ރަތްމަންދޫ ރައްޔިތުން ތުލުސްދާއަށް، ބިން ހަމަޖައްސައިފި

މ.ރަތްމަންދޫ ރައްޔިތުން ތުލުދޫއަށް ހިޖުރަ ކުރުމަށް، އެކަމަށް ބޭނުންވާ ބިން އެރަށު ކައުންސިލުން ހަމަޖައްސައިދީފައިވާތީ، އެކަން ރަތްމަންދޫ ކައުންސިލަށް އަންގާފައިވާ ކަމަށް އިމާރާތް ކުރުމާއި ގެދޮރުވެރިކަމާ ބިނަރާ ބެހޭ ވުޒާރާއިން ވިދާޅުވެއްޖެއެވެ.

މުލަކަތޮޅު ރަތްމަންދޫގެ ރައްޔިތުން އެހެން ރަަށަކަށް ހިޖުރަކުރަން ނިންމައިފިނަމަ، ގެދޮރު ބިނާކުރަން ފަށާތާ 1 އަހަރު ދުވަހުގެ ތެރޭގައި ރަތްމަންދޫ ރައްޔިތުން އެހެން ރަށަކަށް ބަދަލު ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ، މިދިޔަ އަހަރުގެ ސެޕްޓެމްބަރު މަހު އެރަށަށް ވަޑައިގެން ރައްޔިތުންނާއެކު ބޭއްވެވި ބައްދަލު ކުރެއްވުމުގައެވެ.

ރައީސް ވިދާޅުވެފައިވަނީ، މާލެ ކައިރި ރަށަކަށް ދިރިއުޅުން ބަދަލު ކުރުމުގެ ފުރުޞަތު ދޭނެ ކަމަށެވެ. ޚިދުމަތްތައް ފުރިހަމަ ރަށަކަށް ދިރިއުޅުން ބަދަލުކުރުމަށް ރަތްމަންދޫގެ ބޮޑު އާބާދިއެއް ބޭނުންވެއެވެ.

އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ވިދާޅުވީ، ރަތްމަންދޫ ރައްޔިތުން ބަދަލު ކުރުމަށް ނިންމާފަވަނީ ކ.އަތޮޅު ތުލުސްދޫއަށް ކަމަށެވެ.

އެގޮތުން ރަތްމަންދޫ ރައްޔިތުން ތުލުސްދޫއަށް ބަދަލު ކުރުމުގެ މަސައްކަތް ކުރިއަށް ގެންދިއުމަށްޓަކައި ކ.ތުލުސްދޫގައި އާބާދުވުމަށް ބޭނުންވާ 44 ގޯތި ހަމަޖައްސައި، އެކަން ތުލުސްދޫ ކައުންސިލުން ވުޒާރާއަށް އަންގާފައިވާ ކަމަށް ވިދާޅުވިއެވެ.

އެހެންކަމުން މި މަޝްރޫޢު ކުރިއަށް ގެންދިއުމަށްޓަކާ ކުރަންޖެހޭ މަސައްކަތްތައް ވުޒާރާއިން މިހާރު ފަށާފައިވާކަން މ.ރަތްމަންދޫ ކައުންސިލަށް، ވުޒާރާގެ ފަރާތުން ރަސްމީކޮށް މިވަނީ އަންގާފައެވެ.

އެއްފަސްކުރުމުގެ މަސައްކަތުގެ ދަށުން، ރައީސުލްޖުމްހޫރިއްޔާގެ ތަޞައްވުރަކީ ރަށުގައި ރަޖިސްޓަރކޮށްފައިވާ ކޮންމެ ގެއަކަށް، ބަދަލުވާ ރަށުގައި 3 ކޮޓަރީގެ ގެއެއް އަޅައިދިނުމެވެ. އަދި މިގޮތަށް ހިޖުރަކުރާ އާއިލާތަކަށް މިހާރު ދެމުންދާ 50،000ގެ އިނާޔަތް ރިވައިޒްކޮށް އަދަދު ބޮޑުކުރައްވާނެ ކަމަށް ވިދާޅުވެފައިވެއެވެ.

ކުދި އަދި ވަސީލަތްތައް މަދު އާބާދީތައް އެއްފަސްކުރުމުގެ ބޭނުމަކީ ސިއްޙީ، ތަޢުލީމީ، އަސާސީ ޚިދުމަތްތައް އަދި ޢުމްރާނީ ގޮތުން ކުރިއަރާފައިވާ ތަނަކަށް ދިރިއުޅުން ބަދަލު ކުރުމުގެ ފުރުޞަތު ރައްޔިތުންނަށް ދިނުމެވެ.

މިގޮތުން ދިރިއުޅުން އެހެން ރަށަކަށް ބަދަލު ކުރުމަށް ނިންމައި، ގެތައް އެޅުމުގެ މަސައްކަތްތައް ފަށާތާ 1 އަހަރުގެ ތެރޭގައި މަސައްކަތް ނިންމާ ހިޖުރަ ކުރެވޭ ވަރަށް މަސައްކަތްތައް ނިންމާނެ ކަމަށް ވިދާޅުވެފައިވެއެވެ.

ރަތްމަންދޫގެ އާބާދީއަކީ، 240 ނަމަވެސް ރަށުގައި އުޅެނީ 80 ވަރަކަށް މީހުންނެވެ. އަދި މި މީހުންގެ ތެރެއިންވެސް %34 މީހުންގެ އަމިއްލަ ބޯހިޔާވަހިކަމެއް ނެތެވެ. އަދި ރަށުގައި އަސާސީ ޚިދުމަތްތައްވެސް އެންމެ އެކަށީގެންވާ ގޮތުގައި ލިބެމުން އައިސްފައެއް ނުވެއެވެ.