އިނގިރޭސި ޕްރިމިއާ ލީގުގައި ރޭ ވޮލްވްސް އާއި ދެކޮޅަށް މެންޗެސްޓަރ ޔުނައިޓެޑް ކުޅުނު މެޗު 4-1 ގެ ނަތީޖާއަކުން ޔުނައިޓެޑް މޮޅުވެ ތާވަލުގެ ހަވަނަ މަގާމް ހޯދައިފި އެވެ.
މި މެޗުން ޔުނައިޓެޑް މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 15 މެޗުން ޖުމްލަ 25 ޕޮއިންޓާއެކު ތާވަލުގެ ހަވަނަ މަގާމް ލިބިފަ އެވެ. މި މެޗުން ބަލިވި ވޮލްވްސް އަށް ލިބިފައިވާ 2 ޕޮއިންޓާއެކު އެ ޓީމު އޮތީ ތާވަލުގެ ފުލުގަ އެވެ. އަދި އެ ޓީމު އެންމެ ފަހުން ކުޅުނު އަށް މެޗުންވެސް ވަނީ ބަލިވެފަ އެވެ.
ވޮލްވްސްގެ މޮލިނެކްސް ސްޓޭޑިއަމްގައި ކުޅުނު މި މެޗު ފެށުމުގެ ކުރިން ވޮލްވްސްގެ ސަޕޯޓަރުން ވަނީ އެ ޓީމުގެ ޗައިނާގެ ބިލިއަނަރު މަގާމުން އިސްތިއުފާ ދިނުމަށް ގޮވާލާ މުޒާހަރާ ކޮށްފަ އެވެ.
މި މެޗުގެ 25 ވަނަ މިނިޓުގައި މެންޗެސްޓަރ ޔުނައިޓެޑްގެ ކެޕްޓަން ބްރޫނޯ ފެނާންޑޭޒް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.
ނަމަވެސް ފުރަތަމަ ހާފުގެ އިތުރު ވަގުތުގެ ކުޅުމުގައި ވޮލްވްސްގެ ބެލެގާޑް ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. މިއީ ލަނޑެއް ނުޖެހި 540 މިނިޓު ކުޅުމަށްފަހު އެ ޓީމުން ޖެހި ފުރަތަމަ ލަނޑެވެ.
މެންޗެސްޓަރ ޔުނައިޓެޑް އިން މި މެޗުގައި ދެވަނަ ފަހަރަށް ލީޑު ނަގާފައިވަނީ ދެވަނަ ހާފުގެ ކުޅުން ފެށުނުތާ ހަވަނަ މިނިޓުގައި ބްރަޔަން އެމްބުއޭމޯ ކާމިޔާބުކޮށްދިން ލަނޑުންނެވެ.
މި މެޗުގައި މެންޗެސްޓަރ ޔުނައިޓެޑް އިން ޖެހި ތިންވަނަ ލަނޑަކީ މެޗުގެ 62 ވަނަ މިނިޓުގައި މިޑްފީލްޑަރ މޭސަން މައުންޓް ކާމިޔާބުކޮށްދީފައިވާ ލަނޑެކެވެ.
އަދި މެޗުގެ ފުރިހަމަ ވަގުތު ހަމަވާން އަށް މިނިޓަށް ވެފައިވަނިކޮށް ބްރޫނޯ ފެނާންޑޭޒް ވަނީ އިތުރު ލަނޑެއް ޖަހާ މެޗުގެ ނަތީޖާ 4-1 އަށް ބަދަލުކޮށްފަ އެވެ.
ވޮލްވްސް އިން އަންނަ ހޮނިހިރު ދުވަހު އާސެނަލް އާއި ދެކޮޅަށް ރަށުން ބޭރުގައި ކުޅޭއިރު މެންޗެސްޓަރ ޔުނައިޓެޑް ނިކުންނާނީ ބޯންމަތު އާއި ދެކޮޅަށެވެ.