ޗެލްސީގެ ކުޅުންތެރިންގެ އަޚުލާގީ ގިނަ މައްސަލަތަކެއް އެބަ ހުރި ކަމަށާއި މަތީ ފަންތީގެ ފުޓުބޯޅައިގައި ކުރިއަށް ދާން ބޭނުންނަމަ އެކަން ރަނގަޅުކުރަންޖެހޭކަމަށް އެ ޓީމުގެ ކޯޗު ލިއަމް ރޮޒީނިއާ ބުނެފިއެވެ.
ލީގުގައި އާސެނަލް އަތުން ޗެލްސީ 1-2 ގެ ނަތީޖާއަކުން ބަލިވި މެޗަށްފަހު ވާހަކަދައްކަމުން ރޮޒީނިއާ ބުނީ، ކުޅުންތެރިންގެ އަޚުލާގެއް ނެތުމުގެ ސަބަބުން ވަރަށް ދެރަ ގޮތްގޮތް ޓީމަށް ކުރިމަތިވަމުންދާ ކަމަށެވެ. އަދި މިހާރު ކުލަބު އޮތް ހާލަތުން އަރައިގަތުމަށް ކުރަމުން އަންނަ މަސައްކަތުގައި، މިފަދަ ކަންކަން ރަނގަޅުނުކުރާ ކުޅުންތެރިންނަށް ފުރުސަތު ނޯންނާނެކަމަށް ބުނެ އޭނާ ވަނީ ވަރުގަދަ އިންޒާރެއް ދީފައެވެ.
ޓީމުގައި އަޚުލާގީ މައްސަލަތަކެއް އުޅޭކަމަށް ބުނެ އެކަމުގެ ކަންބޮޑުވުން ރޮޒީނިއާ ފާޅުކުރިއިރު، އާސެނަލް މެޗުގައި ވެސް ޗެލްސީގެ ޕެޑްރޯ ނެޓޯ އަށް ވަނީ ރަތްކާޑެއް ދައްކާފައެވެ. ލިއަމް ރޮޒީނިއާގެ އިންޒާރެއް އައިސްފައި މިވަނީ ދެއްކި ރަތްކާޑާ ގުޅިގެން ޕެޑްރޯ ނެޓޯ މައާފަށް އެދި މެސެޖެއް ވެސް އަާންމުކޮށްފައިވާ ދަނޑިވަޅެއްގައެވެ.
އާސެނަލް އާ ދެކޮޅަސް ކުޅުނު މެޗުގެ 70 ވަނަ މިނެޓުގައި ޕެޑްރޯ ނެޓޯއަށް ރަތްކާޑު ދެއްކިއިރު މިއީ މި ސީޒަނުގައި ޗެލްސީގެ ކުޅުންތެރިއަކަށް ރަތްކާޑު ދެއްކި 9 ވަނަ ފަހަރުކަން ފާހަގަކޮށްލެވެއެވެ.
ލީގުގައި ޗެލްސީ މިވަގުތު އޮތީ ތާވަލުގެ ހަވަނައިގައެވެ. އެއީ ކުޅުނު 28 މެޗުން 45 ޕޮއިންޓާއެކުއެވެ.