ޢުމްރާވެރިން ރާއްޖެ އަންނަން ފަށައިފި

ރަމަޞާންމަހު އުމްރާގެ މަތިވެރި އަޅުކަން އަދާކުރުމަށް ދިޔަ އުމްރާވެރިން ރާއްޖެއަންނަށް ފަށައިފިއެވެ.

މި ރަމަޟާން މަހު ފަހު ދިހައެއްގައި ޢުމްރާގެ އަޅުކަން އަދާކުރުމަށް ޙައްޖު ކޯޕަރޭޝަންގެ ހަވާލުގައި ޖުމްލަ 577 މީހުން ޢުމްރާއަށް ދިޔައެވެ. ހައްޖު ކޯޕަރޭޝަން އިތުރުން، އަމިއްލަ ކުންފުނިތަކާއެކުވެސް މިފަހަރު ރޯދަ ޢުމްރާއަށް ގިނަ ބަޔަކު ވަނީ ގޮސްފައެވެ.

އުމްރާވެރިން އައުމަށް ހަމަޖެހިފައިވަނީ މި މަހު 4،5 އަދި 7ގައެވެ. އެގޮތުން އުމްރާއިން މީހުން އަންނަ ފްލައިޓުތައް ދެ ގަޑިއެއްގައި އަންނާނެކަން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން ވަނީ ވިދާޅުވެފައެވެ. އެއީ މެނދުރުފަހު 2:00 އާއި ހަވީރު 4:00 ގައެވެ.

އެހެންކަމުން ދަތުރުފަތުރުގެ ޚިދުމަތް ދެއްވާ ފަރާތްތަކާއި ޓެކްސީތަކުންވެސް މިގަޑިތަކުގައި އެއަރޕޯޓުގެ ޓްރެފިކް ތޮށްޖެހުން ކުޑަކުރުމަށް އެއްބާރުލުން ދިނުމަށް އެމްއޭސީއެލުން ވަނީ އެދިވަޑައިގެންފައެވެ.

2025 އޭޕްރީލް 4 އަދި 5 ވަނަ ދުވަހު އެއަރޕޯޓަށް ޒިޔާރަތްކުރާ ފަރާތްތައް އިތުރުވެ، ޓްރެފިކް ފްލޯއަށް ބާރުބޮޑުވާނެކަމަށް ލަފާކުރެވޭތީ، މި ދެ ދުވަހު އެއަރޕޯޓަށް ދަތުރުކުރާ އެއްގަމު އުޅަނދުފަހަރު ދުއްވާ ފަރާތްތަކުން ފުލުހުން ދޭ އިރުޝާދުތަކާ އެއްގޮތަށް ޢަމަލުކުރެއްވުމަށް ދަންނަވަން pic.twitter.com/NQhSV10G4V

— Maldives Police (@PoliceMv) April 3, 2025

އެމްއޭސީއެލްއިން ވަނީ ޢުމްރާއިން މީހުން އެނބުރި އަންނަން ފެށުމާއެކު އެއާރޕޯޓުގެ އޮޕަރޭޝަންތައް ފަސޭހަކަމާއެކު ކުރިއަށް ގެންދިއުމަށް އެއަރޕޯޓަށްދާ ފަރާތްތަކުން ވީހާވެސް އަވަހަށް ޗެކިން އަދި ސެކިއުރިޓީ ކްލިއަރެންސް ހެދުމަށް އިލްތިމާސްކުރައްވާފައެވެ.

މީގެ އިތުރުން އެއްވެސް ފަރާތަކަށް އެހީތެރިކަން ބޭނުންވާ ނަމަ އެހީތެރިކަން ފޯރުކޮށްދޭން އެއަރޕޯޓުގައި މުވައްޒަފުން ތިބޭނެ ކަމަށް އެމްއޭސީއެލްއިން ވިދާޅުވިއެވެ.

ފުލުހުންވެސް ވަނީ 2025 އޭޕްރީލް 4 އަދި 5 ވަނަ ދުވަހު ގިނަ އަދަދެއްގެ އުމްރާ ވެރިންނާއި އެއަރޕޯޓަށް ޒިޔާރަތްކުރާ ފަރާތްތައް އިތުރުވެ، ޓްރެފިކް ފްލޯއަށް ބާރުބޮޑުވާނެކަމަށް ލަފާކުރެވޭތީ، މި ދެ ދުވަހު އެއަރޕޯޓަށް ދަތުރުކުރާ އެއްގަމު އުޅަނދުފަހަރު ދުއްވާ ފަރާތްތަކުން ފުލުހުން ދޭ އިރުޝާދުތަކާ އެއްގޮތަށް ޢަމަލުކުރެއްވުމަށް އިލްތިމާސްކުރައްވާފައެވެ.