މިއަހަރުގެ ޙައްޖުގެ މަތިވެރި އަޅުކަން އަދާކުރުމަށްޓަކައި ސައުދީ ޢަރަބިއްޔާއަށް ދިޔަ ޙައްޖާޖީން މިމަހުގެ 17 ވަނަ ދުވަހުން ފެށިގެން ރާއްޖެ އަންނަން ފަށާނޭކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
ޕީ.އެސް.އެމް ނިއުސްއަށް މަޢުލޫމާތު ދެއްވަމުން އިސްލާމިކް މިނިސްޓްރީގެ ކޯޑިނޭޓަރ މުޙައްމަދު އަޙްސަން ވިދާޅުވީ، މިމަހުގެ 17 ވަނަ ދުވަހުން ފެށިގެން 18 19 ،20 ،21 އަދި 24 ވަނަ ދުވަހުގެ އެކި ގަޑިތަކުގައި ޙައްޖާޖީން ރާއްޖެ އައުމަށް ހަމަޖެހިފައިވާކަމަށެވެ. މިއަހަރު ރާއްޖެއިން 2000 މީހުން ޙައްޖަށް ގޮސްފައިވެއެވެ. މިއީ ސަޢޫދީ ޢަރަބިއްޔާއިން ޙައްޖު ކޯޓާ، ކޮންޓްރޯލް ކުރައްވަން ފެއްޓެވިފަހުން ރާއްޖެއިން އެންމެ ގިނަ އަދަދެއްގެ މީހުން ޙައްޖުވުމަށް ދިޔަ ފުރަތަމަ ފަހަރެވެ. މީގެތެރެއިން އެއްހާސް މީހުން ޙައްޖަށް ދިޔައީ، ޙައްޖު ކޯޕަރޭޝަނުގެ ހަވާލުގައެވެ. ބާކީ 1000 މީހުން ދިޔައީ އަމިއްލަ 5 ޖަމާޢަތެއްގެ ޙަވާލުގައެވެ. މީގެތެރެއިން ޒަޢީމާ ޙައްޖު ގުރޫޕްގެ ޙަވާލުގައި 200 މީހުން ސިސިލްފަރު ގްރޫޕްގެ ޙަވާލުގައި 193 މީހުން، އެކްރޯ ގްރޫޕާއި އަލް ޙަރްމައިންއާއި މިނާ ގްރޫޕުންވެސް ކޮންމެ ގުރޫޕަކުން 200 މީހުންދިޔައެވެ.
މިއަހަރު ޙައްޖަށް ދިޔަ މީހުން އެއަރޕޯޓަށް ދިއުމުގެ ހުރިހާ ޚިދުމަތެއް ސަރުކާރުގެ ޚަރަދުގައި ހަމަޖެއްސެވިއެވެ. އެހެންނަމަވެސް އެނބުރި އަންނަ އިރު، މާލެ އައުމަށް އަދި އެފަދަ އިންތިޒާމެއް ހަމަޖައްސާފައި ނުވާކަމަށް އިސްލާމިކް މިނިސްޓްރީން ވިދާޅުވެއެވެ.