ޗެމްޕިއަންސް ލީގުގެ ގްރޫޕް ސްޓޭޖުން ކަޓައިފިނަމަ ކުލަބަށް މާލީ ގޮތުން ދިމާވާނެ ދަތިތައް ވިސްނޭ ކަމަށާއި އެކަމާ މެދު ކަންބޮޑުވާ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ބެލްޖިއަމްގެ ކްލަބް ބުރޫގް އަތުން ކޮންމެހެން ވެސް މޮޅުވާން ޖެހޭ މެޗަށް ނުކުތުމުގެ ކުރިން ގާޑިއޯލާ ބުނީ މުޅިން އައު ފޯމެޓެއްގައި މި ސީޒަނުގައި ފެށި ޗެމްޕިއަންސް ލީގުގައި ކުރިއަށްދާން އޭނާގެ ޓީމަށް އުނދަގޫވީ އަނިޔާގެ މައްސަލަތަކުގެ ސަބަބުން ކަމަށެވެ. ނަމަވެސް 2023 ވަނަ އަހަރުގެ ޗެމްޕިއަންސް ލީގު ސިޓީ އަށް ކާމިޔާބުކޮށްދިން ކޯޗު އޭނާގެ ޓީމުގެ މިހާރުގެ ހާލަތާމެދު މާބޮޑަށް ވާހަކަ ދައްކާކަށް ބޭނުމެއްނުވި އެވެ.
2016 ވަނަ އަހަރު ގާޑިއޯލާ ހަވާލުވި ފަހުން ކޮންމެ ސީޒަނެއްގައި ވެސް މި މުބާރާތުގެ ގަދަ 16 އަށް ސިޓީ ވަނީ ކޮލިފައިވެ އެވެ. ނަމަވެސް މިކަން މި އަހަރު ނުވެދާނެ ކަމުގެ ހުރިހާ ނުރައްކަލެއް ވަނީ ކުރިމަތިވެފަ އެވެ. އޭނާގެ ޓީމު މިވަގުތު އޮތީ 25 ވަނާގަ އެވެ. މުބާރާތުގެ ގަދަ 8 ޓީމު ހުރަހެއްނެތި ގަދަ 16 އަށް ދާނެ އެވެ. 9 ވަނަ ޓީމުން ފެށިގެން 24 ވަނަ އަށްދާ ޓީމުތައް ޖެހޭނީ ޕްލޭއޯފް މެޗެއް ކުޅޭށެވެ.
"ކަޓައިފި ނަމަ އޭގެ ގެއްލުން ކުލަބަށް ކުރާނެކަން ޔަގީން. އަހަރުމެން މަސައްކަތް ކުރަނީ އެކަން އެގޮތަށް ވިޔަ ނުދޭނެ. މިދިޔަ ފަހެއް ނުވަތަ ހަ އަހަރު ކުލަބު އޮތީ މާލީ ގޮތުން ގަދަކޮށް. އަހަރުމެން ބޭނުންވެއްޖެނަމަ ހަރަދު ކުރެވޭ. ބޭނުން ނުވެއްޖެނަމަ ހަރަދުނުކޮށް ވެސް ތިބެވޭ ހާލަތުގައި ކުލަބު އޮތް،" ގާޑިއޯލާ ބުންޏެވެ.
ނަތީޖާތައް ގޯސްވުމާއި އަނިޔާގެ މައްސަލަތަކުގެ ސަބަބުން ސިޓީން ވަނީ މިހާތަނަށް 120 މިލިއަން ޕައުންޑް ހޭދަކޮށްފަ އެވެ. އޮމަރް މަރްމޯޝް އާއި ޑިފެންޑަރު ވިޓޯ ރެއިސް އާއި އަބްދުކޯދިރް ހުސަނޯވް ގަތީ މި ފައިސާއިންނެވެ.
ގާޑިއޯލާ ބުނީ ކޮންމެވެސް ސަބަބަކާ ހުރެ ސިޓީ ގަދަ 16 އަށް ކޮލިފައިނުވެދާނެތީވެ ނޫސްވެރިން ކަންބޮޑުވާތީވެ އެކަމަގެ އަގު ވަޒަންކޮށް އުފާކުރާ ކަމަށެވެ. ސިޓީ ވަނީ 2022ގެ ޗެމްޕިއަންސް ލީގުގައި 5-1 އިންނާއި 4-1އިން ބުރޫގް ބަލިކޮށްފަ އެވެ. ނަމަވެސް ގާޑިއޯލާ ބުނީ އޭނާގެ ޓީމުން ބަލާނީ އެ ނަތީޖާ ހަނދާން ނައްތާލައި މި މެޗުގެ ފުރަތަމަ 20 މިނިޓްގައި ގިނަ ގޯލުތަކެއް ޖަހަން ކަމަށެވެ.
"އަހަރެން އުއްމީދު ކުރަނީ ވަރަށް ވާދަވެރި މެޗަކަށް. އެއްވެސް ޓީމެއް ބަލިނުވެ އޮވެއްޖެނަމަ އޭގެއިން ދައްކައިދޭނީ އެމީހުންގެ ވަރުގަދަކަން. ބުރޫގްއަކީ އެފަދަ ޓީމެއް. އަހަރުމެން ވެސް ބަލަނީ މިއީ ފައިނަލެއް ކަމަށް. އަހަރުމެން މޮޅު ކުޅުމެއް ދައްކާނަން،" ގާޑިއޯލާ ބުންޏެވެ.
ޗެމްޕިއަންސް ލީގަކީ ގާޑިއޯލާ މިހާތަނަށް ތިން ފަހަރު ކާމިޔާބުކޮށްފައިވާ މުބާރާތެކެވެ. އެއީ ސްޕޭނުގެ ބާސެލޯނާގައި ދެ ފަހަރު އަދި ސިޓީގައި އެއް ފަހަރު އެވެ.