އައްޑޫ ހަންކެޑެ ބްރިޖު ހުޅުވުމުން އެ ސަރަހައްދުގެ މަގުތަކުގެ ޓްރެފިކް ފްލޯއަށް ބަދަލުތަކެއް

ހަންކެޑެ ބުރިޖު ހުޅުވުމާއެކު ބްރިޖާ ގުޅޭ ބައެއް މަގުތަކުގެ ޓްރެފިކް ފްލޯއަށް ބަދަލު އަންނާނެކަމަށް އައްޑޫ ސިޓީ ކައުންސިލުން ވިދާޅުވެއްޖެއެވެ.

އައްޑޫ ހަންކެޑެ ބްރިޖް މާދަމާ އާއްމު ދަތުރުތަކަށް ހުޅުވާލާނެއެވެ. ހަންކެޑެ ބުރިޖުއިން ގުޅުވައިދެނީ އައްޑޫ ސިޓީ ހިތަދުއާއި މަރަދޫއެވެ.

އައްޑޫ ސިޓީ ކައުންސިލުން ގެންނަ ބަދަލުތަކުގެ ތެރޭގައި މިހާރު ބޭނުންކުރާ ހަންކެޑެ ލިންކް ރޯޑް މަރަދޫއާއި ގުޅޭ ހިސާބުން، މަގު ބަންދުކުރުން ހިމެނެއެވެ. އޭރުން މިހާރު ބޭނުންކުރަމުންދާ ލިންކް ރޯޑް އާއްމު ދަތުރުފަތުރުތަކަށް މުޅިން ބަންދުވާނެއެވެ.

މީގެއިތުރުން ގެނައި ބައެއް ބަދަލުތަކުގެ ތެރޭގައި ބައެއް މަގުތައް ވަން ވޭ މަގުތަކުގެ ގޮތުގައި ބަދަލުގެނައުމާ، މަގުތަކުގައި ޕާކު ކުރާ އުސޫލުތަކަށްވެސް ބަދަލު ގެނައުން ހިމެނެއެވެ. ޓްރެފިކަށް ގެންނަ ބަދަލުތައް އައްޑޫ ސިޓީ ކައުންސިލުން ވަނީ އެ ކައުންސިލުންގެ ސޯޝަލް މީޑީއާ ޕޭޖުތަކާ ގެޒެޓުގައި ހިމަނާފައެވެ.

އިޢުލާން - އައްޑޫސިޓީ ހަންކެޑެ ބުރިޖް ސަރަހައްދުގެ ޓްރެފިކް ފްލޯ މެނޭޖްކުރުމާއި ގުޅޭhttps://t.co/jjONRGHCvRhttps://t.co/wILeuYryj1 pic.twitter.com/4MLTszMY54

— Addu City Council (@AdduCityCouncil) January 30, 2025

ހަންކެޑެ ބުރިޖުގެ ޢަމަލީ މަސައްކަތް ފެށީ 2021 ވަނަ އަހަރުގެ އޮކްޓޯބަރު މަހުއެވެ. ޕްރޮޖެކްތް ކުރިއަށްގެންދިޔަ އެފްކޮންސްއިން އެ މަސައްކަތް ނިންމަ ދިވެހި ސަރުކާރާ ހަވާލުކުރީ މިދިޔަ އަހަރު އޮގަސްޓްމަހުއެވެ.

މަގު އާއްމު ދަތުރުފަތުރުތަކަށް ހުޅުވާލުން ލަސްވީ، އިތުރު ބައެއް ޓެކްނިކަލް ސަރވޭތައް ކުރިއަށްގެންދަން ޖެހުމުގެ ސަބަބުންކަމަށް އިމާރާތްކުރުމާ ބެހޭ ވުޒާރާއިން މީގެކުރިން ހާމަކުރައްވާފަވެއެވެ.

1.4 ކިލޯމީޓަރުގެ މި ބްރިޖަކީ، 4 ލޭނަށް ތަރައްޤީކުރާ ބުރިޖެކެވެ. އައްޑޫ ބްރިޖްގެ މަސައްކަތް ކުރިއަށްގެންދިޔައީ އެ ސިޓީގެ މަގު ހެދުމަށް ކުރިއަށްގެންދާ 1 ބިލިއަން ރުފިޔާގެ ބިޔަ މަޝްރޫޢާ އެކުއެކީގައެވެ.