ބާރުގަދަ ތޫފާން ބުއަލޯއި ވިއެޓްނާމަށް އަރައިފި، އަށް މީހުން މަރުވެ ގިނަ ޢަދަދެއްގެ ގެދޮރަށް ގެއްލުން
ބާރުގަދަ ތޫފާނެއް ކަމުގައިވާ ބުއަލޯއި ވިއެޓްނާމްގެ ރަށްތަކަށް އެރުމާ ގުޅިިގެން ހިނގި ނުރައްކާތެރި ހާދިސާތަކެއްގައި އަށް މީހުން މަރުވެ، އިތުރު 17 މީހަކު ގެއްލިއްޖެއެވެ. ސެޕްޓެންބަރު 29ވަނަ ދުވަހު ތޫފާން ބުއަލޯއި އެންމެ ފުރަތަމަ އަރާފައި ވަނީ އެ ޤައުމުގެ އައްސޭރިފަށުގެ ސަރަޙައްދުތަކަށެވެ. އެ ތޫފާނާ އެކު އާދަޔާ ޚިލާފަށް ވައިބާރުވެފައިވާއިރު، އެ ސަރަޙައްދުތަކަށް ބޯކޮށް ވާރޭ ވެހެމުންދާ ކަމުގައި އެ ޤައުމުގެ ކަމާ ގުޅޭ އިދާރާތަކުން ރިޕޯޓު ކުރިއެވެ.
ތޫފާނާ އެކު ޖެހެމުންދާ ބާރު ވައިގެ ސަބަބުން ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ދަނީ ލިބެމުންނެވެ. މި ގޮތުން، ގިނަ އަދަދެއްގެ ގެދޮރު ވެއްޓި، ކަރަންޓުގެ ޚިދުމަތް ފޯރުކޮށްދިނުމަށް ބޭނުން ކުރާ ހޮޅިދަނޑިތަކަށް ބޮޑެތި ގެއްލުންތަކެއް ލިބިފައިވާ ކަމުގައި އެ ޤައުމުގެ ކަމާ ގުޅޭ އިދާރާތަކުން ބުންޏެވެ. މީގެ އިތުރުން، މެދުކެނޑުމެއް ނެތި ބޯކޮށް ވާރޭ ވެހެމުން ދިޔުމާ އެކު، އެ ޤައުމުގެ އައްސޭރިފަށުގެ ގިނަ ރަށްތަކެއްގައި ވަނީ ފެންބޮޑުވެފައެވެ.
ވިއެޓްނާމްގެ މޫސުމާ ބެހޭ އިދާރާއިން ބުނީ، ތޫފާނުގެ އަސަރު އެންމެ ފުރަތަމަ ކޮށްފައި ވަނީ އެ ޤައުމުގެ މެދުތެރޭ އަދި އިރުމަތީ އައްސޭރިފަށުގެ ސަރަޙައްދުތަކަށް ކަމުގައެވެ. ތޫފާނާ އެކު އަށް މީޓަރުގެ ބިޔަ ރާޅުތައް އުފެދިފައިވާ ކަމަށާއި، އައްސޭރިފަށުގެ ސަރަޙައްދުތަކަށް އުދަ އަރާފައިވާ ކަމުގައި ވެސް އެ އިދާރާއިން ބުންޏެވެ.
ވިއެޓްނާމްގެ ކާރިސާތަކާ ބެހޭ އިދާރާއިން ބުނީ، ތޫފާނާ ގުޅިގެން ގެއްލިފައި ވަނީ 17 މަސްވެރިން ކަމުގައެވެ. ދެ މަސް ބޯޓަކަށް ނިސްބަތްވާ އެ މީހުން ގެއްލިފައި ވަނީ އާދަޔާ ޚިލާފަށް ކަނޑު ގަދަވުމާ ގުޅިގެންނެވެ. ކަނޑު ގަދަވުމާ ގުޅިގެން އެހެން މަސް ބޯޓަކާ ގުޅުން ކެނޑި، ގެއްލިފައިވާ ކަމުގައި ވެސް އެ އިދާރާއިން ހާމަކުރިއެވެ.
ވިއެޓްނާމްގެ ދައުލަތުގެ މީޑިޔާއިން ބުނީ، އަށް މީހުން މަރުވެފައި ވަނީ އާދަޔާ ޚިލާފަށް ވައިބާރުވުމާ ގުޅިގެން ހިނގި ނުރައްކާތެރި ހާދިސާތަކެއްގައި ކަމުގައެެވެ. އެކަކު މަރުވެފައި ވަނީ ސަކްތާއި ސިޓީގައި ފެންބޮޑުވުމާ ގުޅިގެންނެވެ. އަދި، ވެއްޓުނު ބިޔަ ގަހެއްގެ ދަށުވެގެން ތައިން ހުވާ ޕުރޮވިންސުން އިތުރު މީހަކު މަރުވި ކަމުގައި ވެސް ރިޕޯޓުތައް ބުނެއެވެ. މީގެ އިތުރުން، ނިން ބިން ޕުރޮވިންސުގައި ހިނގި ހާދިސާތަކެއްގައި އިތުރު ހަތް މީހަކަށް އަނިޔާވެފައިވާ ކަމުގައި ވެސް އެ މީޑިޔާއިން ރިޕޯޓު ކުރިއެވެ.
ވިއެޓްނާމްގެ މޫސުމާ ބެހޭ އިދާރާއިން ބުނީ، ތޫފާން އެރުމާ އެކު އެ ޤައުމުގެ އައްސޭރިފަށުގެ ސަރަޙައްދުތަކުގައި ގަޑިއަކު 117 ކިލޯމީޓަރަށް ވައިބާރުވެގެން ދިޔަ ކަމުގައެވެ. ނަމަވެސް، މިހާރު ގަޑިއަކު 74 ކިލޯމީޓަރަށް ވައިގެ ބާރުމިން ދަށްވެފައިވާ ކަމުގައި ވެސް އެ އިދާރާއިން ރިޕޯޓު ކުރިއެވެ. ތޫފާން ބުއަލޯއި މިހާރު ދަތުރު ކުރަމުން ދަނީ ލާއޯސްގެ ސަރަޙައްދުތަކާ ދިމާލަށެވެ.
ވިއެޓްނާމްގެ ކާރިސާތަކާ ބެހޭ އިދާރާއިން ބުނީ، ތޫފާން ބުއަލޯއިއާ ގުޅިގެން 245އަށްވުރެ ގިނަ ގެދޮރު ވެއްޓިފައިވާ ކަމުގައެވެ. އަދި، 1,400 ހެކްޓަރުގެ ދަނޑުބިމުގައި ފެންބޮޑުވެފައިވާ ކަމުގައެވެ. ފެންބޮޑުވުމާ ގުޅިގެން، ޢާންމުން ދިރިއުޅޭ ގިނަ ސަރަޙައްދުތަކަކަށް ދަތުރު ކުރެވެން އޮތް ހުރިހާ މަގުތަކެއް ވަނީ ބަންދުވެފައެވެ. އަދި، އެ ސަރަޙައްދުތަކުގައި ދިރިއުޅޭ ރައްޔިތުން ވަނީ އަމިއްލަ ގެދޮރުގައި ތާށިވެފައެވެ.
ތޫފާން އެރުމުގެ ކުރިން، ވިއެޓްނާމްގެ ސަރުކާރުން ވަނީ އެންމެ ބޮޑު ނުރައްކަލެއް އޮތް ކަމުގައި ބެލެވޭ ސަރަޙައްދުތަކުގައި ދިރިއުޅޭ 28,500އަށްވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައެވެ. ތޫފާން ބުއަލޯއިއާ ގުޅިގެން ވިއެޓްނާމަށް ކުރާ ވައިގެ ދަތުރުތައް ވެސް ވަނީ ކެންސަލް ކޮށްފައެވެ. މި ގޮތުން، ހަތަރު ވައިގެ ބަނދަރެއް ވަގުތީ ގޮތުން ބަންދު ކުރަން ޖެހިފައިވާ ކަމުގައި އެ ޤައުމުގެ އިދާރާތަކުން ހާމަކުރިއެވެ. ކުރިއަށް އޮތް ދެ ދުވަހެއްގެ ތެރޭގައި ވެސް އެ ޤައުމުގެ ބައެއް ސަރަޙައްދުތަކަށް ބޯކޮށް ވާރޭ ވެހޭނެ ކަމަށް އެ ޤައުމުގެ މޫސުމާ ބެހޭ އިދާރާއިން ލާފަކުރެއެވެ.