މަސް ބަންދުކުރާ ފެސިލިޓީ ހުޅުމާލޭގައި އަޅަން މިފްކޯއިން ނިންމައިފި

އިސްލާމިކް ޑިވެލޮޕްމަންޓް ބޭންކުގެ އެހީގައިއަޅާ މަސް ބަންދުކުރާ ކާރުޚާނާ ހުޅުމާލޭގައި އެޅުމަށް މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ، މިފްކޯއިން ނިންމައިފިއެވެ.

މިފްކޯއިން ވިދާޅުވީ ކަނޑުއޮތްގިރީގައި މަސް ބަންދުކުރާ ފެސިލިޓީއެއް ހެދުމަށް މީގެ ކުރިން ނިންމި ނަމަވެސް، ވަޒީރުންގެ މަޖިލީހުގެ ނިންމެވުމާއެކު ހުޅުމާލެއިން އެކަމަށް ބިމެއް ލިބޭގޮތްވުމުން ކަނޑުއޮތްގިރި ދޫކޮށްލުމަށް ނިންމާފައިވާ ކަމަށެވެ. އެ ގޮތުން އެ ފެސިލިޓީ ހުޅުމާލޭގައި އެޅުމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން މިހާރު ބިން ހަމަޖައްސަވައިދެއްވާފައިވާކަމަށް މިފްކޯއިން ވިދާޅުވިއެވެ.

މިފްކޯއިން ވިދާޅުވީ މަސްބަންދުކުރާތަން އެޅުމަށް ލޯނު ހަމަޖެހިފައިވާ ކަމަށާއި މަސައްކަތް ފެށުމަށްޓަކައި ކުރަންޖެހޭ އިދާރީ މަސައްކަތްތައް މިހާރު ކުރަމުންދާ ކަމަށެވެ. އަދި އުންމީދަކީ ފެސިލިޓީން ފަސޭހަކަމާއެކު މަސް ޕްރޮސެސް ކުރުމުގެ ހިދުމަތް ފޯރުކޮށްދިނުންކަމަށް މިފްކޯއިން ވިދާޅުވިއެވެ.

އިސްލާމިކް ޑިވެލޮޕްމަންޓް ބޭންކު، އައިއެސްޑީބީއާއި ދިވެހި ސަރުކާރު ގުޅިގެން މިފްކޯގެ މަސް ބަންދުކުރާ ޤާބިލުކަން އިތުރުކުރުމަށް އެޅުމަށް ހަމަޖެހިފައިވާ މި ފެސިލިޓީއަށް 65 މިލިޔަން ޑޮލަރުގެ ލޯނު އެހީ ލިބިފައިވެއެވެ. މިއީ 35 ޓަނުގެ މަސް ބަންދުކުރުމުގެ ޤާބިލުކަން ލިބިފައިވާ ފެސިލިޓީއެކެވެ.

ކަނޑުއޮތްގިރިއަކީ މިފްކޯގެ ގިނަ އުފެއްދުންތަކެއް ތައްޔާރުކުރުމަށް ބޭނުންކުރި ރަށެކެވެ. ކަނޑުއޮތްގިރި ފިޝް ވިލެޖު އެމްއެންޑީއެފަށް ދިނުމަށް ކެބިނެޓުގެ މަޝްވަރާއިން ނިންމީ މިދިޔަ އަހަރުގެ އޯގަސްޓް މަހުގައެވެ.