އެފް.އޭ.އޭ އެމް ދިވެހި ޔޫތު ލީގުގެ ހުރިހާ މެޗެއް ނިމިއްޖެ އެވެ.
ބާރަ އަހަރުން ދަށާއި 14 އަހަރުން ދަށް އަދި 16 އަހަރުން ދަށުގެ އުމުރު ފުރާގައި މެޗުތައް ކުޅުނު އިރު މުބާރާތުގެ އެންމެ ފަހު މެޗުތައް ކުޅުނީ މިއަދާއި މިރޭ އެވެ. މިއަދު ހަވީރު ކުޅުނު 16 އަހަރުން ދަށުގެ މެޗު ކާމިޔާބު ކުރީ ކްލަބް ވެލެންސިއާއާ ވާދަކޮށް 4-1އިން މާޒިޔާ އެވެ. މިއީ މުބާރާތުގައި ވެލެންސިއާ ބަލިވި ފުރަތަމަ މެޗެވެ. މެޗަށް ނުކުތްއިރު ވެސް 16 އަހަރުން ދަށުގެ ޗެމްޕިއަންކަން ވެލެންސިއާ އަށް އޮތީ ކަށަވަރުވެފަ އެވެ.
ލީގުގެ ފަހު މެޗު މިރޭ ކާމިޔާބު ކުރީ ވިކްޓަރީ ސްޕޯޓްސް ކުލަބާ ވާދަކޮށް ސުޕަ ޔުނައިޓެޑް ސްޕޯޓްސް (ސަސް) އެވެ. އެއީ 5-0އިންނެވެ.
މުބާރާތް އިންތިޒާމް ކުރާ މޯލްޑިވްސް ސޮކަ މޭޓްސްއިން ބުނެފައިވަނީ އިނާމް ދިނުމުގެ ރަސްމިއްޔާތުތައް އޮންނާނީ އަންނަ ހުކުރު ދުވަހު ކަމަށެވެ. އެ ރަސްމިއްޔާތުގައި ހުރިހާ ޓީމަކުން ބައިވެރިވާނެ ކަމަށެވެ.
މުބާރާތުގެ 16 އަހަރުން ދަށުގެ ޗެމްޕިއަންކަން ވެލެންސިއާ ހޯދީ 18 ޕޮއިންޓާއެކުގަ އެވެ. ދެ ވަނަ އަށް ދިޔަ މާޒިޔާ އަށް ލިބުނީ 16 ޕޮއިންޓެވެ. އަށް ޓީމު ވާދަކުރި ލީގުގެ ފުލަށް ދިޔައީ ޕޮއިންޓެއް ނުލިބި ޔުނައިޓެޑް ވިކްޓަރީ އެވެ.
މި ލީގުގެ 14 އަހަރުން ދަށުގެ ޗެމްޕިއަންކަން ހޯދީ ޓީސީ އެވެ. އެ ޓިމަށް 17 ޕޮއިންޓް ލިބުނުއިރު ދެ ވަނަ ހޯދި ވިކްޓަރީ އަށް ލިބުނީ 15 ޕޮއިންޓެވެ. މި ބައިން ފުލަށް ދިޔައީ ތިން ޕޮއިންޓާއެކު އީގަލްސް އެވެ.
12 އަހަރުން ދަށުގެ ޗެމްޕިއަންކަން ހޯދީ ސަސް އެވެ. އެއީ 21 ޕޮއިންޓާއެކުގަ އެވެ. ދެ ވަނަ މާޒިޔާ ހޯދީ 15 ޕޮއިންޓުންނެވެ. މި ބައިން ވެސް އެންމެ ފުލަށް ދިޔައީ އީގަލްސް އެވެ. އެ ޓީމަށް މި ބައިން ޕޮއިންޓެއް ވެސް ނުލިބެ އެވެ.