އދ.ގެ ކޮމިޝަން އޮން ދަ ސްޓޭޓަސް އޮފް ވިމެންގެ މެމްބަރުކަމަށް ފުރަތަމަ ފަހަރަށް ރާއްޖެ!

އދ.ގެ ކޮމިޝަން އޮން ދަ ސްޓޭޓަސް އޮފް ވިމެންގެ މެމްބަރުކަމަށް ފުރަތަމަ ފަހަރަށް ދިވެހިރާއްޖެ އިންތިޚާބު ވެއްޖެއެވެ.

އދ. ގެ އިކޮނޮމިކް އެންޑް ސޯޝަލް ކައުންސިލް (އިކޮސޮކް) ގެ ދަށުން އުފައްދާފައިވާ ކޮމިޝަން އޮން ދަ ސްޓޭޓަސް އޮފް ވިމެން ގެ 2026-2030 ދައުރުގެ އޭޝިއާ ޕެސިފިކް ގްރޫޕަށް 5 މެމްބަރުން އިންތިޚާބުކުރުމަށް އެމެރިކާގެ ނިއު ޔޯކްގައި ބޭއްވުނު އިންތިޚާބުގައި ފުރަތަމަ ފަހަރަށް އެ ކޮމިޝަނަށް ދިވެހިރާއްޖެ ވަނީ ހޮވިފައެވެ.

މިކާމިޔާބީއާއި ގުޅިގެން ޚާރިޖީ ވުޒާރާއިން ނެރުއްވި ބަޔާނެއްގައި ވިދާޅުވީ، މި ކާމިޔާބީ ރަމްޒުކޮށްދެނީ މިންތީގެ ހަމަހަމަކަމަށާއި އަންހެނުން ބާރުވެރި ކުރުމަށް ރާއްޖެއިން ދެމުންދާ އަހަންމިއްޔަތުކަންކަމަށެވެ. ރާއްޖޭގެ އިތުރުން ކޮމިޝަންގެ އައު ދައުރަށް ޤަތަރު، ޖަޕާން، ޗައިނާ އަދި މޮންގޯލިއާވަނީ ހޮވިފައެވެ.

ޚާރިޖީ ވުޒާރާއިން ވަނީ މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގައި ރާއްޖެއިން ބައިނަލްއަޤްވާމީ އިންތިޚާބެއްގައި ބައިވެރިވެ، ހޮވުނު ފުރަތަމަ ފަހަރުކަމަށް ވިދާޅުވެފައެވެ. އަދި މި ކޮމިޝަނަކީ ސިޔާސީ، އިޤްތިޞާދީ، އިޖްތިމާޢީ އަދި ތަޢުލީމީ ދާއިރާތަކުގައި އަންހެނުންގެ ޙައްޤުތައް ކުރިއެރުވުގެ މަޤުޞަދުގައި އުފައްދާފައިވާ ކޮމިޝަނެކެވެ.

ރާއްޖެއިން މި ކޮމިޝަންގެ މެމްބަރެއްގެ ހައިސިއްޔަތުން ކޮމިޝަންގެ މަސައްކަތްތަކުގައި މާނަހުރި ގޮތެއްގައި ބައިވެރިވެ އެހީތެރިކަން ފޯރުކޮށްދީ، އަންހެނުންގެ ޙައްޤުތަކާއި ބާރުވެރިކުރުވުމާ ގުޅުންހުރި ކަންކަމުގައި، އދ. ގެ އިކޮނޮމިކް އެންޑް ސޯޝަލް ކައުންސިލަށް ލަފާ ދިނުމުގައި މަސައްކަތް ކުރާނެކަމަށް ޚާރިޖީ ވުޒާރާއިން ވިދާޅުވެއެވެ. އަދި އަންހެނުންގެ ޙައްޤުތައް ކުރިއެރުވުމަށާއި ޙިމާޔަތްކުރުމަށް މިސަރުކާރުން އިސްކަންދެއްވާ މިންވަރު ހާމަކޮށް ކުރެވެމުންދާ މަސައްކަތްތައް ހިއްސާކުރާނެކަމަށްވެސް އެ ވުޒާރާއިން ވިދާޅުވިއެވެ.

Maldives has been elected to the Commission on the Status of Women (@UN_Women) for the first time

The election for the term 2026-2030 was held today in New York

This is the first successful candidature of this government. Demonstrating Maldives' commitment to women empowerment.

— Ministry of Foreign Affairs 🇲🇻 (@MoFAmv) April 4, 2025

ރާއްޖެއިން މިހާތަނަށް ވަނީ ބައިނަލްއަޤްވާމީ އަދި ޤައުމީ ފެންވަރުގައި މިންތީގެ ހަމަހަމަކަން ކުރިއެރުވުމުގައި ގިނަ ކުރިއެރުންތަކެއް ހޯދާފައެވެ. އެގޮތުން އަންހެނުންގެ ހައްޤުތައް ރައްކާތެރިކުރުމަށް ގޮވާލާ އެކި ފެންވަރުގެ ސިޔާސަތުތައް އެކުލަވާލައި، ހުރިހާ ދާއިރާއެއްގައިވެސް އަންހެނުންގެ އިސްނެންގެވުމާއި ބައިވެރިވުން އިތުރުކުރުމަށް އެކި މަސައްކަތްތައް ދަނީ ކުރަމުންނެވެ.

ކޮމިޝަން އޮން ދަ ސްޓޭޓަސް އޮފް ވިމެންގެ އެކުލެވިގެން ވަނީ ސަރަޙައްދީގޮތުން ހަމަހަމައަށް ޤައުމުތައް ތަމްސީލުކުރުމުގެ އުސޫލުގެ މައްޗަށް ބިނާކޮށް އިންތިޚާބުކުރެވޭ އދ.ގެ 45 މެމްބަރު ޤައުމުގެ މައްޗަށެވެ. އެއީ އެފްރިކާ ޤައުމުތަކުން 13 މެމްބަރުން, އޭޝިއާ-ޕެސިފިކް ޤައުމުތަކުން 11 މެމްބަރުން, އިރުމަތީ ޔޫރަޕުގެ ޤައުމުތަކުން 4 މެމްބަރުން, ލެޓިން އެމެރިކާ އަދި ކެރީބިއަން ޤައުމުތަކުން 9 މެމްބަރުން, އަދި ހުޅަނގު ޔޫރަޕު އަދި އެހެނިހެން ޤައުމުތަކުން 8 މެމްބަރުންނެވެ. މެމްބަރުކަމުގެ މުއްދަތަކީ 1 ޖަނަވަރީން ފެށިގެން 31 ޑިސެމްބަރުގެ ނިޔަލަށް ނިމޭގޮތަށް 4 އަހަރު ދުވަހެވެ.

ކޮމިޝަން އޮން ދަ ސްޓޭޓަސް އޮފް ވިމެންއަކީ މިންތީގެ ހަމަހަމަކަމާއި އަންހެނުންގެ ހައްޤުތަކާއި އަންހެނުންގެ ކުރިއެރުވުމަށް އެއްބާރުލުންދިނުމުގެ ގޮތުން އުފައްދާފައިވާ މައިގަނޑު ބައިނަލްއަޤްވާމީ ކޮމިޝަނެވެ. މި ކޮމިޝަން އުފައްދާފައިވަނީ 1946 ވަނަ އަހަރުގެ ޖޫން މަހު އދ. ގެ އިކޮނޮމިކް އެންޑް ސޯޝަލް ކައުންސިލްގައި ފާސްކުރި ޤަރާރަކުންނެވެ.