ސަލާމަތީ ދާއިރާ ތަރައްޤީކުރުމަށް ކުރެވޭ ހުރިހާ މަސައްކަތެއްގެ މަންފާ އޮތީ ދިވެހީންނަށް: ދިފާޢީ ވަޒީރު

ކްރޮސް ސަބްސިޑީ އުސޫލުން ހިންގާނެ މަޝްރޫޢުތައް ކަނޑައެޅުމާއި ގުޅޭގޮތުން ނެރުއްވާފައިވާ ރައީސުލްޖުމްހޫރިއްޔާގެ ޤަރާރުގައި ޤައުމީ ސަލާމަތާއި ގުޅޭ މަޝްރޫޢުތަކަށް މަދުވެގެން 100 މިލިޔަން ޑޮލަރު އިންވެސްޓްކުރަންޖެހޭގޮތަށް ކަނޑައަޅާފައި އޮތަސް، އެއީ ދިވެހި ސަރުކާރު ދަރަނިވެރިވެގެން ހިނގާނެ ޚަރަދެއް ނޫންކަމަށް ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވެއްޖެއެވެ.

ދިވެހިރާއްޖޭގެ ޓޫރިޒަމާބެހޭ ޤާނޫނުގައި ބަޔާންކުރަނީ ފަތުރުވެރިކަމާބެހޭ ކަންކަމަށް ރަށްރަށާއި ބިންބިމާއި ފަޅު ކުއްޔަށް ދިނުމުގައި، މަޝްރޫޢު ޙަވާލުކުރެވޭ ފަރާތުން ނުވަތަ މަޝްރޫޢަށް ބޭނުންވާ ފައިސާ ޚަރަދުކުރުމަށް އެއްބަސްވާ ފަރާތުން އެންމެ މަދުވެގެން ކުރަންޖެހޭ އިންވެސްޓްމަންޓްގެ ޢަދަދުތައް ރައީސުލްޖުމްހޫރިއްޔާގެ ޤަރާރަކުން ކަނޑައަޅައި، ކޮންމެ އަހަރަކު ދިވެހިސަރުކާރުގެ ގެޒެޓުގައި ޝާއިޢުކުރަންވާނެއެވެ.

މިކަމާގުޅޭގޮތުން ޕީއެސްއެމް ނިއުސްއަށް ދެއްވި އިންޓަރވިއުއެއްގައި ދިފާޢީ ވަޒީރު މުޙައްމަދު ޣައްސާން މައުމޫން ވިދާޅުވީ ރައީސުލްޖުމްހޫރިއްޔާ ނެރުއްވި ގަރާރަކީ ޓޫރިޒަމާބެހޭ ޤާނޫނުގެ ދަށުން ސަރުކާރުން ކަނޑައަޅުއްވާ މުހިންމު ސިޔާސަތެއް ކުރިއަށް ގެންދިއުމަށްޓަކައި ހޯއްދަވާ އެންމެ ކުޑަ އިންވެސްޓްމަންޓުގެ ޢަދަދު ބަޔާންކުރާ ޤަރާރެއްކަމަށެވެ. އަދި އެއީ ދިވެހި ޤައުމަށާއި، ރައްޔިތުންނަށް ލިބޭ އެއްޗެއްކަމަށާއި، އެއީ ދިވެހި ދައުލަތުން ކުރާ ޚަރަދެއް ނޫންކަމަށްވެސް ވަޒީރު ވިދާޅުވިއެވެ.

"ހަގީގަތުގައި ރައީސުލްޖުމްހޫރިއްޔާގެ ގަރާރަށް ބަލާލައިފިކަމަށްވަންޔާ ވަރަށް ޞަރީޙަކޮށް އެނގެން އޮތްކަމެއްމިއީ. މިއީ ޤާނޫނު ނަންބަރު 2/99 ދިވެހިރާއްޖޭގެ ޓޫރިޒަމާބެހޭ ޤާނޫނުގެ 5 މާއްދާގެ މ. ގެ 3 ވަނަ ނަންބަރުގެ ދަށުން ސަރުކާރުން ކަނޑައަޅުއްވާ މުހިންމު ސިޔާސަތެއްކުރިއަށް ގެންދިއުމަށްޓަކައި ބޭރުން ހޯއްދަވާ އެންމެ ކުޑަ އިންވެސްޓްމަންޓްގެ ޢަދަދު. އޭގެ މާނައަކީ ދިވެހި ސަރުކާރުން ހިނގާނެ ޚަރަދެއްނޫން މިއީކީ. ދިވެހި ޤައުމަށާއި، ދިވެހި ރައްޔިތުންނަށް ލިބޭ އެއްޗެއް މިއީ." ދިފާޢީ ވަޒީރު ވިދާޅުވިއެވެ.

ކްރޮސް ސަބްސިޑީއަށް ތަންތަން ދޫކުރުމަކީ ދައުލަތުގެ އާންމު މަންފާއަކަށްޓަކައި ހާސިލްކުރަން ބޭނުންވާ އިޤްތިސާދީ ސިޔާސަތެއްގެ ދަށުން ނުވަތަ އިޖްތިމާޢީ ސިޔާސަތެއްގެ ދަށުން، ދުރާލާ އިޢުލާންކޮށްފައިވާ އުސޫލުތަކާ އެއްގޮތްވާ ގޮތުގެމަތިން ސަރުކާރުން ކަނޑައަޅާ މުހިންމު މަޝްރޫޢެއް ހަވާލުކުރެވޭ ފަރާތަކަށް ނުވަތަ އެފަދަ މަޝްރޫޢަކަށް ޚަރަދުކުރާ ފަރާތަކަށް ޓޫރިސްޓް ރިސޯޓެއް ތަރައްޤީކުރުމަށް ރަށެއް ކުއްޔަށް ދޫކުރުމެވެ. އެގޮތުން އެއަރޕޯޓުތައް އެޅުމަށާއި، ފެރީގެ ޚިދުމަތް ދިނުމަށާއި، އުމްރާނީ ތަރައްޤީގެ ބޮޑެތި މަޝްރޫޢުތަކަށް ކްރޮސް ސަބްސިޑީގެ ގޮތުގައި ރަށްރަށް މީގެކުރިންވެސް ދޫކޮށްފައިވެއެވެ.

ދިވެހި ޤައުމުގެ މިނިވަންކަމާއި ސިޔާދަތު ހިމާޔަތްކޮށް ބެލެހެއްޓުމާއި، ދިވެހި ޤައުމުގެ ސިޔާސީ އިޤްތިޞާދީ ސަރަހައްދު ދިވެހީން އަމިއްލައަށް ބަލަހައްޓާނެ ޤާބިލްކަން ދިވެހި އަސްކަރިއްޔާގައި ޤާއިމްކުރުމަކީ މިސަރުކާރު ފެށުނީއްސުރެ ދަމަހައްޓަމުން އަންނަ ސިޔާސަތެކެވެ.