ފައިސާ ނެގުމަށްފަހު އުމްރާއަށް ނުގެންދިޔަ 28 މީހުން ޙައްޖު ކޯޕަރޭޝަނުން ޢުމްރާއަށް ގެންގޮސްފި

އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ގެންގޮސްފައިނުވާތީ ޙައްޖު ކޯޕަރޭޝަންގެ ހަވާލުގައި އޭގެ ތެރެއިން 28 މީހަކު ޢުމްރާއަށް ފޮނުވައިފިއެވެ.

އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ގެންގޮސްފައިނުވާ މައްސަލައެއް ދާދިފަހުން ވަނީ ފެންމަތިވެފައެވެ. މިކަމާ ގުޅޭގޮތުން ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވީ މިއަހަރުގެ ރަމަޟާން މަހު ޢުމްރާގެ އަޅުކަމަށް ގެންދާނެ ކަމަށް ބުނެ އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު ޢުމްރާގެ އިންތިޒާމުތައް ހަމަޖައްސާފައި ނުވާތީ އިއްޔެ ހަވީރުގެ ވަގުތެއްގައި އޭގެ ތެރެއިން ގިނަ ބަޔަކު އެ ކޯޕަރޭޝަންގެ ހަވާލުގައި އުމްރާއަށް ދިއުމަށް އެދުނުކަމަށެވެ.

އަދި އެ ކޯޕަރޭޝަންގައި ޖާގަ އޮތް މިންވަރުން 28 މީހުންނަށް ވިސާ ޖަހައި މައްކާ އާއި މަދީނާއިން އެކޮމޮޑޭޝަނާއި ކެއިންބުއިމާއި ދަތުރުފަތުރުގެ އެންމެހާ އިންތިޒާމުތައް ހަމަޖައްސާފައިވާކަމަށެވެ. އެ 28 މީހުން މިއަދު ހެނދުނު މޯލްޑިވިއަންގެ ފްލައިޓަކުން ސައުދީ ޢަރަބިއްޔާއަށް ޢުމްރާގެ އަޅުކަމަށް ފުރާފައިވާކަމަށް ޝަކީލް ވިދާޅުވިއެވެ.

މި އަހަރުގެ ބަރަކާތްތެރި رَمَضَان މަހު ޢުމްރާގެ އަޅުކަމަށް ގެންދާނެ ކަމަށް ބުނެ އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު ޢުމްރާގެ އިންތިޒާމުތައް ހަމަޖައްސާފައި ނުވާތީ އިއްޔެ ހަވީރުގެ ވަގުތެއްގައި މީގެ ތެރެއިން ގިނަ ބައެއްގެ އެދިލެއްވުމުގެމަތިން…

— Mohamed Shakeel 🇲🇻 (@schakyyl) March 4, 2026

ޙައްޖު ކޯޕަރޭޝަނުން މީގެ ކުރިންވެސް ވަނީ އެހެން ގުރޫޕްތަކުގައި އުމްރާގެ އަޅުކަމަށް ގޮސް ރާއްޖެ ނާދެވި ތާށިވުމުން އެމީހުންނަށް ދިމާވި ދަތިތަކަށްވެސް ހައްލުގެނެސްދީފައެވެ.

މިއަހަރުގެ ރަމަޟާންމަހު ޙައްޖު ކޯޕަރޭޝަންގެ ހަވާލުގައި 553 މީހަކު ޢުމްރާގެ އަޅުކަމަށް މިހާރު ތިބީ ސަޢުދީ އަރަބިއްޔާގައެވެ. އަދި މިއަދު ފުރި 28 މީހުންނާއެކު ޖުމުލަ 581 މީހަކު ޙައްޖު ކޯޕަރޭޝަންގެ ހަވާލުގައި އުމްރާގެ އަޅުކަން އަދާކުރުމަށް ވަނީ ގޮސްފައެވެ.