ދިވެހިރާއްޖޭގެ އިޤްތިޞާދު އިތުރަށް ހަރުދަނާ ކުރެއްވުމަށް ސަރުކާރުން ކުރައްވާ މަސައްކަތްތަކުގެ ދަށުން ދިވެހިރާއްޖޭގައި ވަރަށް އަވަހަށް ސޮވްރިން ކްރެޑިޓް ރޭޓިން ހައްދަވަން ފަށްޓަވާނެ ކަމަށް ފިނޭންސް މިނިސްޓަރ އަޙްމަދު މުނައްވަރު ވިދާޅުވެއްޖެއެވެ.
މިނިސްޓަރ ވިދާޅުވީ ކައިރި މުސްތަޤްބަލެއްގައި މި ރޭޓިންގ ޝާއިޢު ކުރައްވާނެކަމަށެވެ. "ސޮވްރިން ކްރެޑިޓް ރޭޓިންގ" އަކީ ޤައުމަކުން މާލީގޮތުން ކަނޑައަޅާފައިވާ އަމާޒުތަކަށް ވާސިލުވުމުގެ ފުރުޞަތު އޮތް މިންވަރާއި، އިންވެސްޓަރުންނަށް ޤައުމެއްގައި އިންވެސްޓްކޮށްގެން ލިބޭނެ މާލީ ކަށަވަރުކަން ދައްކުވައިދޭ އެއްޗެކެވެ. ފިނޭންސް މިނިސްޓަރ ވިދާޅުވީ ރާއްޖޭގެ "ސޮވްރިން ކްރެޑިޓް ރޭޓިންގ" އާންމުކުރެއްވުމަށްޓަކައި ބައިނަލްއަޤްވާމީ ކުންފުންޏެއްކަމަށްވާ މޫޑީސް އިންވެސްޓަރ ސަރވިސަސްއާ ހަވާލުކޮށްގެން ކްރެޑިޓް ރޭޓިންގ ހަދައި ނިންމަވާފައިވާކަމަށާއި، އެ ޝާއިޢުކުރެއްވުމަށް ނިންމަވާފައިވާކަމަށެވެ.
މިއީ ދިވެހިރާއްޖޭގެ އިޤްތިޞާދަށް އޮތް ހެޔޮފާލެއް ކަމަށާއި، އިގްތިޞާދީ ގޮތުން ތަރައްޤީ ހާޞިލުކުރައްވައި ބައިނަލްއަޤްވާމީ އިގްތިޞާދަށް ރާއްޖެ ހުޅުވާލުމަށް ކުރަމުންދާ މަސައްކަތަށް ލިބިގެންދިޔަ އިތުރު ބާރެއްކަމަށް ފިނޭންސް މިނިސްޓަރ ވިދާޅުވިއެވެ.
ރާއްޖޭގެ "ސޮވްރިން ކްރެޑިޓް ރޭޓިންގ" ޝާއިޢު ކުރެއްވުމާއެކު ސަރުކާރުން މާލީގޮތުން ކަނޑައަޅުއްވާފައިވާ އަމާޒުތަކަށް ވާސިލުވުމުގެ ފުރުޞަތު އޮތް މިންވަރާއި، އިންވެސްޓަރުންނަށް ރާއްޖޭގައި އިންވެސްޓްކޮށްގެން ލިބޭނެ މާލީ ކަށަވަރުކަން އެނގިގެންދާނެއެވެ. މިއީ ރާއްޖެއަށް އިތުރު އިންވެސްޓަރުން އައުމަށް ހުޅުވިގެންދާ ފުރުޞަތެއްކަމަށް މިނިސްޓަރ ވިދާޅުވިއެވެ. މިއީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމްގެ ރިޔާސީ އެޖެންޑާގެ ތެރޭގައި ހިމެނޭ ވަރަށް މުހިއްމު ކަމެއް ކަމަށާއި މިފަދަ ކަމެއް ތަޢާރަފް ކުރެއްވުމަކީ ރައީސް ވަރަށް ބޮޑު އިސްކަމެއް ދެއްވާ ކަމެއްކަމުގައިވެސް ފިނޭންސް މިނިސްޓަރ ވިދާޅުވިއެވެ.