"ޓެކްނޮލޮޖީގެ މައްޗަށް އިންސާނީ ފިކުރު އިސްކުރަންޖެހޭ"

އިންސާފު ޤާއިމް ކުރުމުގައި ޓެކްނޮލޮޖީގެ މައްޗަށް އިންސާނީ ފިކުރު އިސްކުރަން ޖެހޭ ކަމަށް އުއްތަމަ ފަނޑިޔާރު ޢަބްދުލްޢަނީ މުޙައްމަދު ވިދާޅުވެއްޖެއެވެ.

އުއްތަމަ ފަނޑިޔާރު މިހެން ވިދާޅުވީ، މިއަހަރުގެ ފަނޑިޔާރުންގެ މަހާސިންތާ ޝަރަފުވެރިކޮށް ހުޅުވުމަށް ބޭއްވި ރަސްމިއްޔާތުގައެވެ.

ފަނޑިޔާރުންގެ މަހާސިންތާއަކީ، ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގެ ޖުޑީޝަލް އެކަޑަމީން އިންތިޒާމު ކޮށްގެން ކޮންމެ އަހަރަކުވެސް ކޯޓުތަކުގެ ހިންގުމުގެ ނިޒާމު ހަރުދަނާ ކުރުމަށް ބޭނުންވާ ޚިޔާލާއި މަޝްވަރާ ހޯދުމަށް ބާއްވަމުންދާ މަހާސިންތާއެކެވެ.

ދެދުވަހުގެ މުއްދަތަށް ވިލާ ނޯޓިކާ ރިސޯޓުގައި ކުރިއަށް ގެންދާ ފަނޑިޔާރުންގެ މަހާސިންތާ ފެށުމުގެ ރަސްމިއްޔާތުގެ ޝަރަފުވެރިކޮށްދެއްވީ، އުއްތަމަ ފަނޑިޔާރު އަބްދުލްޢަނީ މުޙައްމަދެވެ. މި ރަސްމިއްޔާތުގައި ޖުޑީޝަލްސް ސާރވިސް ކޮމިޝަންގެ ރައީސް ހުސްނީ މުބާރިކާއި، އެކޮމިޝަނުގެ މެންބަރުންނާއި، ރާއްޖޭގެ ކޯޓުތަކުގެ ފަނޑިޔާރުންނާއި، ސަރުކާރުގެ އިސް އޮފިޝަލުން ހިމެނޭޙެން ގިނަ ފަރާތްތަކުން ވަނީ ބައިވެރިވެ ވަޑައިގެންފައެވެ.

މިއަހަރުގެ ފަނޑިޔާރުންގެ މަހާސިންތާގެ ތީމަކީ، ފަންނިޔާތާއި އޭއައި ބޭނުންކޮށްގެން ޝަރުޢީ ދާއިރާގެ ހިންގުން ހަރުދަނާ ކުރުމެވެ. މަހާސިންތާގެ ތެރެއިން ޝަރުޢީ ދާއިރާގައި މިހާރު ފަންނިޔާތު ބޭނުންކުރާ މިންވަރު ދެނެގަނެ، ކުރިމަގުގެ އަމާޒުތައް ކަނޑައެޅުމަށް މަސައްކަތް ކުރާނެ ކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން ވިދާޅުވިއެވެ.

ފަނޑިޔާރުންގެ މަހާސިންތާ ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އުއްތަމަ ފަނޑިޔާރު ވިދާޅުވީ، މިމަހާސިންތާއަކީ ފަނޑިޔާރުން އެއްތަނަކަށް ޖަމާވެ ޤާބިލްކަން އިތުރު ކުރުމަށް މަސައްކަތް ކުރުމަށް ލިބޭ މުހިންމު ފުރުޞަތެއް ކަމަށެވެ. އުއްމަތަމަ ފަނޑިޔާރުގެ ވާހަކަފުޅުގައި ޝަރުޢީ ދާއިރާގައި ޓެކްނޮލޮޖީ ބޭނުން ކުރުމުގެ މައްޗަށް އަލިއަޅުވާލެއްވިއެވެ. އެމަނިކުފާނު ވިދާޅުވީ، މި ޒަމާނުގައި ފަންނިޔާތުގެ ހުނަރަކީ ކޮންމެ މީހެއްގެ ގައިގައި ހުރުން މުހިންމު ހުނަރެއް ކަމަށެވެ.

އުއްތަމަ ފަނޑިޔާރު ވަނީ، ދުނިޔޭގެ 40 ޤައުމެއްގެ ޝަރުޢީ ދާއިރާގައި މިހާރު އޭއައި ވަސީލަތްތައް ބޭނުން ކުރަމުންދާ ކަމަށް ވިދާޅުވެފައެވެ. އެމަނިކުފާނު ވަނީ، ފަންނިޔާތަށް މަރުހަބާ ނުކިޔާ މިހާރު ތިބެވެން ނެތް ކަމަށް ވިދާޅުވެފައެވެ. އެހެންނަމަވެސް ޝަރުޢީ ދާއިރާގައި އޭއައި ބޭނުން ކުރުމުގައި ވިސްނަން ޖެހޭ ކަންކަން ހުރިކަމަށް ވަނީ ވިދާޅުވެފައެވެ.

"އޭއައި ބޭނުންކުރުމުގައި އަޅުގަނޑުމެން ސަމާލުކަން ދޭންޖެހޭ ކަންތައްތަކެއްވެސް އެބަހުރޭ. ޓެކްނޮލޮޖީގެ ވަސީލަތްތަކުން މަސައްކަތްތަކުގައި ފަސޭހަކޮށްދިނަސް ބައިއެސްވުމުގެ ސިފަޔަކުން ސަލާމަތް ނުވޭ. އެހެންކަމުން އިންސާފު ޤާއިމްކުރުމުގައި އިންސާނީ ވިސްނުމާއި، އިހުސާސް އަބަދުވެސް ޓެކްނޮލޮޖީގެ މައްޗަށް މުހިންމު ދައުރެއް އަދާކުރާނެ." އުއްތަމަ ފަނޑިޔާރު ޢަބްދުލްޣަނީ މުޙައްމަދު ވިދާޅުވިއެެވެ.

އުއްތަމަ ފަނޑިޔާރު ވަނީ، ޝަރުޢީ ދާއިރާގައި ހުރި މައްސަލަތައް ޙައްލު ކުރުމަށް މިފަދަ ޙައްލުތަކުގެ ބޭނުން ހިފަންޖެހޭ ކަމަށާއި، މިއަހަރު ތެރޭ މައްސަލަތައް ނުނިމި ލަސްވާ މައްސަލައަށް ޙައްލެއް ގެނައުމަށް ޚާއްޞަ މަސައްކަތްތަކެއް ކުރައްވާނެ ކަމަށް ވިދާޅުވެފައެވެ.

ފަނޑިޔާރުންގެ މަހާސިންތާގެ ފުރަތަމަ ދުވަހު ކުރިއަށް ގެންދިއުމަށް ހަމަޖެހިފައިވަނީ، ޝަރުޢީ ދާއިރާގައި އޭއައި އަދި ޓެކްނޮލޮޖީ ބޭނުން ކުރުމާއި ގުޅޭ ސެޝަންތަކެކެވެ. އަދި ދެވަނަ ދުވަހު މިދާއިރާއަށް ހުރި ގޮންޖެހުންތަކަށް ޙައްލެއް ގެނައުމާއި ގުޅޭ ސެޝަންތަކެއް ކުރިއަށް ގެންދާނެއެވެ. މީގެ އިތުރުން މެޖިސްޓްރޭޓް ކޯޓުތަކާއި ގުޅޭ ޤަވާއިދަށް މަޝްވަރާ ހޯދުމަށް މި މަހާސިންތާގެ ތެރެއިން ކުރިއަށް ގެންދާނެ ކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަނުން ވިދާޅުވިއެވެ.

މިމަހާސިންތާގައި ކީ ނޯޓް ސްޕީކަރެއްގެ ގޮތުގައި ޕްރޮފެސަރ ޑރ. ޙަސަން އުގެއިލް ބައިވެރިވެ ވަޑައިގެން މައުލޫމާތު ދެއްވިއެވެ. މީގެ އިތުރުން އިންޑިއާގެ ޖުޑީޝަލް އެކަޑަމީގެ ފެސިލިޓޭޓަރުންވެސް މަހާސިންތާގެ ތެރެއިން ސެޝަން ނަންގަވައި ދެއްވުމަށް ވަނީ ހަމަޖެހިފައެވެ.

ފަޑިޔާރުންގެ މަހާސިންތާއަކީ، ކޯޓުތަކުގެ އިދާރީ ހިންގުން ހަރުދަނާ ކުރުމަށް 2016ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ މަހާސިންތާއެކެވެ. މިއަހަރުގެ މަހާސިންތާގައި ޝަރުޢީ ދާއިރާގެ އެކި އިދާރާތައް ތަމްސީލް ކުރައްވާ 100 އަށްވުރެ ގިނަ ފަރާތްތައް ބައިވެރިވެއެވެ.