ކުޅިވަރު

ރައީސުލްޖުމްހޫރިއްޔާ ލިވަޕޫލްގެ އެންފީލްޑް ދަނޑަށް ޒިޔާރަތްކުރައްވައިފި


ރާއްޖެ ޕްރޮމޯޓުކުރުމުގެ މަސައްކަތުގެ ތެރެއިން ރައީސް ޑރ. މުޙައްމަދު މުޢިއްޒު، އިނގިރޭސިވިލާތުގެ ލިވަޕޫލްގައި ހުންނަ މަޝްހޫރު އެންފީލްޑް ފުޓްބޯޅަ ދަނޑަށް ޒިޔާރަތްކުރައްވައިފިއެވެ.

ރައީސުލްޖުމްހޫރިއްޔާގެ މި ޒިޔާރަތަކީ ރާއްޖޭގެ ޓޫރިޒަމް ޕްރޮމޯޓްކުރުމަށް ކުރައްވާ މަސައްކަތުގެ ބެއެކެވެ. އެގޮތުން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ރާއްޖޭގެ ފަތުރުވެރިކަމުގެ ކެމްޕެއިން ފައްޓަވާދެއްވާ ރޭ ޕްރިމިއަރ ލީގުގައި ލިވަޕޫލްއާ އެވަޓަން ބައްދަލުކުރި މެޗު ބައްލަވާލަފައެވެ.

އިނގިރޭސި ޕްރިމިއަރ ލީގުގައި އެވަރޓަން އާއި ލިވަރޕޫލް ފުޓްބޯލް ކްލަބް (އެލް.އެފް.ސީ) ބައްދަލުކުރި މި މެޗުގައި ވަނީ، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރް.ސީ) / ވިޒިޓް މޯލްޑިވްސް އާއި އެލް.އެފް.ސީ ގުޅިގެން، ކޯ ބްރޭންޑަޑް އިނީޝިއަޓިވެއްގެ ގޮތުގައި ކުރިއަށްގެންދާ ރާއްޖޭގެ ފަތުރުވެރިކަމުގެ ކެމްޕެއިން، ރަސްމީކޮށް ފަށާފައެވެ.

ރައީސް މުއިއްޒު މި ޒިޔާރަތުގައި އެންފީލްޑް ސްޓޭޑިއަމްގެ ހާއްސަ ޓުއާއެއް ހެއްދެވި އިރުގައި މި ޓުއާގައި ރައީސް ދަނޑުގެ އެކި ސަރަހައްދުތަކަށް ޒިޔާރަތްކުރެއްވިއެވެ. އަދި ދަނޑުގެ ކައިރީގައި ހުރި ލިވަޕޫލް ކުޅުންތެރިންގެ ޖާޒީތައް ބެއްލެވުމުގެ އިތުރުން ކުޅުންތެރިން ތައްޔާރުވާ ސަރަހައްދުތަކަށްވެސް ޒިޔާރަތްކުރެއްވިއެވެ.

ރައީސް މުއިއްޒުގެ މި ޒިޔާރަތުގައި ލިވަޕޫލް އެފްސީގެ އިސްވެރިންނާ ބައްދަލުކުރައްވައި، ދަނޑުގެ ޕިޗްސައިޑްގައި ފޮޓޯ ނަންގަވާފައިވެއެވެ. އަދި ލިވަޕޫލް އެފްސީގެ ނަންބަރު 25 ޖާޒީއެއް ރައީސް މުއިއްޒަށް ވަނީ ހަދިޔާކުރައްވަވާފައެވެ.

ވިޒިޓް މޯލްޑިވްސް އާއި ލިވަޕޫލް މި ކެމްޕެއިންގެ ދަށުން، ބްރޭންޑް ވާސިލުވާ މިންވަރު އިތުރުކުރުމާއި ރާއްޖެ އަންނަ ފަތުރުވެރިންގެ ޢަދަދު އިތުރުކުރުމުގެ އިތުރުން ދިވެހިރާއްޖެއަށް މުހިންމު އިޤްތިޞާދީ މަންފާތައް ހޯދޭނޭ މަގުފަހިވެގެންދާނެއެވެ.

ލިވަރޕޫލްގެ ރަސްމީ ޓޫރިސްޓް ޑެސްޓިނޭޝަން ޕާޓްނަރަކީ އެމް.އެމް.ޕީ.އާރް.ސީ/ ވިޒިޓް މޯލްޑިވްސް ކަމަށް، ނިމިދިޔަ މާރިޗު މަހުގެ 13 ވަނަ ދުވަހު ވަނީ އިޢުލާންކޮށްފައެވެ. މި ޕާޓްނަރޝިޕުގެ ދަށުން ތިން އަހަރާއި ހަ މަސްދުވަހުގެ ބައިނަލްއަޤުވާމީ ކެމްޕެއިނެއް ކުރިއަށްގެންދާނެއެވެ.