ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިނގިރޭސިވިލާތަށް ކުރައްވަމުން ގެންދަވާ ދަތުރުފުޅުގެ ތެރެއިން ފުޓްބޯލް ފޯ ޕީސްގެ ހަރަކާތްތަކުގައި ބައިވެރިވެވަޑައިގަންނަވައިފިއެވެ.
ރައީސަށް މަރުހަބާ ދެންނެވުމުގައި ފުޓްބޯލް ފޯ ޕީސްގެ އިސްވެރިންގެ ތެރެއިން، އެ ޖަމުޢިއްޔާގެ ބާނީއާއި ކުރީގެ ޕްރޮފެޝަނަލް ފުޓްބޯޅަ ކުޅުންތެރިއެއް ކަމުގައިވާ ކަޝިފް ސިއްދީޤީ އާއި ބްރެޑްފަޑް ސިޓީ އޮފް ކަލްޗަރ 2025 ގެ ސީއީއޯ ޝަހްނާޒް ގުލްޒާރު ބައިވެރިވެވަޑައިގެންނެވިއެވެ.
މި ހަރަކާތުގައި، ޔުނިވަރސިޓީގެ ޕީސް ސެންޓަރާއެކު ފުޓްބޯލް ފޯ ޕީސްއިން ކުރިއަށްގެންދާ ހަރަކާތްތަކާ ބެހޭ މަޢުލޫމާތު ރައީސަށް ދެއްވިއެވެ. އަދި ފުޓްބޯޅަ ދަނޑުތަކަށް ޒިޔާރަތްކުރައްވައި، އެވަގުތު އެތަނުގައި ތަމްރީނުކުރަމުންދިޔަ ޒުވާނުންނާ ބައްދަލުކުރެއްވިއެވެ.
2013 ވަނަ އަހަރު އުފެދުނު ފުޓްބޯލް ފޯ ޕީސްއަކީ އދ.ގެ ސްޕޯޓްސް ފޯ ޑިވެލޮޕްމަންޓް އެންޑް ޕީސް އޮފީހުގެ އެހީތެރިކަމާއެކު، އިޖުތިމާޢީ މައްސަލަތައް ހައްލުކުރުމާއި ޒުވާނުން ބާރުވެރިކުރުވުމަށް މަސައްކަތްކުރާ ބައިނަލްއަޤްވާމީ މަދަނީ ޖަމްޢިއްޔާއެކެވެ.
ފުޓްބޯލް ފޯ ޕީސްއިން ސުލްހަ ކުރިއަރުވައި، އަޑުއުފުލުމުގެ ފުރުސަތު ނުލިބޭ މުޖުތަމަޢުތަކަށް ބާރުވެރިކަން ދިނުމާއި، ޒުވާނުންނަށް ޓީމްވޯކާއި ހަމަނުޖެހުން ހައްލުކުރުމުގެ ހުނަރު ދަސްކޮށްދިނުން ކުރިއަށްގެންދެއެވެ. އަދި ޗެރިޓީ މެޗުތަކާއި ތަމްރީނު ޕްރޮގްރާމްތަކުން ކުޑަކުދިންނާއި، ކޯޗުންނާއި، ޓީމް މެނޭޖަރުންނަށް ބޭނުންވާ ހުނަރުތައް ދަސްކޮށްދީ، ދުނިޔޭގެ ފެންވަރުގައި އަސަރުފޯރުވަމުން ގެންދެއެވެ.