އިމްޕޯޓް އެކްސްޕޯޓުގައި ދިމާވާ ދަތިތައް ހައްލުކުރަން ޚާއްސަ ފޯރަމެެއް

ރާއްޖެއަށް މުދާ އެތެރެކުރުމާއި ބޭރުކުރުމުގައި ހަރަކާތްތެރިވާ ފަރާތްތަކަށް ދިމާވާ ދަތިތައް ހައްލުކުރުމަށް ކަމާއި ގުޅުންހުރި އިދާރާތަކާއި މަސައްކަތުގައި ހަރަކާތްތެރިވާ ފަރާތްތައް ހިމެނޭ ގޮތަށް ޚާއްސަ ފޯރަމެއް ބާއްވައިފިއެވެ.

ކަސްޓްމްސްއިން ދާއިރާގެ އެކި ފަރާތްތަކާއެކު މި ފޯރަމް ބާއްވާފައިވަނީ ރާއްޖެއަށް މުދާ އެތެރެކުރުމުގައި ހުރި ދަތިތައް ހައްލުކޮށްދެއްވާނެކަމުގެ ޔަޤީންކަން މިދިޔަ އަހަރު ޑިސެމްބަރު މަހު 17 ވަނަ ދުވަހު ކުދި އަދި މެދު ފަންތީގެ ވިޔަފާރިވެރިންނާއެކު ބޭއްވި ބައްދަލުވުމުގައި ރައީސުލްޖުމްހޫރިއްޔާ ދެއްވާފައިވާ ދަނޑިވަޅެއްގައެވެ.

އެކަމާއި ގުޅިގެން ސަރުކާރުގެ އިދާރާތަކަށް ވިޔަފާރިވެރިންގެ ކަންބޮޑުވުންތައް ހައްލުކޮށްދެއްވުމަށް އެމަނިކުފާނު ވަނީ އިރުޝާދު ދެއްވާފައެވެ. އެހެން ކަމުން މިއީ މިމައްސަލަތައް ހައްލު ކުރުމަށް ބޭއްވިގެން ދިޔަ ފޯރަމެއް ކަމަށް ކަސްޓަމްސްއިން ވިދާޅުވިއެވެ.

ކަސްޓަމްސް ބިލްޑިންގައި ބޭއްވި މި ފޯރަމުގައި ކަސްޓަމްސް ރާއްޖެއަށް މުދާ އެތެރެކުރުމާއި ބޭރުކުރުމާއި ގުޅުންހުރި ގިނަ ފަރާތްތަކުން ވަނީ ބައިވެރިވެފައެވެ. އެއް ދުވަހުގެ މުއްދަތަށް ބޭއްވުނު މި ފޯރަމްގައި ކަސްޓަމްސް، ބަނދަރުތައް، މުދާ ކްލިއަރކުރުމުގައި ހަރަކާތްތެރިވާ ކްލިއަރިންގ އެޖެންޓުންނާއި ބްރޯކަރުން އަދި މުދާ އެތެރެކުރުމާއި ބޭރުކުރުމުގައި ބޭނުންވާ މުދަލާގުޅޭ ހުއްދަތައް ދޫކުރާ ސަރުކާރުގެ އިދާރާތައް ހިމެނޭގޮތަށް 60 އަށް ވުރެ ގިނަ ފަރާތަކުން ބައިވެރިވިއެވެ.

މުދާ އެތެރެކޮށް ބޭރުކުރުމުގައި ދިމާވާ ދަތިތައް ހައްލުކުރުމާ ގުޅޭގޮތުން ވަރަށް ފުޅާ ދާއިރާއެއްގައި، ފޯރަމްގެ ބައިވެރިން މަޝްވަރާކޮށްފައިވާކަމަށް ކަސްޓަމްސްއިން ވިދާޅުވިއެވެ.

މިގޮތުން ރާއްޖެއަށް އިމްޕޯޓްކުރާ ކެމިކަލްގެ ބާވަތްތަކަށް ހުއްދަ ދޫކުރުމާއި، ކާބޯތަކެއްޗާއި ބޭހުގެ ބާވަތްތައް ކްލިއަރކުރުމުގައި ހުރި ދަތިތަކަށް ހައްލު ގެންނާނެ ގޮތްތަކާއި، ގަސްގަހާގެއްސާއި ޖަނަވާރުގެ ބާވަތްތައް އެތެރެކުރުމުގެ ކަންކަން މިހާރަށްވުރެ ފަސޭހަކުރުމާއި، އިމާރާތްކުރުމުގެ ސާމާނު އެތެރެކުރުމަށް ހުއްދަ ދޭ އުޞޫލުތައް ލުއި ފަސޭހަ ކުރުމާގުޅޭގޮތުން ފޯރަމްގެ ބައިވެރިންގެ މެދުގައި މަޝްވަރާކޮށްފައިވެއެވެ.

އަދި މިކަންކަން ހައްލުކުރުމަށް މިހާރުން މިހާރަށް އެޅެންހުރި ފިޔަވަޅުތަކާއި، މެދުރާސްތާ އާއި ދިގުރާސްތާގައި ގެނެވޭނެ ހައްލުތަކާމެދުވެސް ބައިވެރިން މަޝްވަރާކުރެއްވިއެވެ. މި ފޯރަމްއިން ކުރަން ނިންމުނު ކަންކަން ކަމާގުޅުންހުރި އިދާރާތަކާއި ޚިއްސާކޮށް އެކަންކަން ތާވާލާ އެއްގޮތަށް ކުރިއަށް ގެންދިއުމަށްވެސް ފޯރަމްގައި ނިންމާފައިވެއެވެ.

މިފޯރަމް ނިންމާލުމުގޮތުން ވާހަކަ ދައްކަވަމުން މޯލްޑިވްސް ކަސްޓަމްސް ސަރވިސްގެ އެސިސްޓެންޓް ކޮމިޝަނަރ އަބްދުލް ރަޝީދު އިބްރާހީމް ވިދާޅުވީ، ފޯރަމްގެ ރަނގަޅު ނަތީޖާއަކަށްވާނީ މަޝްވަރާކުރެވުނު ކަންކަން ހައްލުވެގެން ދިއުން ކަމަށެވެ. އަދި އެކަމަށް ކަސްޓަމްސްއިން މަސައްކަތް ކުރައްވާނެކަމަށް ވިދާޅުވިއެވެ.

"އަޅުގަނޑުމެންގެ އަމާޒަކީ އެއްވެސް މައްސަލައެއް ނެތް ވަރަށް. ނޫނީ ބަނދަރުގައި މިމަސައްކަތުގެ ޑިލޭ ކުޑަވެގެންދާނެ ގޮތަށް މަސައްކަތް ކުރުން" އެސިސްޓެންޓް ކޮމިޝަނަރ އަބްދުލް ރަޝީދު އިބްރާހީމް ވިދާޅުވިއެވެ.

ރާއްޖެއަށް ގެންނަ މުދަލުގެ ނިސްބަތް ދުވަހުން ދުވަހަށް އިތުރުވަމުންދާއިރު، ބަނދަރުތަކުގައި ކަސްޓަމްސްއިން ފޯރުކޮށްދޭ ޚިދުމަތްތައް އެއްދަވަހުން އަނެއް ދުވަހަށް ތަރައްޤީކޮށް، ކްލިއަރަންސް ޕްރޮސެސް ހަލުވިކޮށް، ފެންވަރު ރަނގަޅުކުރުމަށްޓަކައި، ކަސްޓަމްސްއިން އަބަދުވެސް މަސައްކަތްތައް ކުރެވުމުންދެއެވެ. އަދި މިފަދަ ކަންކަމުގައި ގުޅިގެން މަސައްކަތްކުރާ އިދާރާތަކާއި ސްޓޭކްހޯލްޑަރުންގެ ފަރާތުން އަބަދުވެސް އެއްބާރުލުން ލިބޭ ކަމަށް ކަސްޓަމްސްއިން ވަނީ ވިދާޅުވެފައެވެ.