޭނެ އިންތިޒާމްތައް ހަމަޖައްސަން ސަރުކާރުން ދަނީ މަސައްކަތްކުރަމުން
ރާއްޖެއިން އުމްރާއަށްދާ މީހުންގެ ތެރައިން އެކި ސަބަބުތަކާ ހުރެ އުމްރާއަށް ނުފުރިފައި ތިބި މީހުން ފުރޭނެ އިންތިޒާމުތައް ހަމަޖައްސަވަމުންދާކަަމަށް އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ އެކި ކުންފުނިތަކުން އުމްރާއަށް ދިއުމަށް ހަމަޖެހިފައިވާ މީހުންގެ ތެރެއިން ނުފުރިފައި ތިބި މީހުންނާއި، ޓްރާންސިޓް ޕްލައިޓްތައް ކެންސަލްވުމުން ނުފުރިފައި ތިބި މީހުން ޢުމްރާއަށް ފުރޭނެ ގޮތެއް ހޯދުމަށް ރައީސުލްޖުމުހޫރިއްޔާ އިރުޝާދު ދެއްވާފައިވާކަމަށެވެ. އަދި އެ މަސައްކަތް މިހާރު ކުރަމުންދާކަމަށްވެސް ވަޒީރު ވިދާޅުވިއެވެ. އެގޮތުން އެ ވުޒާރާއާއި މޯލްޑިވްސް ޙައްޖު ކޯޕަރޭޝަނާއި މޯލްޑިވިއަން ގުޅިގެން މަސައްކަތް ކުރަމުންދާކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ މިވަގުތާއި ހަމައަށް 150 މީހުން ފުރަން ބޭނުންވެފައި ތިބިކަން ވަނީ ފާހަގަކުރެވިފައިވާކަމަށެވެ. އަދި ފްލައިޓް ޗާޓަރު ކުރެވޭނެ ގޮތް ވެއްޖެނަމަ ޖާގަ ހުރި މިންވަރަކުން އިތުރު މީހުންނަށް ފުރުސަތު ދެއްވާނެކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ވަގުތު ނެތުމާއެކު މިކަމުގައި ހުރި ދަތިތައް ޙައްލުވޭތޯ މަސައްކަތްކުރަމުންދާކަަށެވެ.
މެދުއިރުމަތީގައި ހިނގަމުންދާ ހަނގުރާމައާ ގުޅިގެން ގިނަ ފްލައިޓްތަކެއް ވަނީ ކެންސަލްވެފައެވެ. އެގޮތުން އުމްރާގެ އަޅުކަމަށް މީހުން ގެންދިއުމަށް ހަމަޖެހިފައިވާ ފްލައިޓްތަކުގެ ދަތުރުތަކަށްވެސް ވަނީ ބުރޫ އަރާފައެވެ.
މީގެއިތުރުން އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ނުގެންދިޔަ މައްސަލައެއް ދާދިފަހުން ވަނީ ފެންމަތިވެފައެވެ. މިކަމާއި ގުޅިގެން ގިނަބަޔަކު ވަނީ ހައްޖު ކޯޕަރޭޝަންގެ ހަވާލުގައި އުމްރާއަށް ދިއުމަށް އެދިފައެވެ. އެގޮތުން އެ ކޯޕަރޭޝަންގައި ޖާގަ އޮތް މިންވަރުން އޭގެ ތެރެއިން 28 މީހުންނަށް ވިސާ ޖަހައި މައްކާ އާއި މަދީނާއިން އެކޮމޮޑޭޝަނާއި ކެއިންބުއިމާއި ދަތުރުފަތުރުގެ އެންމެހާ އިންތިޒާމުތައް ވަނީ ހަމަޖައްސަވާފައެވެ.