"ޙުސައިންގެ ވިވިޑް ރިއަލިޒަމް"، ތާރީޚާއި ސަޤާފަތް ދައްކުވައިދޭ ތަފާތު ކުރެހުންތަކެއް!

މަޝްހޫރު ކުރެހުންތެރިޔާ ހުސެއިން އަލިމަނިކުގެ އާޓް އެގްޒިބިޝަން "ވިވިޑް ރިއަލިޒަމް"ގައި ދިވެހި ތާރީޚާއި ސަޤާފަތް ދައްކުވައިދޭ އެތަކެއް ކުރެހުންތަކެއް އެބަހުއްޓެވެ. ހުސެއިންގެ މި ކުރެހުންތައް ބަލާލުމަށްޓަކައި އެ އެގްޒިިޝަންއަށް ދިވެހީންގެ އިތުރުން ފަތުރުވެރިންވެސް ޒިޔާރަތްކުރެއެވެ.

"ވިވިޑް ރިއަލިޒަމް - މައި ޖާނީ ތްރޫ ދަ ކަލަރސް އޮފް ނޭޗަރ" އަކީ ކުރެހުންތެރިޔާ ހުސެއިން އަލިމަނިކުގެ ތަފާތު އެކި ކުރެހުންތައް ދައްކާލުމަށް ބާއްވާ އެގްޒިބިޝަނެކެވެ.

ހުސެއިން އަލިމަނިކުގެ މި އެގްޒިބިޝަންގައި ހިމެނޭ ކުރެހުންތަކުން ދިވެހި ތަރިކަައާއި ސަޤާފަތުގެ މުހިންމު މަސައްކަތްތައް ދައްކުވައިދެއެވެ. ޕީއެސްއެމް ނިއުސްއާ ވާހަކަދައްކަވަމުން މި އެގްޒިބިޝަންގެ ކިއުރޭޓަރ ޒުރައިޤް މުހައްމަދު ވާފިރު ބުނީ، އެގްޒިބިޝަންއިން ދައްކުވައިދޭ ކޮންމެ ކުރެހުމަކުންވެސް ޤައުމީ ރޫހު ދައްކުވައިދޭކަމަށެވެ.

"މި އާޓް އެގްޒިބިޝަންއަކީ ހުސެއިންގެ ފުރަތަމަ ސޯލާ އާޓް އެގްޒިބިޝަން ވިވިޑް ރިއަލިޒަމް - މައި ޖާނީ ތްރޫ ދަ ކަލަރސް އޮފް ނޭޗަރ. މި އާޓް އެގްޒިބިޝަންގައި ހުންނާނެ 30 އާޓްޕީސް. އެއީހަމަ މިކްސްޑް މީޑިއާ ޑިޖިޓަލްބއާޓް ހުންނާނީ. ދިވެހިރާއްޖޭގެ ސަގާފަތާއި ސަގާފީ އެކި ކަހަލަ ކަންތައްތައް ދޭހަކޮށްދޭ އާޓް މިތާ ހަމަ އެއްކޮށްވެސް ހުންނާނީ. މަސްވެރިކަމާއި ބޮޑުބެރާއި ދަނޑިޖެހުން. ލިޔެލާޖެހުމާއި ހުރިހާ އެއްޗެއް ދޭހަކޮށްދޭ ކުރެހުންތައް ހުންނާނީ" ޒުރައިޤް ބުންޏެވެ.

ހުސެއިން އަލިމަނިކުގެ ވިވިޑް ރިއަލިޒަމްގައި އެގްޒިބިޝަންގައި ޖުމްލަ 30 އާޓްވޯކެއް ހިމެނެއެވެ. އެއީ މުޅިންވެސް ޑިޖިޓަލް މިކްސް މީޑިއާ ޕެއިންޓްތަކެއްކަމަށް އެގްޒިބިޝަން އިންތިޒާމްކުރާ ފަރާތުން ބުނެއެވެ.

މި އެގްޒިބިޝަން ކުރިއަށްދާނީ މި މަހުގެ 23 އިން 30 އަށް ނޭޝަނަލް އާޓް ގެލަރީގައެވެ. އެގްޒިބިޝަން ހުޅުވާފައި ހުންނާނީ ހުކުރު ދުވަސް ފިޔަވާ ކޮންމެ ދުވަހަކު ހެނދުނު 10:00 އިން ރޭގަނޑު 10:00 އަށެވެ. ހުކުރު ދުވަހު އެގްޒިބިޝަން ހުޅުވިފައި ހުންނާނީ ހަވީރު 4:00 އިން ރޭގަނޑު 10:00 އަށެވެ.

7 ދުވަހުގެ މުއްދަތަކަށް މި އެގްޒިބިޝަންއަށް ވީހާވެސް ގިނަ ފަރާތްތަކުން ޒިޔާރަތްކޮށް ކުރެހުންތައް ބަލާލުމަކީ، އެގްޒިބިޝަން އިންތިޒާމްކުރާ ފަރާތްތަކުގެ އެދުމެކެެވެ.