ފުޓުބޯޅަ އަދި ފުޓްސަލް ރެފުރީ ކޯސް މި ފަހަރު އައްޑޫ ސިޓީ މީދޫގައި

އައްޑޫ ސިޓީ މީދޫގައި ކުރިއަށްގެންދިއުމަށް ހަމަޖެހިފައިވާ ފުޓުބޯޅަ އަދި ފުޓްސަލް ރެފުރީން ތަމްރީނުކުރުމަށް ހިންގާ ކޯހުގައި ބައިވެރިވުމުގެ ފުރުސަތު ހުޅުވާލައިފިއެވެ.

މި ކޯހަކީ ކުޅިވަރާއި ހަށިހެޔޮކަމާ ބެހޭ ވުޒާރާގެ ދަށުން ހިންގަމުން އަންނަ މޯލްޑިވްސް ނެޝަނަލް އިންސްޓްޓިއުޓް އޮފް ސްޕޯޓްސް (އެމްއެންއައިއެސް) އިން އިންތިޒާމުކޮށްގެން ކުރިއަށްގެންދާ ކޯހެކެވެ.

ނުވަ ދުވަހުގެ މުއްދަތަށް ކުރިއަށްގެންދާ މި ކޯސް ބޭއްވުމަށް ހަމަޖެހިފައިވަނީ މިފެށޭ ޑިސެމްބަރުމަހުގެ 6 އިން 15 އަށެވެ. މިކޯހުގައި ބައިވެރިވުމުގެ ސުންގަޑި ޑިސެމްބަރު މަހުގެ ދެވަނަ ދުވަހާ ހަމައަށް ވަނީ ހުޅުވާލާފައެވެ. މިކޯހަކީ 30 ބައިވެރިންގެ ޖާގައިގެ ކޯހަކަށްވާއިރު މިކޯހުގައި ބައިވެރިވުމުގެ ފުރުސަތު ރާއްޖޭގެ ހުރިހާ ހިސާބަކަށްވަނީ ހުޅުވާލާފައެވެ.

ފުޓްބޯލް އެންޑް ފުޓްސަލް ރެފްރީޒް ކޯސް ކާމިޔާބުކަމާއެކު ނިންމާ ފަރާތްތަކަށް ސެޓްފިކެޓް ލިބިގެންދާއިރު މިފަރާތްތަކަށް ފުޓުބޯޅަ އަދި ފުޓްސަލް މުބާރާތްތަކުގައި ރެފުރީކަން ކުރުމުގެ ފުރުސަތު ލިބިގެންދާނެކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.

މިކޯހުގައި ކިޔަވައިދޭނީ މިކަމުގެ ތަޖުރިބާހުރި އެފްއޭއެމްގެ އިންސްޓްރަކްޓަރުންނެވެ.

އެމްއެންއައިއެސްއިން މިއަހަރު މިހާތަނަށް ފުޓްބޯޅަ އަދި ފުޓްސަލްގެ ސަރޓިފައިޑް 90 ރެފުރީން ވަނީ ތަމްރީނުކޮށްފައެވެ. ކުޅިވަރާ ބެހޭ ވުޒާރާގެ އަމާޒަކީ މިދާއިރާއިން ގިނަ އަދަދަކަށް މީހުން ތަމްރީނުކޮށް ރާއްޖޭގެ ހުރިހާ ހިސާބެއްގައި ސަރޓިފައިޑް ރެފްރީންނާއި އަމްޕަޔަރުން އަދި ކޯޗުން އިތުރުކުރުމެވެ.