ވަޒީފާގައި އަހަރެއް ވުމުން އިދާރާ ނުވަތަ މުއައްސަސާގެ ބައިން ފްލެޓަށް ކުރިމަތިލެވޭނެ

"ބޯހިޔާވަހިކަން އެންމެނަށް" ސިޔާސަތުގައި ޚާއްސަ އިސްކަންދޭ ކެޓަގަރީގައި، އިދާރާތަކާއި މުއައްސަސާތަކުގެ ބައިން ފްލެޓަށް ކުރިމަތިލުމުގެ ޝަރުތުގެ ގޮތުގައި ކަނޑައަޅާފައިވާ 5 އަހަރުގެ މުއްދަތު 1 އަހަރަށް މަދުކޮށްފިއެވެ.

މި ބަދަލު ގެނެސް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން މިހާރު ވަނީ ގެޒެޓުކޮށްފައެވެ.
ޚާއްސަ ކެޓަގަރީގައި އިދާރާތައް އަދި މުއައްސަސާތަކުގެ ބައިން މައިގަނޑު 3 ބަދަލެއް އުސޫލަށް ވަނީ ގެނެސްފައެވެ.

1. ވަޒީފާގެ މުއްދަތަށް ގެނެވުނު ބަދަލު :

ކުރިން އޮންނަ ގޮތުން ޚާއްސަ ކެޓަގަރީއަށް ޝަރުތު ހަމަވުމަށްޓަކައި، އެ އިދާރާއެއްގައި މަދުވެގެން 5 އަހަރު ދުވަހު މަސައްކަތް ކޮށްފައިވާން ޖެހެއެވެ.

ނަމަވެސް މިހާރުވަނީ މި މުއްދަތު 1 އަހަރު ދުވަހަށް ކުރުކޮށްފައެވެ. އެގޮތުން، ޚާއްސަ އިސްކަންދެވޭ އިދާރާއެއްގައި މެދުނުކެނޑި ވޭތުވެދިޔަ 1 އަހަރު ފުލް-ޓައިމް ވަޒީފާ އަދާކޮށްފައިވާ ފަރާތްތަކަށް މިހާރު އެކެޓަގަރީން ފުލެޓަށް ކުރިމަތިލެވޭނެއެވެ.

2. ފުލެޓު ލިބުމަށްފަހު ޚިދުމަތްކުރުމަށް އެއްބަސްވާ މުއްދަތު:

ކުރިން އުސޫލުގައި އޮތްގޮތުން ނަމަ، ފުލެޓު ލިބޭ ފަރާތްތަކުން އެ އިދާރާއެއްގައި މަދުވެގެން 5 އަހަރު ދުވަހު މަސައްކަތްކުރުމަށް އިގުރާރުވާން ޖެހެއެވެ.

އުސޫލަށް ބަދަލު ގެނެސްފައިވަނީ ބޯހިޔާވަހިކަން ހަވާލުކުރާ ތާރީޚުން ފެށިގެން، އެ އިދާރާއަކުން ނުވަތަ މުއައްސަސާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާން ޖެހޭގޮތަށެވެ.

3.އިތުރު އިދާރާއެއް ލިސްޓުގައި ހިމެނުން:

ތިންވަނަ ބަދަލެއްގެ ގޮތުގައި، އިދާރާތަކުގެ ލިސްޓަށް އެއް އިދާރާ ވަނީ އިތުރުކޮށްފައެވެ.

ޚާއްސަ އިސްކަންދެވޭ އިދާރާތަކުގެ ލިސްޓަށް (ކެޓަގަރީ 6 ގެ ދަށުން) އިތުރުކޮށްފައިވަނީ ކެޕިޓަލް މާކެޓް ޑިވެލޮޕްމަންޓް އޮތޯރިޓީ (CMDA) އެވެ.

ސަރުކާރުގެ ސްކީމްގެ ދަށުން ފުރަތަމަ ބުރުގައި 7900 ފްލެޓް ދޫކުރުމަށް ވަނީ ހުޅުވާލާފައެވެ. މީގެތެރެއިން މުއައްސަސާތަކާއި އިދާރާތައް ހިމެނޭ، ޚާއްސަ އިސްކަންދޭ ކެޓަގަރީއަށް 2400 ފްލެޓު ވަނީ ކަނޑައަޅާފައެވެ.

އިދާރާތަކާއި މުއައްސަސާތައް ހިމެނޭހެން ޖުމުލަ 29 ތަނެއް މި ބައިގައި ހިމެނެއެވެ. އަދި ސިވިލް ސަރވަންޓުގެ ޚާއްސަ ކެޓަގަރީވެސް ހިމެނެއެވެ.