ޔޫއެފާ ޗެމްޕިއަންސް ލީގުގެ ދެވަނަ ބުރުގެ ޖާގައެއް މެންޗެސްޓަރ ސިޓީ އާއި ޗެލްސީގެ އިތުރުން ލިވަޕޫލް އިން ހޯދައިފި އެވެ.
މެންޗެސްޓަރ ސިޓީ އިން ދެވަނަ ބުރުގެ ޖާގައެއް ހޯދާފައިވަނީ ތުރުކީގެ ގަލަތަސަރާއީ އާއި ދެކޮޅަށް އަމިއްލަ ދަނޑުގައި ކުޅުނު މެޗު 2-0 ގެ ނަތީޖާއަކުން ކާމިޔާބުކޮށްގެންނެވެ.
މި ނަތީޖާ އާއިއެކު ސިޓީ އަށް ވަނީ ފުރަތަމަ ބުރުގައި ކުޅުނު އަށް މެޗުން ޖުމްލަ 16 ޕޮއިންޓާއެކު ތާވަލުގެ އަށްވަނަ މަގާމް ލިބިފަ އެވެ. ގަލަތަސަރާއީ އަށް ލިބިފައިވާ 10 ޕޮއިންޓާއެކު އެ ޓީމަށް ޖެހޭނީ ޕްލޭއޮފް ދެ ލެގުގެ މެޗެއް ކުޅުމަށެވެ.
ޕެޕް ގަޑިއޯލާގެ އިރުޝާދުގެ ދަށުން ކުޅެމުންދާ މެންޗެސްޓަރ ސިޓީ އިން ވަނީ މި މެޗުގެ 10 ވަނަ މިނިޓުގައި ލަނޑެއް ޖަހާ ކުރި ހޯދާފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ އާލިން ހާލަންޑް އެވެ. މި ލަނޑާއެކު ޗެމްޕިއަންސް ލީގުގައި އަމިއްލަ ދަނޑުގައި ހާލަންޑް ކުޅުނު 28 މެޗުގައި އޭނާ ޖެހި ލަނޑުގެ އަދަދު ވަނީ 36 އަށް އަރާފަ އެވެ.
އަދި މެޗުގެ 29 ވަނަ މިނިޓުގައި ރަޔާން ޗަރކީ ވަނީ އިތުރު ލަނޑެއް ޖަހާ މެޗުގެ ނަތީޖާ 2-0 އަށް ބަދަލުކޮށްފަ އެވެ. ސިޓީ އިން ޖެހި ދެ ލަނޑުވެސް ޖަހަން ފުރުސަތު ތަނަވަސްކޮށްދީފައިވަނީ ޖެރެމީ ޑޯކޫ އެވެ.
މި ސީޒަނުގައި އެދެވޭ ނަތީޖާތަކެއް ހޯދިފައިނުވާ ލިވަޕޫލް އިން ދެވަނަ ބުރުގެ ޖާގައެއް ހޯދާފައިވަނީ ގަރަބަގް އާއި ދެކޮޅަށް ކުޅުނު މެޗު 6-0 ގެ ތަފާތު ބޮޑު ނަތީޖާއަކުން މެޗު ކާމިޔާބު ކޮށްގެންނެވެ.
އެފްރިކަން ކަޕް އޮފް ނޭޝަންސް އަށްފަހު ލިވަޕޫލްގެ ފުރަތަމަ ޓީމުގައި ހިމެނި މުހައްމަދު ސަލާ ވަނީ މޮޅު ކުޅުމެއް މި މެޗުގައި ދައްކާފަ އެވެ.
މި މެޗުގެ 15 ވަނަ މިނިޓުގައި އާޖެންޓީނާގެ މިޑްފީލްޑަރ އެލެކްސިސް މެކަލިސްޓާ ވަނީ ލަނޑެއް ޖަހާ ލިވަޕޫލް އަށް ކުރި ހޯދަދީފަ އެވެ. އަދި އޭގެ ހަ މިނިޓު ފަހުން ފްލޯރިއަން ވާރޓްޒް ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ.
މެޗުގެ ދެވަނަ ހާފުގެ ކުޅުން ފެށުނުތާ ފަސްވަނަ މިނިޓުގައި މުހައްމަދު ސަލާ ވަނީ ލިވަޕޫލް އަށް ލަނޑެއް ކާމިޔާބުކޮށްދީފަ އެވެ. މިއީ މިދިޔަ ނޮވެމްބަރ މަހަށްފަހު ސަލާ ލިވަޕޫލް އަށް ކާމިޔާބުކޮށްދިން ފުރަތަމަ ލަނޑެވެ.
ލިވަޕޫލްގެ އެންފީލްޑްގައި ފަސްދޮޅަސް ހާސް މީހުންގެ ކުރިމަތީގައި ކުޅުނު މި މެޗުގެ 57 ވަނަ މިނިޓުގައި ހޫގޯ އެކިޓީކޭ ލަނޑެއް ކާމިޔާބުކޮށް މެޗުގެ ނަތީޖާ 4-0 އަށް ބަދަލުކުރިތާ ހަތަރު މިނިޓު ފަހުން މެކަލިސްޓާ ވަނީ އިތުރު ލަނޑެއް ޖަހާފަ އެވެ.
މި މެޗުގައި ލިވަޕޫލް އިން ޖެހި ހަވަނަ ލަނޑަކީ މެޗުގެ 90 ވަނަ މިނިޓުގައި ފެޑެރީކޯ ކިއޭސާ ކާމިޔާބުކޮށްދީފައިވާ ލަނޑެކެވެ.
އިނގިރޭސި ޕްރިމިއާ ލީގުގެ ޗެލްސީ އިން ގަދަ އަށެއްގައި ހިމެނި ދެވަނަ ބުރުގެ ޖާގައެއް ހޯދާފައިވަނީ އިޓަލީގެ ނަޕޮލީ އާއި ދެކޮޅަށް ކުޅުނު މެޗު 3-2 ގެ ނަތީޖާއަކުން މެޗު ކާމިޔާބުކޮށްގެންނެވެ.
ޗެލްސީގެ ކުރީގެ ކޯޗު އެންޓޯނިއޯ ކޮންޓޭގެ އިރުޝާދުގެ ދަށުން ކުޅެމުންދާ ނަޕޮލީ އާއި ދެކޮޅަށް ކުޅުނު މި މެޗުގައި ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާއިރު މެޗުގެ 19 ވަނަ މިނިޓުގައި ޗެލްސީ އަށް ލިބުނު ޕެނަލްޓީ އަކުން އެ ޓީމުން ވަނީ ލަނޑެއް ޖަހާ ކުރި ހޯދާފަ އެވެ. މި ލަނޑު އެ ޓީމަށް ކާމިޔާބުކޮށްދީފައިވަނީ އެންޒޯ ފެނާންޑޭޒް އެވެ.
ނަމަވެސް މެޗުގެ 33 ވަނަ މިނިޓުގައި ނަޕޮލީގެ އެންޓޯނިއޯ ވަރްގާރާ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.
މެޗުގެ ފުރަތަމަ ހާފުގެ ކުޅުން ނިމެން ދެ މިނިޓަށް ވެފައިވަނިކޮށް ނަޕޮލީގެ ރަސްމުސް ހޮއިލަންޑް ވަނީ ލަނޑެއް ޖަހާ މި މެޗުގައި ނަޕޮލީ އަށް ކުރި ހޯދަދީފަ އެވެ.
ޗެލްސީގެ ކޯޗު ލިއާމް ރޮޒޭނިއާ ވަނީ މެޗުގެ ދެވަނަ ހާފަށް ނިކުތްއިރު ޕެޑްރޯ ނެޓޯގެ ބަދަލުގައި ކޯލް ޕާމާ ކުޅެން އަރުވާ އެ ޓީމުގެ ކުޅުމަށް ބަދަލުތަކެއް ގެނެސްފައެވެ.
ޗެލްސީ އިން މެޗުގެ ނަތީޖާ އެއްވަރުކޮށްފައިވަނީ މެޗުގެ 61 ވަނަ މިނިޓުގައ ޖޮއާއޯ ޕެޑްރޯ ކާމިޔާބުކޮށްދިން ލަނޑުންނެވެ.
އަދި މެޗުގެ ފުރިހަމަ ވަގުތު ހަމަވާން އަށް މިނިޓަށް ވެފައިވަނިކޮށް ޖޮއާއޯ ޕެޑްރޯ ވަނީ އިތުރު ލަނޑެއް ޖަހާ މެޗުގެ ނަތީޖާ 3-2 އަށް ބަދަލުކޮށްފަ އެވެ. އޭނާ މި މެޗުގެ ދެވަނަ ހާފުގައި ޖެހި ދެ ލަނޑުވެސް ޖަހަން ފުރުސަތު ތަނަވަސްކޮށްދީފައިވަނީ ކޯލް ޕާމާ އެވެ.
މި ނަތީޖާ އާއިއެކު ނަޕޮލީ އަށް ޗެމްޕިއަންސް ލީގުގެ ދެވަނަ ބުރުގެ ފުރުސަތު ވަނީ ގެއްލިފަ އެވެ.
ޗެމްޕިއަންސް ލީގުގެ ދެވަނަ ބުރުގެ ސީދާ ޖާގަ ލިބިގެންދިޔަ އަށް ޓީމުގެ ތެރޭގައި އިނގިރޭސި ޕްރިމިއާ ލީގުގެ ފަސް ޓީމު ހިމެނެ އެވެ.