"މޮރިޝަސް އިން ގުޅުން ކަނޑާލިޔަސް، ފޯޅަވެހިގެ ހައްޤުވެރި ފަރާތަކީ ރާއްޖެ"

ފޯޅަވައްސަކީ ތާރީޚީ ގޮތުން ބަލާއިރު އެތަށް ގޮތަކުން ރާއްޖެއާ ގުޅިފައިވާ ތަނެއް ކަމަށާއި، އެތަނުގެ ޙައްޤުވެރި ފަރާތާ އެތަން ޙަވާލުކުރަންޏާ، ރާއްޖެ އަށްވުރެ ޙައްޤުކަން ބޮޑު ބައެއް ނެތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އަދުގެ ސަރުކާރުން ފޯޅަވަހީގެ ސިޔާދަތީ ބާރު ރާއްޖެއަށް ހޯދުމަށް ކުރަމުންދާ މަސައްކަތްތަކުގެ ތަފްސީލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ 3 ވަނަ ރިޔާސީ ބަޔާނުގައި ވަނީ ހާމަކުރައްވާފައެވެ. އިނގިރޭސިވިލާތާއެކު މަޝްވަރާތައް ކުރެވި، ކުރީ ސަރުކާރުގެ ނިންމުން ޤަބޫލު ނުކުރައްވާ ކަމަށާއި، ކުރީ ސަރުކާރުން މޮރިޝަސްއަށް ފޮނުވި ސިޓީ އަނބުރާ ގެންދިއުމަށް ނިންމެވި ކަމަށް އެމަނިކުފާނު އިއުލާން ކުރެއްވިއެވެ.

ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ފޯޅަވައްސަކީ ރާއްޖޭގެ ތަނެއްގެ ގޮތުގައި ތާރީޚީ ގޮތުންވެސް ވަރަށް ގިނަ ހެކިތައް ފެންނަން އޮތް ތަނެއް ކަމަށެވެ. 9 ވަނަ ޙަސަން ރަސްގެފާނުގެ ސިޓީއެއް ޗާޓަކާއެކު 16 ވަނަ ޤަރުނުގައި އޮތްކަމަށް ރައީސް ވިދާޅުވިއެވެ. އެތަނަކީ، ރާއްޖޭގެ ތަނެއް ކަމަށާއި އެތަނުގެ ޙައްޤުވެރި ފަރާތާ އެތަން ޙަވާލުކުރާ ކަމަށްވަންޏާ، ރާއްޖެ އަށްވުރެ ޙައްޤުކަން ބޮޑު ބައެއް ނެތް ކަމަށް ރައީސް ފާހަގަކުރެއްވިއެވެ.

"އިނގިރޭސީ ސަރުކާރުން ޤައުމަކާ ޙަވާލުކުރަންޏާ ހަމައެކަނި އޮތް ޤައުމަކީ ރާއްޖެ. މިކަމާއި ބެހޭ ހުރިހާ މަސައްކަތްތަކެއް ފަަށައިގެން ކުރިއަށްގެންދޭ. މިކަމުގައި ބައިނަލްއަޤްވާމީ ގޮތުން އޮންނަ މިންގަނޑުތަކާ އެއްގޮތަށް ހުށަހަޅާ ފަރާތްތަކަށް ހުށަހަޅާނެ. މިވަގުތު އިނގިރޭސީ ސަރުކާރާއެކު މަސައްކަތް ދަނީ ކުރަމުން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސްގެ ވާހަކަފުޅުގައި ވަނީ، ގެއްލިފައިވާ ކަނޑުގެ ސަރަޙައްދު ހޯދުމުގެ މަސައްކަތަށް ޚާއްޞަ ކޮމިޓީއެއް އެކުލަވާލާފައިވާކަންވެސް ފާހަގަކުރައްވާފައެވެ. މޮރިޝަސްއިން ރާއްޖެއާ އޮތް ސިޔާސީ ގުޅުން ކަނޑާލުމާ ގުޅޭގޮތުން ރައީސް ވިދާޅުވީ، އެނިންމުމަކީ ތާކުންތާކު ޖެހޭ ނިންމުމެއް ނޫން ކަމަށެވެ. މޮރިޝަސްއިން އެނިންމުން ނިންމާފާއިވަނީ، އެއްވެސް މަޝްވަރާއެއް ނެތި ކަމަށާއި، އެ ނިންމުން ނިންމިނަމަވެސް މޮރިޝަސްއަށް ޙައްޤުނޫން ތަނެއް ޙައްޤެއް ނުވާނެކަމަށެވެ. އަދި ރާއްޖެ ކުރިއަދާނީ މޯލްޑިވްސް ފަސްޓް ޕޮލިސީއާ އެއްގޮތަށްކަމަށްވެސް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވިއެވެ.

މޮރިޝަސްއާއި އެޤައުމުގެ ވެރިރަށް ޕޯޓް ލުއީ އޮންނަނީ ފޯޅަވައްސާ ގާތްގަނޑަކަށް 1،300 މޭލު ދުރުގައެވެ. ނަމަވެސް ދިވެހިރާއްޖޭގެ ވެރިރަށް މާލެއާއި ފޯޅަވައްސާ ދެމެދު ހުރީ އެންމެ 310 މޭލުގެ ދުރުމިނެކެވެ.

ދިވެހިރާއްޖެއާއި ފޯޅަވައްސާ ދެމެދު އޮތް ތާރީޚީ އަދި ސަގާފީ ގުޅުންތަކަކީ ލިޔެކިޔުންތަކުން ސާބިތުވާން ހުރި ކަންކަމެވެ. ފޯޅަވަހީން ފެނިފައިވާ، ދިވެހިބަހުން ލިޔެ ކަނޑާނަގާފައިވާ މަހާނަގާތަކަކީ އެތައް ޒަމާނެއް ވަންދެން އޮތް ގާތް ގުޅުމުގެ ހެކިތަކުގެ ތެރެއިން ވަރަށް ބޮޑު ހެއްކެވެ. މި މަހާނަ ގައުތަކާ ރާއްޖޭގެ އެހެން ރަށަތަކުން ފެންނަން ހުރި ކުރީގެ މަހާނަ ގައުތަކާ އެއްވެސް ތަފާތެއް ނެތެވެ.

މީގެ އިތުރުން، އެތައް ގަރުނެއްވީ ދިވެހި ފުލޯކު ވާހަކަތަކުންވެސް ދަތުރުވެރިންނާއި މަސްވެރިން އެ ރަށްރަށުގައި ތިބިކަމުގެ ވާހަކަތައް އެނގެން އެބަހުއްޓެވެ. 16 ވަނަ ގަރުނުގެ ދިވެހި ރަސްކަލެއްގެ ފަތްކޮޅެއްގައި ފޯޅަވަހީގެ މައްޗަށް ދިވެހި ދައުލަތުގެ ސިޔާދަތީ ބާރު އޮތްކަން ބަޔާންކޮށްފައިވެއެވެ. މިއީ މޮރިޝަސްގައި އިންސާނުން އާބާދުވުމުގެ 100 އަހަރަށްވުރެ ކުރީގެ ތާރީޚެކެވެ. ކާބަން-ޑޭޓިންގް ބޭނުންކޮށްގެން ހޯދާފައިވާ އާސާރީ ހެކިތަކުގެ އިތުރުން، 1970ގެ އަހަރުތަކުގައި އިނގިރޭސި-އެމެރިކާ އަސްކަރީ މަރުކަޒު ހެދުމަށްޓަކައި އެ ރަށްތަކުން މަޖުބޫރުން ބޭރުކޮށްލި ފޯޅަވަހީގެ އަސްލު ވަޒަންވެރިންގެ ޑީ.އެން.އޭއިން އެމީހުންގެ ކިބައިގައި ދިވެހި ނަސްލާއި ކްރިއޯލް ނަސްލުގެ ހިއްސާ އޮތްކަން ހާމަވެއެވެ.