ޕާކިސްތާނުގެ ހަމަނުޖެހުން ބޮޑު، ހުޅަނގު ދެކުނު ބަލޫޗިސްތާން ސަރަޙައްދުގައި، އެއް ވަގުތެއްގައި ދިން ޙަމަލާތަކެއްގައި ފުލުހުންގެ 8 މީހަކު މަރުވެފައިވާކަމަށް ބުނެފިއެވެ.
ފުލުހުން ބުނީ، ރޭގެ މެންދަމުގެ ވަގުތެއްގައި، އެ ސަރަޙައްދުގެ ވެރިރަށް ކްވެޓާގައި ހުންނަ ޕޮލިސް ސްޓޭޝަންތަކަށް ޢަމާޒުކޮށް، ޕާކިސްތާނުން ވަކިވެގަނެ، ބަލޫޗިސްތާންގެ މިނިވަން ދަޢުލަތެއް ޤާއިމުކުރުމަށް މަސައްކަތްކުރާ ހަނގުރާމަވެރި ޖަމާޢަތުގެ ހަނގުރާމަވެރިން އެއް ވަގުތެއްގައި ޙަމަލާތައް ދީފައިވާ ކަމަށެވެ.
މި ޙަމަލާގެ ޒިންމާ އެ ޤައުމުގެ ހަނގުރާމަވެރި ޖަމާޢަތެއް ކަމަށްވާ ބަލޫޗިސްތާނު ލިބަރޭޝަން އާމީ ނުވަތަ ބީއެލްއޭއިން ވަނީ އުފުލައިފައެވެ. ބީއެލްއޭއަކީ ބަލޫޗިސްތާންގެ ރައްޔިތުންގެ ޙައްޤުތައް ޙިމާޔަތް ކުރުމުގެ ނަމުގައި ހަނގުރާމަ ކުރަމުންދާ ހަތިޔާރު އެޅި ޖަމާޢަތެކެވެ.
ޕާކިސްތާންގެ ސަލާމަތީ ބާރުތަކުގެ އޮފިޝަލަކު ރޮއިޓަރސް ނޫހަށް ވިދާޅުވީ، މި ޙަމަލާތައް މައިގަނޑު ގޮތެއްގައި ފެއިލްކޮށްލެވުނީ، ހަނގުރާމަވެރިންގެ ރޭވުންތެރިކަން ނެތުމުން ކަމަށެވެ.
ބައެއް މީޑިއާ ރިޕޯޓުތައް ބުނާ ގޮތުގައި، އެ ޙަމަލާ ދިނުމަށްފަހު، ހަނގުރާމަވެރިން ވަނީ ޕާކިސްތާންގެ ސަލާމަތީ ބާރުތަކުގެ ބައެއް މީހުން ރަހީނުކޮށްގެން ގެންގޮސްފައެވެ. ނަމަވެސް، މި ޙަމަލާއާ ގުޅޭގޮތުން ޕާސްކިތާނުގެ ސަރުކާރުން އަދި އަސްކަރިއްޔާއިން ވެސް އަދި ރަސްމީކޮށް އެއްޗެއް ބުނެފައެއް ނުވެއެވެ.
ބީއެލްއޭއިން އަނެއްކާ ވެސް ބަލޫޗިސްތާނުގައި ޙަމަލާއެއް ދީފައި މި ވަނީ އެ ސަރަޙައްދުގައި ޕާކިސްތާނުގެ އަސްކަރިއްޔާއިން ހިންގި އޮޕަރޭޝަންތަކެއްގައި 41 ހަނގުރާމަވެރިން މަރާލާފައިވަނިކޮށެވެ.
ބީއެލްއޭއިން ދަނީ، ޕާކިސްތާނުގެ ސަލާމަތީ ބާރުތަކުގެ އިތުރުން ޢުމްރާނީ ބައެއް ވަޞީލަތްތަކަށް ޢަމާޒުކޮށް ޙަމަލާތައް ދެމުންނެވެ.
މިގޮތުން، މިދިޔަ އަހަރު 450 ފަސިންޖަރުންނާއެކު ދަތުރުކުރި ރޭލެއް ބީއެލްއޭއިން ހިޞާރުކޮށް، ސަލާމަތީ ބާރުތަކާ ދެމެދު ހިނގި ވަރުގަދަ ކުރިމަތިލުންތަކުގައި އެތައް ބަޔަކު ވަނީ މަރުވެފައެވެ.