މިއަދަކީ ދުނިޔޭގެ "ޓެލެކޮމިއުނިކޭޝަން އެންޑް އިންފޮމޭޝަން ސޮސައިޓީ ޑޭ" ނުވަތަ މުވާސަލާތީ ދުވަހެވެ. އިންޓަނޭޝަނަލް ޓެލެކޮމިއުނިކޭޝަން ޔޫނިއަންއިން ކޮންމެ އަހަރެއްގެ މޭމަހުގެ 17 ވަނަ ދުވަސް ފާހަގަކުރަނީ ދުނިޔޭގެ މުވާސަލާތީ ދުވަހުގެ ގޮތުގައެވެ. މި ދުވަސް ފާހަގަކުރަން ނިންމާފައިވަނީ 2006 ވަނަ އަހަރުގައެވެ.
މިއަހަރުގެ ދުނިޔޭގެ މުވާސަލާތީ ދުވަހުގެ ޝިއާރަކީ "ޖެންޑަރ އިކުއަލިޓީ އިން ޑިޖިޓަލް ޓްރާންސްފޯރމޭޝަން" މިއެވެ. ދުނިޔޭގެ މުވާސަލާތީ ދުވަސް ފާހަގަކުރާއިރު ޑިޖިޓަލް ޓެކްނޮލޮޖީ މި ވަނީ ދުވަހުން ދުވަހަށް ކުރިއަރަމުން އައިސް، ދިރިއުޅުމުގެ ގިނަ ކަންކަން ޓެކްނޮލޮޖީއާ ނުލާ ނުކުރެވޭ ހިސާބަށް އައިސްފައެވެ. ސްކޫލް ދަރިވަރުންގެ ކިޔެވުމާއި މަސައްކަތާއި ޚިދުމަތްތައް ފޯރުކޮށްދިނުމުގެ އިތުރުން، އާއްމު ދިރިއުޅުމުގެ ގިނަ ކަންކަން މި ވަނީ މުވާސަލާތީ އެކިއެކި އާލާތްތައް މެދުވެރިކޮށް އިތުރަށް ފަސޭހަ ވެފައެވެ.
މުހިންމު މައުލޫމާތު ހޯދުމާއި ދުރުގައި ތިބޭ އާއިލާ އާއި ރައްޓެހިންނާ ގުޅުން ބަދަހިކުރުމުގެ ފުރުޞަތުތައް އިތުރަށްފަހިވެ، ފަސޭހަވެފައިމިވަނީ ހުއްޓުމެއް ނެތި ތައާރަފްކުރަމުންދާ ތަފާތު ޑިޖިޓަލް ވަސީލަތްތަކުގެސަބަބުންނެވެ. ހަމަ އެއާ އެކު، ދުޅަހެޔޮ ދިރިއުޅުމެއް ބިނާކުރަން ވެސް ޑިޖިޓަލް ޓެކޮނޮލޮޖީ މުހިންމު ދައުރެއް އަދާކުރެއެވެ.
އެގޮތުން އިންޓަރނެޓް ބޭނުންކުރާ މިންވަރާއި އިންޓަރނެޓް ބޭނުންކުރާ މީހުންގެ އަދަދު ހަލުވިކަމާ އެކު އިތުރުވެގެން އަންނައިރު، ފެންވަރު ރަނގަޅު އިންޓަނެޓްގެ ހިދުމަތެއް އަދި ކުރިއަރަމުން އަންނަ މި ޓެކްނޮލޮޖީތައް ތަންފީޒުކުރުން ވަރަށް ބޮޑަށް ބަރޯސާވަނީ ޑިޖިޓަލް އިންފްރާސްޓްރަކްޗާގެ މައްޗަށެވެ.
ދުނިޔޭގެ މުވާސަލާތީ ދުވަސް ފާހަގަކުރުމުގެ ބޭނުމަކީ އިންފޮރމޭޝަން ސޮސައިޓީއާއި ގުޅޭ މުހިންމު ކަންކަން ދުނިޔޭގެ ސަމާލުކަމަށާއި އަދި ގައުމުތަކުގެ ރައްޔިތުންނާއި އިސްވެރިންގެ ސަމާލުކަމަށް ގެނެސް ކުރިމަގުގައި އެކަންކަމާއި ގުޅޭ މައްސަލަތާއި ހުރަސްތަކާއި ގުޅޭގޮތުން ހޭލުންތެރިކުރުމެވެ.
ދުނިޔޭގެ މުވާސަލާތީ ދުވަސް މިއަދު ފާހަގަކުރަމުންދާއިރު ރާއްޖޭގައި މުވާސަލާތީ ޚިދުމަތް ފެށިގެން އައިގޮތަށްވެސް ބަލާލަންޖެހެއެވެ. ރާއްޖޭގައި އެންމެ ފުރަތަމަ މުވާސަލާތީ ޚިދުމަތްދޭން ފަށާފައިވަނީ މީގެ 37 އަހަރު ކުރިން ދިވެހިރާއްޖޭގެ ގުޅުން، ދިރާގުންނެވެ. ރަސްމީ ގޮތުން ދިރާގުގެ ޙިދުމަތްދޭން ފެށީ 1 އޮކްޓޫބަރ 1988 ގައެވެ.
ރާއްޖޭގައި އެންމެ ފުޅާ ދާއިރާއެއްގައި މުވާސަލާތީ ޙިދުމަތްދޭ ކުންފުނިތަކުން ވަނީ މޯބައިލް ސްޕީޑަށް ބެލިޔަސް ދުނިޔޭގެ ގަދަ 30 ގައުމު ތެރޭގައި ރާއްޖެ ހިމެނޭކަމަށެވެ. އަދި އެހެން ގައުމުތަކުގައި މޯބައިލް ނެޓްވޯކްގެ ޚިދުމަތް ނުލިބޭ ތަންތަން ހުންނައިރު، ރާއްޖޭގައި ކުދި ރައްތަކުގައިވެސް އެންމެ ހައި ސްްޕީޑުގައި ޚިދުމަތް ލިބެމުންދާކަން ފާހަގަކުރައްވާފައެވެ. މީގެ އިތުރުން މޯބައިލްގެ ޚިދުމަތް ބޭނުންކުރާ މިންވަރު ސަރަޙައްދީ ގައުމުތަކާ އަޅާބަލާއިރުވެސް ރާއްޖޭގައި ނިސްބަތުން މަތީގައި އުޅޭކަމަށް އެ ފަރާއްތަކުން ފާހަގަކުރެއެވެ.
މިއާއެކު ޓެލެކޮމިއުނިކޭޝަން ދާއިރާއިން ރާއްޖެއިން ހޯދާފައިވާ އަދި ހޯދަމުންދާ ކުރިއެރުންތަކާއެކު، ސަރުކާރުންވެސް މިވަނީ ދާއިރާގެ ކުރިއެރުމަށް މަސައްކަތް ކުރައްވާނެކަން ހާމަކޮށްފައެވެ. އެހެންކަމުން ކުރިއަށް އޮތީ މިދާއިރާއިން ވެސް ފަހި ދުވަސްތަކެކެވެ.