ނޮޅިވަރަމާއި ނައިވައިދޫ ޕޮއިންޓަކުން ފުއްދާލިއިރު މާރަންދޫއަށް މޮޅެއް
-
ނޮޅިވަރާއި ނައިވައިދޫ އެއްވަރުވީ 1-1 އިން
-
މާރަންދޫއިން ކެލާގެ މައްޗަށް ކުރިހޯދީ 0-1 އިން
ރާއްޖޭގައި ބާއްވާ އެންމެ ހައިބަތުބޮޑު ފުޓްސަލް މުބާރާތް ކަމަށްވާ ގޯލްޑަން ފުޓްސަލް ޗެލެންޖުގެ ޒޯން 1 ގައި ނޮޅިވަރަމާއި ނައިވައިދޫ ޕޮއިންޓަކުން ފުއްދާލިއިރު މާރަންދޫއަށް މޮޅެއް އެއްވަރުވެގެން ނިމުނުއިރު، މާރަންދޫ މޮޅުވެ، ތާވަލުގެ ދެވަނައަށް ޖެހިލައިފިއެވެ.
މި ޒޯނުގައި މިއަދު ހަވީރު ނޮޅިވަރަމާއި ނައިވައިދޫ ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ.
މި މެޗުގައި ރާއްޖޭގެ ފުޓްސަލް އާއި ފުޓުބޯޅައިގެ ޤައުމީ ޓީމުގެ ބައެއް ކުޅުންތެރިން ފެނިގެން ގޮސްފައިވެއެވެ. އެގޮތުން ނައިވައިދޫ ޓީމުގައި، ސާފް ފުޓްސަލް ޗެމްޕިއަންޝިޕުގެ ރަން ތަށި އުފުލާލި ތިން ކުޅުންތެރިން ހިމެނެއެވެ. އެއީ އަބްދުﷲ ޝާފިއު (ޝާއްޕެ) އާއި އަޙްމަދު ހަމީދު (އައްމަޑޭ) ގެ އިތުރުން ކީޕަރު އިބްރާޙީމް ނާޖިހު އެވެ.
އަދި ނޮޅިވަރަންފަރުގެ ޖާޒީގައި، ޤައުމީ ފުޓުބޯޅަ ޓީމުގެ އިބްރާޙީމް ވަހީދު ޙަސަން (އިއްބެ) ފެނިގެންގޮސްފައިވެއެވެ.
ވާދަވެރި އެހެންނަމަވެސް އާދައިގެ ކުޅުމެއް ފެނިގެންދިޔަ މި މެޗުގައި، ފުރަތަމަ ލަނޑު ފެނިގެންދިޔައީ ފުރަތަމަ ހާފުގެ އެންމެ ފަހު މިނެޓުގެ ތެރޭގައެވެ. މިއީ ނޮޅިވަރަންފަރުގެ އަޙްމަދު ސިޒާންގެ އަތުން ބައިކޮޅަށް ވަދެގެން، ނައިވައިދޫއަށް ކާމިޔާބުކުރެވުނު ލަނޑެކެވެ.
ލީޑުގައި އޮވެ ނައިވައިދޫއިން މެޗު ނިންމާލަން ދަނިކޮށް، ދެވަނަ ހާފުގައި، މެޗުގެ 38 ވަނަ މިނެޓުގައި ނޮޅިވަރަންފަރުން ވަނީ ލަނޑެއް ޖަހައި ނަތީޖާ ހަމަހަމަކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ އަކްރަމް އަބްދުލް ރަޝީދެވެ.
މި މެޗުގެ މޮޅު ކުޅުންތެރިއަކަށް ހޮވުނީ ނައިވައިދޫގެ ޔޫސުފް ޝާއިފްއެވެ.
މި ގުރޫޕުގައި ދެން ކުޅުނު މެޗުގައި ކެލާގެ މައްޗަށް މާރަންދޫއިން ކުރިހޯދީ 0-1 ގެ ނަތީޖާއަކުންނެވެ.
މެޗުގައި ފެނިގެންދިޔަ ހަމައެކަނި ލަނޑު މާރަންދޫއަށް ކާމިޔާބުކޮށްދިނީ ސަމްޙާން އަބްދުލްރަޙްމާނެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެސް އޭނާއެވެ.
މި ނަތީޖާތަކާއެކު މި ގުރޫޕުގެ ޕޮއިންޓު ތާވަލް އެތުރިފައިވާ ގޮތަށް ބަލާލާއިރު، އެއްވަނައިގައި އޮތް ނައިވައިދޫއާއި ދެވަނައިގައި އޮތް މާރަންދޫއަށް ވެސް ހަތަރު ޕޮއިންޓު ލިބިފައިވެއެވެ. މާރަންދޫގެ މައްޗަށް ނައިވައިދޫއަށް ކުރި ލިބެނީ ޖަހާފައިވާ ގޯލު ގިނަވުމުންނެވެ. ތާވަލުގެ ތިންވަނައިގައި އޮތް ނޮޅިވަރަންފަރަށް ދެ ޕޮއިންޓު ލިބިފައިވާއިރު ފުލުގައި އޮތް ކެލައަށް ޕޮއިންޓެއް ލިބިފައެއް ނުވެއެވެ.