ސަރުކާރުން އެޅުއްވި ފިޔަވަޅުތަކާއެކު ކުދި ވިޔަފާރިތަކަށް ލިބުނީ ހިތްހަމަޖެހުން

ރާއްޖޭގެ އިޤްތިޞާދުގައި ކުދި އަދި މެދުފަންތީގެ ވިޔަފާރިތައް ދަނީ މުހިންމު ދައުރެއް އަދާކުރަމުންނެވެ. ދުވަހުން ދުވަހަށް އަލަށް ފަށާ ވިޔަފާރިތައް އިތުރުވަމުންދާއިރު އިޤްތިޞާދުގައި ކުދި އަދި މެދުފަންތީގެ ވިޔަފާރިތަކުގެ ހިއްސާ އަންނަނީ އިތުރުވަމުންނެވެ. ނަމަވެސް މީގެކުރިން މިފަދަ ވިޔަފާރިތަކުގެ އޮތް އެންމެ ބޮޑު އެއް ކަންބޮޑުވުމަކީ ވިޔަފާރި ފެށުމަށް އަދި ވިޔަފާރިއާއިއެކު ކުރިއަށްދާނެ ފަހި މާހައުލެއް ގާއިމްވެފައި ނެތުމެވެ. ނަމަވެސް މި ސަރުކާރުން ވަނީ މި މަންޒަރު ބަދަލުކޮށްލާފައެވެ.

ކުދި އަދި މެދު ފަންތީގެ ވިޔަފާރިތަކަށް ދިމާވާ މައްސަލަތައް އޮޅުންފިލުވުމަށް މީގެކުރިން އެއްވެސް ރައީސަކު އެ ވިޔަފާރިވެރިންނާއި ބައްދަލުކުރައްވާފައެއް ނުވެއެވެ. ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރު ޑިސެންބަރު މަހުގެ 17 ވަނަ ދުވަހު ވިޔަފާރިވެރިންނާއި ބައްދަލުކުރެއްވިއެވެ. މި ބައްދަލުވުމުގައި އެ ފަރާތްތަކުން ހުށަހެޅުއްވި ކަންބޮޑުވުންތަކާއި ގުޅިގެން ކެބިނެޓުގައި ފުޅާދާއިރާއެއްގައި ވަނީ މަޝްވަރާކޮށްފައެވެ. އަދި އެކަންކަން ހައްލުކުރުމަށް ވަގުތުން ވަގުތައް ރައީސް ވަނީ ފިޔަވަޅު އަޅުއްވަން ފައްޓަވާފައެވެ.

ވިޔަފާރިވެރިންގެ އޮތް އެންމެ ބޮޑު އެއް ކަންބޮޑުވުން ރާއްޖެ އެތެރެ ކުރާ މުދަލަށް ޑެމަރޭޖް ނާރާ ވަގުތު ރައީސް ވަނީ އިތުރުކޮށްދެއްވާފައެވެ. އެގޮތުން 80 ގަޑިއިރުން 124 ގަޑިއިރަށް ވަނީ ބަދަލު ކުރައްވާފައެވެ. އަދި ވިޔަފާރިތަކަށް ފަސޭހަކޮށްދިނުމުގެ ގޮތުން ކަސްޓަމްސް ޚިދުމަތް 24 ގަޑިއިރަށްވެސް ވަނީ ބަދަލުކޮށްފައެވެ.
ކުދި އަދި މެދުފަންތީގެ ވިޔަފާރިތަކަށް ފަސޭހަކޮށްދިނުމުގެ ގޮތުން މި ޖަނަވަރީ މަހުގެ އެއްވަނަ ދުވަހުން ފެށިގެން ވަނީ، ތިން ކަމެއް ތަންފީޒު ކުރަން ފަށާފައެވެ.

އެކަންކަމުގެ ތެރޭގައި ހިމެނެނީ:

* ފަރުދުން ގެންނަ މުދަލަށް އަމިއްލައަށް ޑިކްލެރޭޝަން ހުށަހެޅޭނެ ގޮތް ހެދުން
* މުދަލެއްގެ ކަސްޓަމްސް އަގު އުސޫލުގެ ތެރެއިން ކަނޑައަޅާ އަގަށްވުރެ ބޮޑު އަގެއް ނުނެގޭނެހެން ހަރުދަނާ ފިޔަވަޅުތަކެއް އެޅުން
* މަޝްރޫޢުތަކަށް ޑިއުޓީ މަޢާފު ކޮށްގެން އެތެރެ ކުރާ އުޅަނދު ނުޤަވާއިދުން ބޭނުންކުރުން މޮނިޓަރކޮށް ފިޔަވަޅު އަޅަން ފެށުން

މިކަންކަމުގެ އިތުރުން ބަނދަރުތަކުގައި މުދާ ކުލިއަރ ކުރުމުގައި ބޭނުން ކުރާ އުޅަނދުތައް ބޭނުން ކުރާ ގޮތް ގާތުން ބަލާނެ ކަމަށް އިޤްތިޞާދީ ވުޒާރާއިން ވަނީ ހާމަކުރައްވާފައެވެ. މީގެ އިތުރުން ހެޔޮ އަގުގައި މުދާ ރައްކާ ކުރެވޭނެ އިންތިޒާމު ހަމަޖެއްސުމަށް އިޤްތިޞާދީ ވުޒާރާއިން ޚާއްޞަ އިސްކަމެއް ދެއްވައިގެން، ރާއްޖޭގެ 3 ސަރަހައްދެއްގައި ސްޓޯރޭޖް ފެސިލިޓީތަކެއް ޤާއިމްކުރަން ވަނީ ނިންމާފައެވެ.

ރާއްޖޭގައި ކްރިއޭޓިވް އިކޮނޮމީއެއް އުފެއްދުމަށް ސަރުކާރުން ގެންދަވަނީ މަސައްކަތްކުރައްވަމުންނެވެ. މިއީ މިއީ ސަރުކާރަކުން ކްރިއޭޓިވް އިކޮނޮމީއެއް ޤާއިމްކުރުމުގެ މަސައްކަތް ފެށި ފުރަތަމަ ފަހަރެވެ.

ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ސަރުކާރުން ކުރައްވަމުން ގެންދަވާ މަސައްކަތުގެ ދަށުން އޮތެންޓިކް މޯލްޑިވްސްގައި ރެޖިސްޓްރީކޮށްފައިވާ ވިޔަފާރިތަކަށް އަލީބާބާ ވެބްސައިޓް މެދުވެރިކޮށް މުދާ ވިއްކޭނެ ގޮތްވެސް މިހާރު ވަނީ ހަމަޖައްސާފައެވެ.

ރައީސުލްޖުމްހޫރިއްޔާ ވިދާޅުވީ ދިވެހި ވިޔަފާރިތަކަށް ފަހި ފުރުސަތުތަކެއް ހޯދައިދީ ބޭރުން ފައިސާ ގެނައުމުގައި ހުރި ދަތިތައްވެސް ހައްލުކޮށްދެއްވާނެ ކަމަށެވެ. އެގޮތުން އެ ވިޔަފާރިތަކާއި ގުޅުންހުރި ފަރާތްތަކާއި ގާތުން މިހާރުވެސް ސަރުކާރުން މަސައްކަތް ކުރަމުން އަންނައިރު، ޕޭޕަލްއާއެކު އަންނަނީ މަސައްކަތްކުރައްވަމުންނެވެ.

ބީއެމްއެލްގެ ޑިޖިޓަލް ވޮލެޓް ސްވައިޕްގެ ޚިދުމަތް ފެށުމަށް ދަނީ ތައްޔާރުވަމުންނެވެ. ސްވައިޕް އަކީ ދިވެހީން އުފައްދައި ތަރައްގީކޮށްފައިވާ %100 ދިވެހި އުފެއްދުމެކެވެ. މި ޑިޖިޓަލް ވޮލެޓަކަކީ ދުނިޔޭގެ ޑިޖިޓަލް މާލީ ބާޒާރުގައި ރާއްޖެއާއި ރާއްޖޭގެ ފިންޓެކްގެ ހުނަރުވެރިކަން ދައްކުވައިދޭނެ އުފެއްދުމެއްކަމަށް ބީއެމްއެލްއިން ވަނީ ވިދާޅުވެފައެވެ.

ސަރުކާރުން ވަނީ، މިއަހަރު ކުދި އަދި މެދުފަންތީގެ ވިޔަފާރިތައް ކުރިއެރުމަށް 500 މިލިޔަން ރުފިޔާގެ ލޯނު ދޫކުރާނެ ކަމަށް ވިދާޅުވެފައެވެ. އަދި ދެ އަހަރު ތެރޭ ނިޒާމީ ގޮތެއްގައި މިހާރު ހުރި މައްސަލަތަކަށް އެދެވޭ ހައްލެއް ގެނެސް، ރާއްޖޭގެ އިޤްތިޞާދުގައި މި ވިޔަފާރިތައް އަދާކުރާ ދައުރު ފުޅާކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ.