ހުޅުމާލެ ދެވަނަ ފިޔަވަހީގައި އިތުރު ސްކޫލެއް އަޅަނީ

ހުޅުމާލެ ދެވަނަ ފިޔަވަހީގައި އިތުރު ސްކޫލެއް ތަރައްޤީކުރުމުގެ މަސައްކަތް ކުރަމުންދާ ކަމަށް ތަޢުލީމީ ވަޒީރު ޑރ.އިސްމާޢީލު ޝަފީޢު ވިދާޅުވެއްޖެއެވެ.

ވަޒީރު މިހެން ވިދާޅުވީ، ހުޅުމާލެ ދެވަނަ ފިޔަވަހީގައި ތަރައްޤީކޮށްފައިވާ ޝަހީދު ޢަލީ ސްކޫލު ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

ތަޢުލީމީ ވަޒީރު ޑރ.އިސްމާޢީލް ޝަފީޢު ވިދާޅުވީ، ރާއްޖޭގެ ތަޢުލީމީ ނިޒާމު ހަރުދަނާ ކުރުމަށް ވޭތުވެދިޔަ ދެ އަހަރު ތެރޭ ގިނަ މަސައްކަތްތަކެއް ކޮށްފައިވާ ކަމަށެވެ. އަދި ޚާއްސަކޮށް މާލޭގެ ސްކޫލުތަކާއި އަތޮޅުތެރޭގެ ސްކޫލުތަކަށް ކުރިއެރުން ގެނެސްދިނުމުގައި އެއްވެސް ތަފާތު ކުރުމެއްނެތި މި ސަރުކާރުން މަސައްކަތް ކުރައްވަމުންދާކަން ވަޒީރު ފާހަގަކުރެއްވިއެވެ.

އަދި މީގެކުރިން ސްކޫލްތަކަށް އަޅާނުލާ މިންވަރަކަށް މި ސަރުކާރުން ސްކޫލްތަކަށް އަޅާލާކަން ވަޒީރު ފާހަގަކުރެއްވިއެވެ. ސްކޫލުތައް މަރާމާތު ކުރުމާއި، ޢުމްރާނީ ގޮތުން ސްކޫލުތަކަށް ގެންނަންޖެހޭ ބަދަލުތައް ގެނައުމުގައި މުހިންމު މަސައްކަތްތަކެއް ކުރެވިފައިވާކަން ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، ރާއްޖޭގެ ތަޢުލީމީ ނިޒާމު ހަރުދަނާ ކުރުމަށް ކުރާ މަސައްކަތްތަކުގެ ތެރެއިން މިހާރުވެސް ހުޅުމާލެ ދެވަނަ ފިޔަވަހީގައި އިތުރު ސްކޫލެއް ތަރައްޤީ ކުރުމުގެ މަސައްކަތް ކުރަމުންދާ ކަމަށެވެ.

"ކުރިއަށްވެސް ހުޅުމާލޭގައި މަޝްރޫޢުތައް އެބަހުރި. ޚާއްސަކޮށް ދެވަނަ ފިޔަވައްސަށް ޚާއްސަކޮށް ތަޢުލީމީ ވުޒާރާއިން އަޅުގަނޑުމެން މިހާރު ކޮންސެޕްޓް ފައިނަލް ކުރެވި، ޑިޒައިން މަރުޙަލާ މިހާރުވާނީ އެހެން ސްކޫލަކަށް ފެށިފަ". ވަޒީރު ވިދާޅުވިއެވެ.

މީގެއިތުރުން ވަޒީރު ވަނީ، ދަރިވަރުންނަކީ އަމިއްލަ އުނގެނުމަށް ޒިންމާވާ ބައެއްގެ ގޮތުގައި ބައްޓަން ކުރަންޖެހޭ ކަމަށް ވިދާޅުވެފައެވެ.

" ދަރިވަރުންނަށް ކިޔެވުމަށް މިނިވަންކަމެއް ދޭންޖެހޭ. އުނގެނުމަށް ޒިންމާދާރު ޖީލެއް ބިނާކުރެވިއްޖެނަމަ، މަސައްކަތުގެ މާހައުލުގައިވެސް އެކުދިންނަކީ ޒިންމާދާރު ބަޔަކަށް ވެގެންދާނެ. އަދި އަމިއްލަ ދިރުއުޅުމާއި މެދު ހަމަ ޔަޤީނުންވެސް މާ ޒިންމާދާރު ބައެއްގެ ގޮތުގަ އެކުދިން ތަރުބިއްޔަތު ވެގެންދާނެ". ވަޒީރު ވިދާޅުވިއެވެ.

ވަޒީރު ވިދާޅުވީ، ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ ޝަހީދު ޢަލީ ސްކޫލުގައި މިއަހަރު 2100އަށްވުރެ ގިނަ ދަރިވަރުން ތަޢުލީމު ހާސިލްކުރާނެ ކަމަށެވެ. އަދި އޭގެތެރެއިން %77 ދަރިވަރުންނަކީ އަތޮޅުތެރޭގެ ރަށްރަށަށް ނިސްބަތްވާ ދަރިވަރުންކަން ވަޒީރު ފާހަގަކުރެއްވިއެވެ.