ފަހުދިހައިގެ 4 ދުވަހެއްގައި އައިޑިކާޑު ދޫކުރުމުގެ ޚިދުމަތް ދޭނެ
-
ޚިދުމަތް ދޭނީ މާރިޗު މަހުގެ 17،15،11 އަދި 19
-
ހެނދުނު 09:00އިން މެންދުރު 13:00އަށް ޚިދުމަތް ދޭނެ
-
އިމަރޖެންސީ ހާލަތްތަކުގައި 7280368 އަށް ގުޅުމުން ޚިދުމަތް ލިބޭނެ
ރަމަޟާން މަހު ފަހުދިހައިގައި ދިވެހި ރައްޔިތެއްކަން އަންގައިދޭ ކާޑު ދޫކުރުމުގެ ޚިދުމަތް 4 ދުވަހެއްގައި ދޭނެ ކަމަށް ޑިޕާޓްމަންޓް އޮފް ނޭޝަނަލް ރަޖިސްޓްރޭޝަނުން ވިދާޅުވެއްޖެއެވެ.
ޑިޕާޓްމަންޓް އޮފް ނޭޝަނަލް ރަޖިސްޓްރޭޝަން، ޑީއެންއާރުން ވިދާޅުވީ ރަމަޟާން މަހުގެ ފަހު ދިހައެއްގައި، ދިވެހި ރައްޔިތެއްކަން އަންގައިދޭ ކާޑު ދޫކުރުމުގެ ޚިދުމަތް ދިނުމަށް ވަކި ގަޑިތަކަކާއި ދުވަސްތަކެއް ހަމަޖައްސާފައިވާ ކަމަށެވެ. މި ޚިދުމަތް ދޭ ދުވަސްތަކަކީ، މާރިޗު މަހުގެ 11، 15، 17 އަދި 19 ވަނަ ދުވަހެވެ. މި 4 ދުވަހު ޚިދުމަތް ދޭން ހަމަޖެހިފައިވަނީ، ހެނދުނު 09:00 އިން މެންދުރުފަހު 13:00 އަށް ކަމަށް ޑީއެންއާރުން ވިދާޅުވިއެވެ.
މީގެ އިތުރުން، މި ޚިދުމަތް ދިނުމަށް ވަކި އޮފީސްތަކެއް ހަމަޖެހިފައިވާ ކަމަށްވެސް އެ އިދާރާއިން ވިދާޅުވިއެވެ. މާލޭގައި ޚިދުމަތް ލިބޭނީ، ޑީއެންއާރު ހެޑް އޮފީހުންނެވެ. މީގެ އިތުރުން ހުޅުމާލެ ފިޔަވަހި 1ގައި ހުންނަ އުމަރު ޒާހިރު ބިލްޑިންގއިން ޚިދުމަތް ލިބޭނެ ކަމަށާއި، ހުޅުމާލެ ފިޔަވަހި 2ގައި އުޅޭ މީހުންނަށް ވިނަރެސް ޓަވަރ 2 އިން މި ޚިދުމަތް ލިބޭނެ ކަމަށް ވިދާޅުވިއެވެ. ހަމައެއާއެކު، ވިލިމާލޭގައި ހުންނަ ޑީއެންއާރު ވިލިމާލެ އޮފީހުންވެސް މި ދުވަސްތަކުގައި ޚިދުމަތް ލިބޭނެ ކަމަށްވެސް އެ އިދާރާއިން ވިދާޅުވިއެވެ.
މީގެއިތުރުން އިމަރޖެންސީ ހާލަތްތަކުގައި ޑީއެންއާރ ޑީޕާޓްމަންޓުގެ ނަންބަރު، 7280368 އަށް ގުޅުމުން ޚިދުމަތް ލިބޭނެ ކަމަށްވެސް އެ އިދާރާއިން ވިދާޅުވެއެވެ.