ބިދޭސީ ކުޅުންތެރިންގެ ފަރާތުން އެދެވޭ ކުޅުމެއް ނުފެނޭ: ވެލެންސިއާގެ ކޯޗު

ޓްރާންސްފަރ ބާޒާރުގައި ގެނައި ބިދޭސީ ކުޅުންތެރިންގެ ފަރާތުން، ބޭނުންވި، އުއްމީދުކުރި ފަދަ ކުޅުމެއް ފެނިގެން ނުދާކަމަށް ކްލަބް ވެލެންސިއާގެ ކޯޗު އަޙްމަދު މުޖުތަބާ (ފެސްކޯ) ބުނެފިއެވެ.

ދިރާގު ދިވެހި ޕްރިމިއަރ ލީގުގައި ޓީސީ ސްޕޯޓްސް ކުލަބާ ދެކޮޅަށް ކުޅެ ބަލިވި މެޗަށްފަހު "ޕީއެސްއެމް ނިއުސް" އާ ވާހަކަދައްކަމުން ކޯޗު އަޙްމަދު މުޖުތަބާ ބުނީ، މެޗުތައް ކުޅެން އަންނަނީ ޓީމާމެދު، ނަތީޖާ ނެރެވޭނެކަމާމެދު އުއްމީދު އޮންނާތީ ކަމަށެވެ. ފުރަތަމަ ދުވަހުން ފެށިގެންވެސް އަޒުމުކަނޑައެޅީ، ލީގުގައި ރަނގަޅު ނަތީޖާތަކެއް ނެރެ، ހޯދެން އޮތް ހުރިހާ ކާމިޔާބީއެއް ހޯދަން ކަމަށް އޭނާ ބުންޏެވެ.

"އުއްމީދެއް ނެތްނަމަކާ އަޅުގަނޑުމެން މިތަނަކަށް ނުއެއް އަންނާނެ. ހަމަ 100 އިންސައްތަ އުއްމީދުކޮށްގެން އަޅުގަނޑުމެން ތިބޭނީ އިރާދަކުރެއްވިއްޔާ. އުއްމީދެއް ނެތްކަމެއްގައި ކަމެއް ކުރުމުގެ މާނައެއް ނެތް. އަޅުގަނޑުމެންގެ އަބަދުވެސް އުއްމީދަކީ، ޑޭ 1 ގައި ވެސް އަޅުގަނޑު ދެންނެވިހެން މިކަމުގައި ހަމަ އެންމެ ރަނގަޅު ނަތީޖާ ހާސިލްކުރުމޭ. ދެން އޭގަ، ނަތީޖާއަކީ އެކި ދުވަހު އެކި ގޮތަށް ނުކުންނާނެ އެއްޗެއް". ކޯޗު މުޖުތަބާ ބުންޏެވެ.

އެންމެފަހުގެ ޓްރާންސްފަރ ބާޒާރުގައި ޓީމަށް ގެނައި ބިދޭސީ ކުޅުންތެރިން ދައްކާ ކުޅުމާމެދު ދެކޭ ގޮތަކާ ގުޅޭގޮތުން ސުވާލުކުރުމުން ކޯޗު ބުނީ، އެ ކުޅުންތެރިންގެ ފަރާތުން އުއްމީދު ކުރި ކުޅުން ނުފެންނަ ކަމަށެވެ.

"އެންމެ އެދެވޭ ކުޅުމެއް އެމީހުންގެ ފަރާތަކުން ފެނިގެނެއް ނުދިޔަ. އަޅުގަނޑުމެން އެކްސްޕެކްޓް ކުރި ވަރުވެސް ނުވި. އެމީހުންގެ ފަރާތުން ޓީމަށްވެސް އެހާ ބޮޑު އެހީތެރިކަމެއް ލިބޭކަމަށް ވެސް ނުވި. އެކި ފަހަރު ދިމާވާނީ އެކި ގޮތް. އަޅުގަނޑުމެން ގޮއްސަ ބަލާފަ ސެލެކްޓް ކޮށްގެން ގެންނަ ކުޅުންތެރިންނެއް ނޫން އެއީ. ޗާންސަކަށް ގެންނަ ކަހަލަ ގޮތަކަށް މި ގެނެވެނީ. އެވަރުގެ ސްކައުޓިން ސިސްޓަމެއް ހަގީގަތުގައި ރާއްޖެއަކު ނެތް". ޓީމަށް ގެނައި ކުޅުންތެރިންގެ ފެންވަރާ މެދު ހިތްހަމަނުޖެހޭކަން ހާމަކޮށް ކޯޗު ބުންޏެވެ.

ޓީމަށް ގެނައި ބިދޭސީ ކުޅުންތެރިންނާ މެދު ހިތްހަމަނުޖެހުން ފާޅުކޮށް ކޯޗު އަޙްމަދު މުޖުތަބާ ޝުއޫރު ފާޅުކުރިއިރު، ދިވެހި ލީގުގައި ވެލެންސިއާ މިވަގުތު އޮތީ ރެލިގޭޝަން ޒޯނުގައި 16 މެޗުން އަށް ޕޮއިންޓާއެކުއެވެ.

ލީގުގައި ވެލެންސިއާއަށް ބާކީ ދެން އޮތީ ދެ މެޗަށްވާއިރު، ރެލިގޭޝަނުން ސަލާމަތްވުމަށް، ކުރިއަށް އޮތް ދެ މެޗުވެސް ކާމިޔާބުކުރުން ވެލެންސިއާއަށް ވަރަށް މުހިންމެވެ.