ރެއާލް މެޑްރިޑުގެ ކޯޗު ކާލޯ އަންޗެލޮޓީ، މިއަދު ކޯޓަށް ހާޒިރުވެ ޓެކުހަށް މަކަރު ހަދާފައިނުވާނެ ކަމަށް ބުނެފިއެވެ.
އަންހެނުން މަރިއާން ބަރޭނާ އާއި ދަރިފުޅު އަދި އޭނާގެ އެއް އެސިސްޓެންޓް ކޯޗު ޑޭވިޑޭއާއެކު މެޑްރިޑްގައިވާ ހައިކޯޓް އޮފް ޖަސްޓިސް އަށް ހާޒިރުވެ އިޓަލީގެ ކޯޗު ބުނީ އޭނާ އަށް މުސާރަ ދީފައިވަނީ ހަމައެކަނި ރެއާލް މެޑްރިޑުން އެކަނި ކަމަށެވެ.
"ހުރިހާ ކުޅުންތެރިންނަށް ވެސް މުސާރަދޭ އުސޫލުން އަހަރެންނަށް ވެސް މުސާރަ ދެނީ ރެއާލް މެޑްރިޑުން. އަހަރެންނަށް މުސާރަ ލިބެނީ ހަމައެކަނި ކުލަބުން. އަހަރެންނަށް މުސާރަ ދީފައިވަނީ (ރެއާލް މެޑްރިޑްގެ) ކުރީގެ ކޯޗު ހޯސޭ މޮރީނިއޯއާ މެދު ކުލަބުން ކަންތައްތައް ކޮށްފައިވާ ފަދައިން،" އަންޗެކޯޓީ ބުންޏެވެ.
އޭނަ އަދި ބުނީ ރެއާލް މެޑްރިޑުން ލަފާ ދިނުމުން ކުލަބާއި އޭނާއާ ދެމެދު މުއާމަލާތްކުރީ އޭނާގެ އެޑްވައިޒަރުން ކަމަށެވެ. އަދި ގޯސްކޮށް އެއްވެސް މުއާމަލާތެއް ކޮށްފައިނުވާ ކަމަށާއި އެފަދަ ކަމެއް ވެފައިވާ ކަމަށް މިހާތަނަށް ފާހަގަ ވެސް ނުވާ ކަމަށެވެ.
ނަމަވެސް ސްޕޭނުގެ ޕްރޮސެކިއުޓަރުން ކޯޓުގައި އެދުނީ 65 އަހަރުގެ ކޯޗު ހަތަރު އަހަރާއި ނުވަ މަހަށް ޖަލަށް ލައިދޭށެވެ. ސަބަބަކީ އޭނާ ޓެކްސް މަކަރު ހަދާފައިވާ ކަމަށް ބުނެ އެވެ. މި ގޮތުން ޕްރޮސެކިއުޓަރުން ބުނަނީ 2014 އިން 2015 ވަނަ އަހަރު ޓެކްސްގެ ގޮތުގައި 1.1 މިލިއަން ޑޮލަރު ނުދައްކައި އަންޗެލޯޓީ މަކަރު ހަދާފައިވާ ކަމަށެވެ.
ޕްރޮސެކިއުޓަރުން ކޯޓުގައި ބުނީ ޓެކްސްއަށް މަކަރު ހެދުމަށްޓަކައި އަންޗެލޯޓީ ރަސްމީ އިދާރާތަކަށް ދީފައިވަނީ ރެއާލް މެޑްރިޑުން އޭނާ އަށް ދީފައިވާ މުސާރައިގެ ތަފްސީލް އެކަނި ކަމަށެވެ. ނަމަވެސް އިމޭޖް ރައިޓުން ލިބުނު ފައިސާ ނުލިބޭ ކަމަށް ދައްކަން ކަރުދާސް ކުންފުންޏެއްގެ އެހީ ހޯދައި ހަގީގަތް ފޮރުވާފައިވާ ކަމަށެވެ.
ނަމަވެސް އެންޗެލޯޓީ މިކަމާ ދެކޮޅު ހަދަ އެވެ.
"އަހަރެން އެއްވެސް އިރެއްގައި މަކަރު ހަދާފައި ނޯންނާނެ. އަހަރެންނަށް އެނގިފައިނުވޭ މިފަދަ މަކަރެއް އަހަރެންގެ ފައިސާގެ މުއާމަލާތުގައި ހިމެނިފައިވާކަމެއް. އެފަދަ ކަމެއްގެ މިހާތަނަށް ފާހަގަވެފައިވެސް ނުވޭ. އަހަރެންނަށް މުސާރަ ލިބެނީ ކުލަބުން. ކުލަބުން އަހަރެންނާ މެދު ކަންތައްތައް ކޮށްފައިވަނީ މީގެ ކުރިން ހޯސެ މޮރީނިއޯއާމެދު ވެސް ކަންކަން ކޮށްފައިވާ ބީދައިން،" އަންޗެލޯޓީ ބުންޏެވެ.
މި މައްސަލ ކޯޓުގައި ހިނގަމުންދިޔަ ނަމަވެސް ކޯޓުން ބޭރުގައި ހައްލު ކުރުމުގެ ފުރުސަތު އެބައޮތެވެ.
ރެއާލްގެ ކޯޗު އަންޗެލޮޓީ އަކީ ދުނިޔޭގެ އެންމެ ކާމިޔާބު ކޯޗެވެ. އިޓަލީގެ އޭސީ މިލާނާއެކު ދެ ފަހަރު އަދި ރެއާލް މެޑްރިޑުގައި ތިން ފަހަރު ޔުއެފާ ޗެމްޕިއަންސް ލީގު ހޯދައި އޭނާ ވަނީ އެ މުބާރާތް ޖުމްލަ ފަސް ފަހަރު ކާމިޔާބުކޮށްފައެވެ. މިއީ ދުނިޔޭގެ އެހެން އެއްވެސް ކޯޗަކަށް ހޯދިފައިވާ ރިކޯޑެއް ނޫނެވެ. އަންޗެލޮޓީ އަކީ އިޓަލީ އާއި ސްޕެއިންގެ އިތުރުން އިނގިރޭސިވިލާތުގެ ޗެލްސީ އާއި ޖަރުމަނުގެ ބަޔާން މިއުނިކުގައިވެސް ކާމިޔާބު ހޯދި ވަރަށް ތަޖުރިބާކާރު ކޯޗެކެކެވެ. މިހާރު އޭނާގެ އެހީއަށް އެންމެ ބޮޑަށް އެދެމުންދަނީ ބްރެޒިލްގެ ގައުމީ ޓީމުންނެވެ.