މާފަންނު ސްޓޭޑިއަމް ސަރަހައްދުގައި އެކި ކަންކަމަށް ދޫކޮށްފައިވާ ބިންތަކުގައިވާ އެއްވެސް އެއްޗަކަށް މީގެ ހަތް ދުވަސް ފަހުން ލިބޭ ގެއްލުމަށް ޒިންމާ ނުވާނެ ކަމަށް ފުޓްބޯޅަ އެސޯސިއޭޝަން އޮފް މޯލްޑިވްސްއިން ބުނެފި އެވެ.
ގައުމީ ފުޓްބޯޅަ އިދާރާއިން މިހެން ބުނީ އެ ބިންތައް ހުސްކޮށް ކުރަން ދިން 14 ދުވަހުގެ ތެރޭގައި ބިންތައް ހުސްކޮށްފައިނުވާތީ އެވެ. މި ބިންތައް އެކި ފަރާތްތަކަށް ދޫކޮށްފައިވަނީ އެފްއޭއެމުގެ އެއްވެސް ހުއްދައެއް ނެތި އެ އިދާރާގެ ގަވާއިދުތަކާ ހިލާފަށް ކުރީގެ މެނޭޖްމަންޓުންނެވެ.
އެފްއޭއެމުން ބުނީ ބިންތައް ހުސްކުރަން މިއަދުން ފެށިގެން ހަތް ދުވަސް ދީފައިވާ ކަމަށާއި "އޭގެ ފަހުން އެ ބިމުގައިވާ މުދަލަކަށް، ނުވަތަ އުޅަނދަކަށް ނުވަތަ ވަގުތީ ގޮތުން ހަދާފައިވާ އިމާރާތަކަށް ލިބޭ ގެއްލުމުގެ ޒިންމާ ފުޓްބޯޅަ އެސޯސިއޭޝަނުން ނުވާނެކަން އަންގާ ދިވެހި ސަރުކާރުގެ ގެޒެޓުގައި އިއުލާން ކުރަން،" ކަމަށެވެ.
އެފްއޭއެމުގެ މިހާރުގެ މެނޭޖްމަންޓުން ބިންތައް ދޫކޮށްފައިވާ ގޮތް ބެލިއިރު އެފްއޭއެމުގެ އެއްވެސް ލިޔެކިއުމަކުން އެކަން ކުރަން ފާސްކޮށްފައިވާކަން ފެންނާކަށް ނެތެވެ. ނަމަވެސް ބިންތަކުގައި މަސައްކަތް ކުރާ ފަރާތްތަކުން ބުނަނީ ކުރީގެ މެނޭޖްމަންޓުން ހަދާފައިވާ އެގްރީމަންޓްތައް އެބަހުރި ކަމަށެވެ. އެފްއޭއެމުގެ މިފަދަ އެތައް މައްސަލައެއް މިހާރު ވެސް ވަނީ ކޯޓު މަރުހަލާގަ އެވެ.
މި ބިމަކީ ސަރުކާރުން ފުޓްބޯޅަ ތަރައްގީ ކުރަން 50 އަހަރަށް އެފްއޭއެމަށް ދީފައިވާ ބިންތަކެކެވެ. އަދި ފީފާއިން ވަނީ ފުޓްބޯޅަ ދަނޑުތަކެއް އެޅުމަށް އެފްއޭއެމަށް އެހީދީފަ އެވެ. މި ފައިސާ އަށް ވީނުވީ އެއް ވެސް ވަނީ ނޭނގިފަ އެވެ.