މެނުއަލްކޮށް ފޯމު ބަލައިގަތުމުގެ ވިސްނުމެއް ނެތް

އަންނަ އޭޕްރިލް މަހު ބާއްވާ ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގައި ވާދަކުރަން މެނުއަލްކޮށް ފޯމު ހުށަހެޅުމުގެ ފުރުސަތު ދިނުމުގެ ވިސްނުމެއް ނުގެންގުޅުއްވާކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

އެކޮމިޝަނުން މިހެން ވިދާޅުވީ އޮންލައިންކޮށް ފޯމު ހުށަހެޅުމުގެ އިތުރުން މެނުއަލްކޮށްވެސް ފޯމު ބަލައިގަންނަންޖެހޭ ކަމަށް ސިޔާސީ ބައެއް ފަރާތްތަކުންނާއި ސިޔާސީ ޕާޓީތަކުން ބުނުމާ ގުޅިގެން ޕީއެސްއެމް ނިއުސްއަށް މައުލޫމާތު ދެއްވަމުންނެވެ.

އިލެކްޝަންސް ކޮމިޝަންގެ ނައިބު ރައީސް ޢަބްދުއްރަޙްމާން ޞަލާހު ރަޝީދު ވިދާޅުވީ އެ ކޮމިޝަންގެ މައި ޕޯޓަލް މެދުވެރިކޮށް ފޯމު ހުށަހެޅުމުގެ ފުރުސަތު ހުޅުވާލި ފަހުން މިހާތަނަށް 2،200 އަށްވުރެ ގިނަ ފޯމު ހުށަހަޅާފައިވާއިރު ފޯމު ހުށަހެޅި އެއްވެސް ކެންޑިޑޭޓަކު ފޯމު ހުށަހެޅުމުގައި އުނދަގޫތަކެއް ކުރިމަތިވާކަން އެ ކޮމިޝަނާ ހިއްސާކޮށްފައި ނުވާ ކަމަށެވެ. ގިނަ ފަރާތްތަކުން އޮންލައިންކޮށް ފޯމު ހުށަހަޅަން ފަސޭހަކަން ފާހަގަކުރައްވާ ކަމަށާއި އަދި ކޮންމެ ތަނެއްގައި ހުރެގެންވެސް ފޯމު ހުށަހެޅޭތީއާއި ފޯމުގެ އަޕްޑޭޓް ޕޯޓަލް މެދުވެރިކޮށް ބަލާލެވޭތީ އެކަން ފަސޭހަކަން ފާހަގަކުރައްވާކަމަށް ޞަލާހު ވިދާޅުވިއެވެ.

ޞަލާހު ވިދާޅުވީ ޕޯޓަލް މެދުވެރިކޮށް ކެންޑިޑޭޓުން ހުށަހަޅާ ލިޔެކިޔުންތަކުގެ ސައްޙަކަން ފަސޭހަކަމާއެކު ކަށަވަރުކުރެވޭ ކަމަށެވެ. އަދި އެ ފޯމުތަކަށް ޖަވާބު ދިނުންވެސް އަވަސް ކަމަށާއި މިއީ ކުރިމަތިލާ ކެންޑިޑޭޓުންނަށްވެސް ލުއިގޮތެއްކަން ފާހަގަކުރެއްވިއެވެ.

އިލެކްޝަންސް ކޮމިޝަނުން އިންތިޚާބަށް ކުރިމަތިލާން ހުޅުވާލީ މި މަހުގެ 17ވަނަ ދުވަހުއެވެ. މި ފުރުސަތު އަންނަ ފެބްރުއަރީ މަހުގެ 1ވަނަ ދުވަހާ ހަމައަށް ހުޅުވާލި ނަމަވެސް 7 ޖެނުއަރީން ފެށިގެން ޕޯޓަލް ހުޅުވާލައި ފޯމު ފުރުމުގެ ފުރުސަތު އެ ކޮމިޝަނުން ވަނީ ދީފައެވެ. މިއީ މީގެ ކުރިން ދެވޭ ފުރުސަތެއް ނޫންކަމަށާއި އޭގެ ސަބަބުންވެސް ކުރިއާލައި ފޯމު ހުށަހެޅުމަށް ގިނަ ބަޔަކަށް ލުއިތަކެއް ލިބިގެންދިޔަ ކަމަށްވެސް ޞަލާހު ވިދާޅުވިއެވެ.

ޞަލާހު ވިދާޅުވީީ މި ސަބަބުތަކާހުރެ މެނުއަލްކޮށް ފޯމު ބަލައިގަތުމުގެ އެއްވެސް ވިސްނުމެއް އެ ކޮމިޝަނުން ނުގެންގުޅުއްވާ ކަމަށެވެ.

އިލެކްޝަންސް ކޮމިޝަނުން އެންމެފަހުން އާންމުކުރެއްވި ހިސާބުތަކުން ދައްކާ ގޮތުގައި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގައި ވާދަކުރުމަށް 10 ދުވަހުގެ ތެރޭގައި 2،254 ފޯމު ވަނީ ހުށަހަޅާފައެވެ. އެއީ، ކައުންސިލްތަކަށް ވާދަކުރުމަށް ހުށަހެޅި 1،276 ފޯމާއި، އަންހެނުންގެ ކޮމިޓީތަކަށް ވާދަކުރުމަށް ހުށަހެޅި 978 ފޯމެވެ.

ކައުންސިލްތަކަށް ވާދަކުރުމަށް ސިޔާސީ ޕާޓީތަކުން މިހާތަނަށް 994 ފޯމު ހުށަހަޅާފައިވާއިރު، އޭގެ ތެރެއިން ޝަރުތު ފުރިހަމަވާ ކަމަށް އިލެކްޝަންސް ކޮމިޝަނުން ކަނޑައަޅާފައިވަނީ 852 ފޯމެވެ. އަދި ޕާޓީތަކުން ހުށަހެޅި ފޯމުތަކުގެ ތެރެއިން 142 ފޯމެއް ޝަރުތު ހަމަނުވާ ކަމަށް ކަނޑައަޅާފައިވާއިރު، އޭގެ ތެރެއިން 84 ފަރާތަކުން ވަނީ އަލުން ފޯމު ހުށަހަޅާފައެވެ.

ކައުންސިލްތަކަށް އަމިއްލަ ގޮތުން ވާދަކުރަން 282 ފޯމު ހުށަހަޅާފައިވާއިރު، އޭގެ ތެރެއިން 188 މީހުންގެ ޝަރުތު ފުރިހަމަވެއެވެ. އަދި 94 މީހުންގެ ޝަރުތު ފުރިހަމަނުވާ ކަމަށް އިލެކްޝަންސް ކޮމިޝަނުން ވަނީ ކަނޑައަޅާފައެވެ. ޝަރުތު ހަމަނުވާ ކަމަށް ކަނޑައެޅި ފޯމުތަކުގެ ތެރެއިން 49 މީހުން އަލުން ފޯމު ހުށަހަޅާފައިވާ ކަމަށްވެސް އިލެކްޝަނުން މައުލޫމާތު ދެއްވައެވެ.

އަންހެނުންގެ ކޮމިޓީތަކަށް ސިޔާސީ ޕާޓީތަކުން މިހާތަނަށް 795 ފޯމު ހުށަހަޅާފައިވާއިރު، ޝަރުތު ހަމަވަނީ 692 މީހުންނެވެ. އަދި ޝަރުތު ހަމަނުވާކަމަށް ކަނޑައެޅި 103 މީހުންގެ ތެރެއިން 54 މީހުން އަލުން ފޯމު ހުށަހަޅާފައިވާ ކަމަށް އިލެކްޝަންސް ކޮމިޝަނުން ވިދާޅުވިއެވެ. އަމިއްލަގޮތުން ވާދަކުރަން ފޯމު ހުށަހެޅި 183 މީހުންގެ ތެރެއިން 125 މީހެއްގެ ޝަރުތު ފުރިހަމަވާކަމަށް ވަނީ ކަނޑައަޅާފައެވެ.

އިލެކްޝަންސް ކޮމިޝަނުން ވަނީ ވޯޓުލުން ފިޔަވައި އެ ކޮމިޝަނުން ފޯރުކޮށްދޭ ހުރިހާ ޚިދުމަތެއް ޑިޖިޓަލް ކުރުމުގެ ވިސްނުން ގެންގުޅުއްވާކަމަށް މީގެ ކުރިން އިއުލާންކުރައްވާފައެވެ. އަދި އެ ތަސައްވުރާ އެއްގޮތަށް މީގެ ކުރިން ބޭއްވި ބައެއް އާންމު އިންތިޚާބުތަކާއި ބައި އިލެކްޝަންތަކުގައި އޮންލައިންކޮށް ބައެއް ޚިދުމަތްތައް ހޯދޭގޮތަށް ވަނީ ބަދަލު ގެންނަވާފައެވެ.