ޢުމްރާއަށް ދާ ފަރާތްތަކަށް ޚާއްޞަ ކޮށްގެން ހޮޓްލައިން ނަންބަރެއް

މެދުއިރުމަތީގައި ފަށާފައިވާ ހަނގުރާމައާ ގުޅިގެން ޢުމްރާއަށް ދާ ފަރާތްތަކަށް ޚާއްޞަ ކޮށްގެން އިސްލާމީ ކަންތައްތަކާ ބެހޭ ވުޒާރާއިން ހޮޓްލައިނެއް ޤާއިމްކޮށްފިއެވެ.

މެދުއިރުމަތީގައި މިހާރު ފަށާފައިވާ ހަނގުރާމައާ ގުޅިގެން ރާއްޖެއިން އުމްރާއަށް ދާ ފަރާތްތަކާއި، މިހާރު މައްކާގައި ތިބި އުމްރާވެރިން ދަތުރުފަތުރުގެ ކަންކަމުގައި އިތުރަށް ސަމާލުވުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ އިލްތިމާސް ކުރައްވާފައެވެ. އަދި އެ ވުޒާރާއިން ވަނީ، ޚާއްޞަ ހޮޓްލައިން ނަންބަރެއްވެސް ޤާއިމްކޮށްފައެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، ޚާއްޞަ ހޮޓްލައިންއެއް ޤާއިމްކޮށްފައިވަނީ އުމްރާގެ އަޅުކަން އަދާކުރުމަށް މިހާރު މައްކާގައި ތިބި އެންމެހާ ފަރާތްތަކުން، އެފަރާތްތަކަށް ދިމާވާ ޚާއްސަ ހާލަތްތަކާ ގުޅިގެން މަޢުލޫމާތު ހިއްސާ ކުރުމަށް ކަމަށެވެ.

• ހޮޓްލައިން ނަންބަރު: 3007070
• ރާއްޖެއިން ބޭރަށް ގުޅާނަމަ 3007070(960)+

އިސްލާމީ ކަންތައްތަކާ ބެހޭ ވުޒާރާއިން ވަނީ، އުމްރާ ދަތުރުތަކާ ގުޅޭ އެންމެފަހުގެ މައުލޫމާތު ހޯދުމަށާއި، ސަޢުދީ ސަރުކާރުން ދޭ އިރުޝާދުތަކަށް ފުރިހަމައަށް ބޯލެނބުމަށް ނަސޭހަތްތެރިވެފައެވެ.

މީގެއިތުރުން މިވަގުތު މައްކާގައި ތިބި އުމްރާވެރިންގެ ހާލަތު ވަރަށް ގާތުން ބަލަމުންދާ ކަމަށްވެސް އެ ވުޒާރާއިން ވިދާޅުވިއެެވެ.

މި ރަމަޟާން މަހު 20 އުމްރާ ކުންފުންޏެއްގެ ޙަވާލުގައި 1,624 މީހުން އުމްރާއަށް ދިޔުމަށް ވަނީ ހަމަޖެހިފައެވެ. މީގެ އިތުރުން މޯލްޑިވްސް ޙައްޖު ކޯޕަރޭޝަންގެ ޙަވާލުގައި 530 މީހުން އުމްރާއަށް ވަނީ ގޮސްފައެވެ.