ޚާއްސަ ފެއާއެއްގެ ދަށުން ޗައިނާގެ ތިން މަންޒިލަކަށް މޯލްޑިވިއަނުން އަގު ހެޔޮ ދަތުރުތަކެއް

ޤައުމީ އެއަރލައިން، މޯލްޑިވިއަންގެ ފްލައިޓްތައް އޮޕަރޭޓްކުރާ ޗައިނާގެ ތިން ސިޓީއަށް ޓިކެޓުގެ އަގު ހެޔޮކޮށް، ޚާއްޞަ ފެއާއެއް ތަޢާރަފުކޮށްފިއެވެ. މި ޕްރޮމޯޝަނަކީ ދިވެހި ދަތުރުވެރިންނަށް ޚާއްޞަކޮށްގެން ކުރިއަށްގެންދާ ޕްރޮމޯޝަނެއްކަމަަށް މޯލްޑިވިއަނުން ވިދާޅުވެއެވެ.

މޯލްޑިވިއަނުން ވިދާޅުވީ، މި ޕްރޮމޯޝަނުގެ ދަށުން އެ އެއަރލައިނުން ދަތުރުކުރާ ޗައިނާގެ ވެރިރަށް ބެއިޖިންގ އާއި، އިޤްތިޞާދީ މަރުކަޒު ޝަންހާއީ އަދި ސިޗުއަން ޕްރޮވިންސްގެ ވެރިރަށް ޗެންގްޑޫއަށް ހެޔޮ އަގެއްގައި ޓިކެޓު ލިބެން ހުންނާނެކަމަށެވެ. އަދި މި ޕްރޮމޯޝަން ކުރިއަށްދާނީ އޮކްޓޫބަރު މަހުގެ 28 ވަނަ ދުވަހުން ފެށިގެން ނޮވެމްބަރު މަހުގެ 15 ވަނަ ދުވަހުގެ ނިޔަލަށްކަމަށް އެ އެއަރލައިނުން މައުލޫމާތުދެއެވެ.

މޯލްޑިވިއަނުން ވިދާޅުވީ، މި މުއްދަތުގެ ތެރޭގައި، މާލެއިން މި ތިން ސިޓީއަށް ދަތުރުކުރާ ފަސިންޖަރުންނަށް ދެކޮޅު ޓިކެޓު 499 އެމެރިކާ ޑޮލަރަށް ލިބޭނެކަމަށެވެ. އަދި މި ތިން ސިޓީއަށް ކުރާ ދަތުރުތަކުގެ ގަޑިތައް ތާވަލުކޮށްފައިވަނީ ޗުއްޓީ ހޭދަކުރަން ދާ އާއިލާތަކަށާއި، ވިޔަފާރި ބޭނުންތަކުގައި ދަތުރުކުރާ ފަރާތްތަކަށްވެސް އެންމެ ފަސޭހަވާނެ ގޮތަށްކަމަށް ވިދާޅުވިއެވެ.

މިގޮތުން، މާލެއިން ހެނދުނު ފުރައިގެން، ޗައިނާއަށް ފްލައިޓު ޖައްސާނީ ޗައިނާއަށް ހެނދުނުގެ ވަގުތުތަކުގައެވެ. ހަމައެހެންމެ، އެނބުރި ރާއްޖެއަށް އަންނަ ފްލައިޓުތައް ތާވަލުކޮށްފައިވަނީ މާލޭ ގަޑިން ހެނދުނު ވަގުތުތަކަށް ކަމަށްވާތީ، ރާއްޖޭގެ އެތެރޭގެ ދަތުރުފަތުރުގެ ޝެޑިއުލްތަކަށްވެސް ފަސޭހަވާނެކަމަށް އެ އެއަރލައިނުން ފާހަގަކުރެއްވިއެވެ.

މި ޕްރޮމޯޝަން މައިގަނޑު ގޮތެއްގައި އަމާޒުކޮށްފައިވަނީ ދިވެހި ދަތުރުވެރިންނަށް ކަމަށްވާއިރު، ޗައިނާއަށް އެތެރެވާ ދިވެހިންނަށް 30 ދުވަހުގެ އޮން-އެރައިވަލް ވިސާ ލިބޭނެކަމަށް މޯލްޑިވިއަނުން ވިދާޅުވެއެވެ. އަދި ޗައިނާގެ މި ތިން ސިޓީއަށްވެސް ދަތުރުކުރަނީ އެންމެ ފަހުން ގެނެސްފައިވާ އެއަރބަސް އޭ330 ވައިޑް ބޮޑީ މަތިންދާބޯޓުގައެވެ.

މޯލްޑިވިއަންގެ ފްލީޓުގައި މިވަގުތު 25 މަތިންދާބޯޓު ހިމެނެއެވެ. މީގެ ތެރޭގައި ވައިޑް-ބޮޑީ އެއަރބަސް އޭ330، ނެރޯ-ބޮޑީ އެއަރބަސް އޭ320 މަރުކާގެ މަތިންދާބޯޓަކާއި، އޭޓީއާރު މަރުކާގެ 5 މަތިންދާބޯޓަކާއި، ޑޭޝް 8 މަރުކާގެ 8 މަތިންދާބޯޓާއި، އަދި ޑޭޝް 6 މަރުކާގެ ޓްވިންއޮޓާރ 11 މަތިންދާބޯޓު ހިމެނެއެވެ.