މަޝްރޫޢުތަކުން ތިމާވެއްޓަށް ގެއްލުން ނުވާނެކަން ކަށަވަރުކުރާނަން

ސަރުކާރުން މަޝްރޫޢުތައް ހިންގަވާނީ ތިމާވެއްޓަށް އެއްވެސް ގެއްލުމެއް ނުވާނޭކަން ކަށަވަރުކުރެއްވުމަށްފަހުކަމަށް މަސްވެރިކަމާއި ކަނޑުގެ ވަސީލަތްތަކާއިބެހޭ ވަޒީރު، އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ ރާއްޖޭގެ ޚާއްސަ އިޤްތިޞާދީ ސަރަޙައްދުތަކުގައި ތެލާއި މަޢުދަން ހޯދުމުގެ މަސައްކަތްތައް ކުރުމުން ރާއްޖޭގެ ތިމާވެއްޓަށް ގެއްލުންވާނެ ކަމަށް ބުނެ ބައެއް ފަރާތްތަކުން ދައްކަމުންދާ ވާހަކަތަކާއި ގުޅިގެނެވެ.

މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު ވިދާޅުވީ ދިވެހިރާއްޖޭގެ ތިމާވެށި ނާޒުކުކަމަށާއި ސަރުކާރުން ކުރިއަށްގެންދާ ހުރިހާ ތަރައްޤީގެ މަސައްކަތްތަކެއްވެސް ކުރިއަށްގެންދާނީ ވަރަށް ބޮޑު ސަމާލުކަމެއް ދެއްވައިގެންކަމަށެވެ. މިގޮތުން ރާއްޖެއަށް ތަޢާރާފުކުރާ ކޮންމެ އައު ތަރައްޤީގެ މަޝްރޫއެއް ނުވަތަ ހޯދުންތައް ހޯދުމުގެ މަސައްކަތްތަކެއް ކުރިއަށްދާނީ، ރާއްޖޭގެ ކަނޑުފަޅުގެ ދިރުންތަކަށް ނުވަތަ ތިމާވެށީގެ ދެމެހެއްޓެނިވި ކަމަށް އެއްވެސް އުނިކަމެއް ނާންނާނެހެން، ހަރުދަނާ އަދި ދެފުށް ފެންނަ ތިމާވެށީގެ އެސެސްމަންޓްތައް ހެދުމަށްފަހުކަމަށް މިނިސްޓަރު ވިދާޅުވިއެވެ. އަދި މިފަދަ ހުރިހާ މަސައްކަތްތަކެއް ކުރާނީ ދިވެހިރާއްޖޭގެ ޤައުމީ މަސްލަހަތާއި އެއްގޮތަށް އަމަލުކުރާ، އިތުބާރު ހިފޭ އަދި ފަންނީ ޤާބިލުކަން ހުރި އިންވެސްޓަރުންނާ ގުޅިގެންކަމަށްވެސް މިނިސްޓަރު ވިދާޅުވިއެވެ.

President Dr. Mohamed Muizzu's strategic plan to diversify the Maldivian economy beyond tourism and fisheries represents a visionary and pragmatic step toward long-term resilience. Our economy is vulnerable to external shocks and by broadening our economic base, we reduce these… https://t.co/KKfqVGOc78

— Ahmed Shiyam (@Shiyamaldives) January 28, 2026

މިނިސްޓަރު ވިދާޅުވީ ފަތުރުވެރިކަމާއި މަސްވެރިކަމުގެ ސިނާޢަތުގެ އިތުރުން ރާއްޖޭގެ އިޤުތިޞާދު ސިންދަފާތު ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ އިސްތިރާޖީ ރޭވުމަކީ، ދުރު މުސްތަގުބަލުގެ ބަދަހިކަމަށްޓަކައި މުހިންމު ދުރުވިސްނޭ ވިސްނުންފުޅެއްކަމަށެވެ. ދިވެހިރާއްޖޭގެ ޚާއްސަ އިޤުތިޞާދީ ޞަރަޙައްދަކީ ދުނިޔޭގެ އެންމެ ބޮޑު އެއް ޚާއްސަ އިޤުތިޞާދީ ޞަރަޙައްދަށްވާއިރު، މިސަރަޙައްދުގެ ބޭނުން ހިފިފައިވަނީ ވަރަށް ކުޑަކޮށްކަމަށާއި، ދިވެހިރާއްޖޭގެ ކަނޑުތަކުގައިވާ މުއްސަނދިކަން ފަރުވާތެރިކަމާއެކު ހޯދައި ތަރައްގީކުރުމަކީ، ދެމެހެއްޓެނިވި ގޮތެއްގައި ވަސީލަތްތައް ބޭނުންކުރުމަށް ހުޅުވިގެންދާ އާ މަގުތަކެއްކަމަށް މިނިސްޓަރު ވިދާޅުވިއެވެ.

މިނިސްޓަރު ފާހަގަކުރައްވާގޮތުން، ރައީސުލްޖުމްޙޫރިއްޔާ ރާއްޖޭގެ އިޤުތިޞާދު ސިންދަފާތުކުރުމަށް ގެންގުޅުއްވާ ވިސްނުންފުޅުގެ ސަބަބުން ރާއްޖޭގެ އިޤުތިޞާދީ ބިންގާ ފުޅާވެ، އިޤުތިޞާދަށް ބޭރުގެ ނުފޫޒުތަކުގެ ސަބަބުން ކުރާ އަސަރުތައް ކުޑަވާނެކަމަށް މިނިސްޓަރު ފާހަގަކުރެއްވިއެވެ. މިގޮތުން، އައު އީޖާދުތަކަށް މަގުފަހިވެ، 'ބްލޫ އިކޮނޮމީ' ނުވަތަ ނޫ އިގްތިސާދު ކުރިއަރަމުން އަންނަ މަރުކަޒަކަށް ރާއްޖެ ވެގެންދާނެކަންވެސް ވަޒީރު ފާހަގަކުރެއްވިއެވެ. އަދި އޭގެ ސަބަބުން މެރިން ޖިއޮލޮޖީ، ސަބްސީ އިންޖިނިއަރިން، އެންވަޔަރަންމަންޓަލް ސައިންސް، އަދި މޮނިޓަރިންގ ފަދަ ހާއްސަ ދާއިރާތަކުން ފެންވަރު ރަނގަޅު، ހުނަރުވެރި ވަޒީފާގެ ފުރުސަތުތައް އުފެދި، އަމިއްލަ ގާބިލުކަމާއި ތަޖުރިބާ ބިނާކުރެވޭނެކަމަށް ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެ ވަނީ ދިވެހިރާއްޖޭގައި ޤާއިމުކުރާ ސްޕެޝަލް އިކޮނޮމިކް ޒޯން، އެސްއީޒެޑެއްގައި ހިންގިދާނެ އިޤްތިޞާދީ މަސައްކަތްތަކާއި، އެއިން ޒޯނެއްގައި ހިމެނޭ ޖުމްލަ އިންވެސްޓްމަންޓުގެ އެންމެ ކުޑަ މިންގަނޑު އަލުން ކަނޑައަޅުއްވާފައެވެ. މީގެތެރެއިން މަދުވެގެން 100 މިލިއަން ޑޮލަރު އިންވެސްޓްކުރަން ޖެހޭ އިގުތިސޯދީ މަސައްކަތްތަކުގެ ލިސްޓަށް ބަދަލު ގެންނަވައިފައިވާއިރު، ގޭސް އެކްސްޕްލޮރޭޝަންގެ މަސައްކަތްތަކާއެކު ތެލާއި ގޭހާއި މިނަރަލް އެކްސްޕްލޮރޭޝަންގެ މަސައްކަތްތައް ވަނީ ހިމަނުއްވާފައެވެ.