ޢިރާޤުގައި ތިބި އިޓަލީގެ އިސްތިޢުމާރީ ސިފައިން އެ ޤައުމުން ފައިބައި، އެ ޤައުމުގައި ހިންގި 12 އަހަރުވީ އަސްކަރީ އޮޕަރޭޝަން ނިންމާލައިފިއެވެ. އިޓަލީގެ ދިފާޢީ ވުޒާރާއިން ނެރުނު ބަޔާނެއްގައި ބުނީ، މިއާއެކު އިޓަލީގެ ސިފައިން ޢިރާޤުގައި ހިންގަމުންދިޔަ އަސްކަރީ އޮޕަރޭޝަން ނިމުމަކަށް އައިސްފައިވާ ކަމުގައެވެ. އެ ޤައުމުގެ ދިފާޢީ ވަޒީރު ގުއިދޯ ކްރޮސެއްތޯ ވިދާޅުވީ، މި ގޮތަށް ސިފައިން ބޭލުމަކީ ޢިރާޤުގެ އަމިއްލަ ސަލާމަތީ ޒިންމާ ފުރިހަމައަށް އުފުލުމަށް އެޅުނު މުހިންމު ބަދަލެއް ކަމުގައެވެ.
ޢިރާޤުގެ ކުރުދިސްތާން ސަރަޙައްދުގައި އިޓަލީގެ ސިފައިން ތިބޭ އަސްކަރީ މަރުކަޒަކަށް އަމާޒުކޮށް މާރިޗު މަހުގެ ތެރޭގައި ހަމަލާތަކެއް ދިނުމާ ގުޅިގެން، އިޓަލީގެ ސަރުކާރުން ވަނީ ޢިރާޤުގައި ތިބި އެ ޤައުމުގެ ގިނަ ޢަދަދެއްގެ އިސްތިޢުމާރީ ސިފައިން އަނބުރާ ގެންގޮސްފައެވެ. ބާކީ ތިބީ، ހުޅަނގުގެ ދިފާޢީ އިއްތިޙާދުން (ނޭޓޯ) ޢިރާޤުގައި ހިންގާ އޮޕަރޭޝަންތަކުގައި ބައިވެރިވާ ސިފައިންނެވެ. ނަމަވެސް، އެ ސިފައިން ވެސް ސެޕްޓެންބަރު 30 ގެ ކުރިން ޢިރާޤުން ބޭލުމަށް އިޓަލީން ވަނީ އެއްބަސްވެފައިވާ ކަމަށް އެ ޤައުމުގެ ދިފާޢީ ވުޒާރާއިން ބުންޏެވެ.
ޢިރާޤުގައި ތިބި އިޓަލީގެ ސިފައިން ހަރަކާތްތެރިވެފައި ވަނީ ނިރުބަވެރި ޖަމާޢަތް، އައިއެސްއާ ދެކޮޅަށް ކުރި ހަނގުރާމައާއި އަސްކަރީ އޮޕަރޭޝަންތަކުގައެވެ. އެމެރިކާއިން އިސްވެ ހިންގި 'އޮޕަރޭޝަން އިންހެރެންޓް ރިޒޯލްވް' ގައި އިޓަލީގެ ފައުޖުތަކުން އިސް ދައުރެއް އަދާކުރިއެވެ. މީގެ އިތުރުން، ނޭޓޯއިން ހިންގާ 'ނޭޓޯ މިޝަން ޢިރާޤު' ގައި ވެސް އިޓަލީގެ ސިފައިން ދަނީ ޢަމަލީ ގޮތުން ބައިވެރިވަމުންނެވެ. އެ އޮޕަރޭޝަނަކީ، އަސްކަރީ ލަފާދިނުމާއި ޢިރާޤުގެ އަސްކަރިއްޔާގެ ޤާބިލުކަން އިތުރުކުރުމަށް ހިންގާ އޮޕަރޭޝަނެކެވެ.
އިޓަލީގެ ސިފައިން ޢިރާޤުން ފޭބި ނަމަވެސް، އިޓަލީގެ ހަތިޔާރުއެޅި ފުލުހުންގެ ފައުޖުގެ ދެ އޮފިސަރުން ޢިރާޤުގައި ދެމިތިބޭނެ ކަމުގައި އެ ޤައުމުގެ ދިފާޢީ ވުޒާރާއިން ބުންޏެވެ. އަދި، 'އީޔޫއޭއެމް ޢިރާޤު' މިޝަންގައި ބައިވެރިވަމުންދާނެ ކަމުގައި ވެސް އެ ވުޒާރާއިން ހާމަކުރިއެވެ. މި މިޝަނަކީ ޢިރާޤު ސަރުކާރުގެ ފުރިހަމަ ރުހުމާއި ހުއްދައާއެކު ހިންގަމުންދާ އޮޕަރޭޝަނެއް ކަމުގައި ވެސް އެ ވުޒާރާއިން ބުންޏެވެ.