އިންޑިޔާއިން ނިޕާ ވައިރަސް ޖެހިފައިވާ ދެ މީހުން ފެނުމާ ގުޅިގެން ތައިލެންޑާއި ސިންގަޕޫރާއި ހޮންގްކޮންގްއާއި މެލޭޝިޔާގެ ވައިގެ ބަނދަރުތަކުގައި އެ ބައްޔަށް ސްކްރީން ކުރުމުގެ ކަންކަން ވަރުގަދަކޮށްފިއެވެ.
ނިޕާ ވައިރަސް ފެތުރެނީ ވާލުގެ ވައްތަރެއް ކަމަށްވާ ފްރުޓް ބެޓްއާއި އޫރުފަދަ ބައެއް ޖަނަވާރުގެ ޒަރިއްޔާއިންނެވެ. މި ބައްޔަކީ ގައިންގަޔަށް އަރާ ބައްޔެއް ނަމަވެސް އާންމުގޮތެއްގައި އެ ގޮތަށް ބަލި ފެތުރެނީ ބަލި ޖެހިފައިވާ މީހަކާއެކު ގިނަ ވަގުތު ހޭދަކުރުމުންނެވެ. ނިޕާ ވައިރަސް ޖެހޭ މީހުންގެ ފަރާތުން ފެންނަ ބައެއް އަލާމާތްތަކުގެ ތެރޭގައި ހުން އައުމާއި، ބޮލުގައި ރިއްސުމާއި، ކެއްސުމާއި، ކަރުގައި ރިއްސުމާއި، ނޭވާލާން އުނދަގޫވުން ހިމެނެއެވެ. އަދި ބަލި ބޮޑުވަމުންދާ ވަރަކަށް ސިކުނޑި ދުޅަވެ ވާނުވާ ނޭނގުމާއި، ފިޓުޖެހުން ފަދަ ކަންކަން ވެސް ދިމާވެއެވެ. މި ބަލި ޖެހުމުން އެއްވެސް އަލާމާތެއް ނުފެނި ދާ ފަހަރު ވެސް އާދެއެވެ. މި ބަލި ޖެހޭ މީހުންގެ 40 އިންސައްތައާއި 75 މީހުން އެ ބަލީގައި މަރުވެއެވެ. މި ބައްޔަށް ވަކި ޚާއްޞަ ފަރުވާއެއް ނެތް ނަމަވެސް އަލާމާތްތަކަށް ފަރުވާ ކުރެވެއެވެ. މި ބައްޔާ ދެކޮޅަށް ގިނަ ވެކްސިންތަކެއް ތައްޔާރުކުރަމުންދާ ނަމަވެސް އެ މަސައްކަތް އަދި އޮތީ ތަހުލީލު މަރުޙަލާގައެވެ.
އިންޑިޔާއިން މި ބަލި ފެނިފައި ވަނީ މިދިޔަ ޑިސެމްބަރު މަހުގެ ތެރޭގައެވެ. ނަމަވެސް މަދު ޢަދަދެއްގެ މީހުންނަށް މި ބަލި ޖެހުމަކީ އާބާދީއަށް އޮތް ނުރައްކާ މާ ބޮޑުވާ ޙާލަތެއް ނޫނެވެ. ނަމަވެސް މި ޙާލަތުގައި ވެސް ފަރުވާތެރިވުން މުހިންމު ކަމަށް ކަމާބެހޭ މާހިރުން ލަފާ ދެއްވައެވެ.
ބަލި ފެތުރުން ހުއްޓުވުމަށް ސިންގަޕޫތުގެ ވައިގެ ބަނދަރުގައި އަޅާފައިވާ ފިޔަވަޅުތަކުގެ ތެރޭގައި އިންޑިޔާގެ ވަކި ސަރަޙައްދުތަކަކުން އަންނަ ފްލައިޓުތަކުގައި އެ ޤައުމަށް އެތެރެވާ މީހުންގެ ހަށިގަނޑުގެ ފިނިހޫނުމިން ބެލުން ހިމެނެއެވެ. އެ ޤައުމުގެ ގައިންގަޔަށް އަރާ ބަލިތަކާބެހޭ އިދާރާއިން ބުނީ ދެކުނު އޭޝިޔާގެ ޤައުމުތަކާއެކު މަޢުލޫމާތު ޙިއްޞާކޮށް ޙާލަތު ވަޒަންކުރަމުންދާ ކަމަށެެވެ. ބަލިޖެހިފައިވާ މީހުންގެ ޖިނޯމް ސިކުއެންސިންގއާ ގުޅޭ މަޢުލޫމާތު ޙިއްޞާ ކުރުމަށް ދުނިޔޭގެ ހުރިހާ ޤައުމުތަކަށް ބޭނުން
ކުރެވޭނެ މަންސައެއް ޤާއިމްކުރުމުގެ މަސައްކަތް ކުރިއަށް ދާ ކަމަށް ވެސް އެ އިދާރާއިން ބުނެއެވެ.
ހޮންގްކޮންގުގެ ވައިގެ ބަދަރާގުޅޭ އިދާރާގެ ތަރުޖަމާނު ވިދާޅުވީ ހޮންގްކޮންގު އިންޓަނޭޝަނަލް އެއާޕޯޓުގައި ޞިއްޙަތު ސްކްރީން ކުރުމުގެ މަސައްކަތް ކުރިއަށްދާ ކަމަށާއި، އެ ޤައުމުން ވެސް އިންޑިޔާއިން ދަތުރުކުރާ މީހުންގެ ފިނިހޫނުމިން ބަލަމުންދާ ކަމަށެވެ. ތައިލެންޑުގައި ވެސް އެ ފަދަ ފިޔަވަޅުތަކެއް އަޅާފައިވެއެވެ. އެ ގޮތުން އިންޑިޔާގެ ޚާއްޞަ ސަރަޙައްދުތަކަކުން އަންނަ މަތިންދާ ބޯޓު ޕާކު ކުރުމަށް ޚާއްޞަ ސަރަޙައްދުތައް ކަނޑައަޅާފައިވެއެވެ. އަދި އެ ޤައުމަށް އެތެރެވާ މީހުން އިމިގްރޭޝާން މަރުޙަލާ ނިމުމުގެ ކުރިން ހެލްތު ޑިކްލެރޭޝަނެއް ފުރިހަމަކުރަން ޖެހެއެވެ. މެލޭޝިޔާއިން ވެސް ދަނީ ބޭރު ޤައުމުތަކުން އެ ޤައުމަށް އެތެރެވާ މީހުން، ޙާއްޞަ ގޮތެއްގައި ބަލީގެ ނުރައްކާ ބޮޑު ސަރަޙައްދުތަކުން އެ ޤައުމަށް އެތެރެވާ މީހުންގެ ހެލްތު ސްކްރީނިންގ ފުރިހަމަ ކުރަމުންނެވެ.
ޗައިނާއިން ބުނީ އެ ޤައުމުން ނިޕާ ވައިރަސް ޖެހިފައިވާ މީހަކު މިހާތަނަށް ފެނިފައި ނުވާ ކަމަށެވެ. ނަމަވެސް ބޭރު ޤައުމުތަކުން އެ ޤައުމަށް އަންނަ މީހުންގެ ސަބަބުން ބަލިޖެހިފައިވާ މީހެއް ފެނުމުގެ ހިރާސް އޮތް ކަމަށް އެ ޤައުމުން ބުނެއެވެ. އިންޑިޔާއާއެކު ސަރަޙައްދީ ރޮނގެއް ޙިއްޞާކުރާ ނޭޕާލުން ވެސް ބުނީ އެ ޤައުމު އޮތީ ތައްޔާރީ ޙާލަތުގައި ކަމަށާއި ދަތުރުކުރާ މީހުންގެ ސްކްރީނިންގ ވަރުގަދަކޮށްފައިވާ ކަމަށެވެ.